1 . Sisaiva mwitaa timwa sero mwisa timwa niqiro viro titaro, Qine mwosara suqe sireranta, qumpau senta mwisa saaisaqama nitaate. Sia qoqaa tiri mwahuta tiate tinta mwosa saaisaqama nitaate. Qine vaintivano takuaate tinta, mwosa saaisaqama nitaivera, qini qova naavuni variva mwiva sia mwirara rietaro qini mwo inraisa nianarove. 2 . Re mwovano mwi kuara rietara mwo inraisa vesi vainti mwirera sitara qumpau sera mwiaane. Sia nraase qora vuqaa nroraqama sera aasaraqintaira aarama sera mwiaane. Mwo vaintinravuvano kumaariqama setanta suqe saiqa vare variasa, mwisa mwaara nraavuqi varitantave, aaraini vitantave, nraase qora vuqaa nroraqama senta noma vuatetanta aarama setanta vesi nraase qora moni nivariarave. Mwisa sia vesi nraase qora mwisara nroraqama senta rietanta mwitaa siavo. Mwisa tiri mwaraqa tiate titanta mwitaa siarave. Ne qini timwa nuko. Mwisa nraase qoravano mwaraqa timwa nitaavanta vaa niari soqaa vara saavo. 3 . Re mwovano monive , mwo inraisave, vesi vainti mwirera sitara qumpau sera mwiaane. Ri vaini variarivavaqa sia mwira mwinara takuaarive. 4 . Re mwitaa siraro mwi inraisava qumpau sero vasiarive. Mwitaa siraro ri qova esaa qumpau se vare varia saiqara takue variva, mwiva mwirara rietaro ri suqema mwitaanarove. 5 . Qine Gotiravaqa kua tireranta kumaariqama senta suqe saiqa vare variasa sia mwisa siane siate. Mwisa mwaraqa tirara quasetanta mwisa mwaara nraavuqive, nraase qora ntununukaama vinta varia aararaqaave, varitanta Gotirara aasara ne variarave. Ne tianira riaate. Mwisa nraase qoravano mwaraqa timwa nitaavanta vaa niari soqaa vara saavo. 6 . Re mwovano rena qora Gotiravaqa kua tirera renariaa varirera rena nraavuqi vera nera qenti vuma tera qumpau sera ri qova qumpau varira vaqama sera kua tiane. Re mwitaa siraro ri qova esaa qumpau se vare varia saiqara takue variva, mwiva ri suqema mwitaanarove. 7 . Qine Gotiravaqa kua titanta sia qumina vaqara kua tiate. Mwo matanaasa sia Gotira kua riaa nraase qorasa mwitaa ti variarave. Qinevaqa mwisa siane sivorave. Mwisa titanta, Qavaavaqa qavaavaqa qumina kua tiararo tiri mwariqavano tiri kua so riaanarove, tiarave. 8 . Qine sia mwisa aananaate. Qine sia Gotirara saparab sia enara Gotiva vaa qine esaa inraisara aara naara napisi saiso. 9 . Qine so mwataama setanta Gotiravaqa kua tiate: Tiri tiqova, re naavuni variaravave. Te suqema senta ri utu suqera nrora mwuro. 10 . Re tiriqaa naqisina enava qamwarama nriarive. Naavunaasa ri sasa sira vataqi vuanema sera re tiri saaisaqa siraqe te mwataini variarasavaqa ri sasa sira vataqi vuare. 11 . Te maqe sara nraanara tiri timwiane. 12 . Tiri sampiqama timwi taavanta te mwi kuara qaqira sauranema sera te ri sampiqama mwitauna kuara nrunka timwi taane. Maquqa si saiqava tiri qamaqaaso tira, re tiri vita vare viraqe te suqe si aararaqaa vuare. Re tiri saaisaqa si variraro Saataaniva sia tiri maquqama timwitaarive. Re vuniaava kempusaqama sera naqisi variaravave. Ri utu qai nrora mwiqinta vuararo ri utuvano qaqi qai vasiqiro vuanarove. Quqaave. Mwitaa timwa setanta Gotiravaqa kua tiate, tiro. Sisasiva tirama. 14 . Mwitaa timwa sero Sisasiva mwisa timwa niro titaro, Mwosa qini maquqama nitaivanta qine qaqira senta sia niarivaqa maquqama nitaivera, qini qova naavuni variva, mwivavaqa qini maquqa si kuara qaqirama saanarove. 15 . Qine mwisa maquqa si saiqara utirara qaqi qai riemwaqi vivera, qini qovavaqa qine maquqa si saiqara uti kuara qaqi qai riemwaqiro vuanarove, tiro. 16 . Mwitaa timwa sero Sisasiva titaro, Qine sara aurama tarera sinta, sia kumaariqama setanta suqe saiqa vare varia vaintisa siane siate. Nraase qoravano mwisa sara aurama tera takuetanta mpo tiate tinta, maqu vuri ratetanta nrue variarave. Ne tianira riaate. Mwisa nraase qoravano mpo timwa nitaavanta vaa niari soqaa vara saavo. 17 . Re mwovano sara aurama tarera sitara qumpau sera aurama taane. 18 . Nraase qoravano riara qaqima sara nre variso tiate tira, rena vuri siqama sera qiata qaahi numwa sera nruane. Mwitaa siraro ri qova qumpau variva esaa qumpau se vare varia saiqara takue variva, mwivama ri suqema mwitaanarove. 19 . Sia mwaa mwataraqa varitara soqaa ntununukaama taate. Mwaa mwataraqa soqaa ntununukaama taavaro uapaa tove hakuavantove, puaataqataivave, mwi inraisara nramwa sero vara maquqama se varirave. Muara vaintivanovaqa nukavu setanta mwi inraisara vare variarave. 20 . Mwata mwaaqa vatera eqeta naavuni uapaa tove hakuavantove, puaataqataarivave, muara vaintivanove, sia qini soqaa vara senta maquqama senaini vataate. 21 . Qine mwaa mwaa mwataraqa soqaa ntununukaama taivera, qine mwaa mwataraqa vasiani inraisarara qai mwuntusa vasiranta riemwaqinta vivarave. Qini soqaa naavuni ntununukaama viro vasirera, qine naavuni vasiani inraisarara qai mwuntusa vasiranta nroraqama senta riemwaqinta vivarave. 22 . Vuvano omwa voqiama sero itetaro mwavana nuvaasama mwitero. Ri vuvano suqema vasirera, esaa ri mwavanaqi suqema sero nuvaasaanarove. 23 . Ri vuvano maquqa sirera, ri mwavanavanovaqa sonkiraqima vasianarove. Ri vutaqivaqa sia nuvaasaraitiro sonkiraqa sirera, qise, ri vutaqi anoma sero sonkiraqa sianarove. 24 . Saiqa vainti mwovano siama so nkuaa vasa nrora vainti taaratanaqaa saiqa varaanarove. Mwiva mwitaa sirera, mworara mwira mwuntusa vasiraro mworara sia mwira mwuntusa vasianarove. Mwiva mwora kua riero mwora kua qoririma saanarove. Re siama so Gotiravaqa monivaqa nkuaa vasa vataqira vinarave. 25 . mwi kuara rietanama ne qiniara mwitaama tuko, Qine qaqi variqinta virarave, sara nrerarave, nramari nrerarave, nenta mwavanarave, vaaqa utirarave, sia mwi inraisara mwi inraisarara airi aato tivaro qini mwuntusavano nroraqa siarive. Qine qaqi variqi viva vuni vaisaro sara nreva naantiarainima vaiso. Qini mwavanavano vuni vaisaro qine vaaqa ututeva naantiarainima vaiso. 26 . Kuri qitenta nrue variasa takuaate. Mwisa sia sara vara tu senta vanuqinta uro nraavuqi vate variarave. Kurivano variavaro qini qova naavuni variva mwisa sara ruaara sirave. Kuri qumina inraisaqaavaqa Gotiva naqisi variva qini nraase qoraqaa siave Gotiva suqema sero naqisianaro? 27 . Qiniqintairo nta vaintivave ne qamwarama qutu vuaso tiro qaqi variani enara mwonravu tomaqa taanarove? Siama so vainti mwovano mwitaa sianarove. 28 . Qine naraiqamave nenta vaaqa utirara nroraqama senta rievariavo? Maura paira mwusauqi vasirara rietanta variate. Mwi inraisava sia saana suvu sero vaaqa quri varira. 29 . Ne qini timwa nuko. Ntaaru Soromoniva suqema sero mwuruqama taava sia sia maura pairavano itero nuvaasaira aatara sairave. 30 . Gotiva sampi maura ngiha mwusauqi maqe vaisaro sura sura tia tuta sairaro itamwa sairavaqa suqema sero mwuruqama mwite varirave. Gotiva mwitaa sivara tiro mwiva siave qinivaqa suqema sero vaaqa utu nitaanarove? Qise, Gotiva qini saaisaqama nite variva varisanta qine sia mwirara kempusaqama senta riaavo. 31 . Gotiva qini saaisaqama nite varirara tinta, sia qine nroraqama se naumaqaraitinta, Nara sarave nraanarave? Nara nramarive nraanarave? Nara vaaqave utuanarave? timwaqinta vuata. 32 . Gotira kua sia riaa nraase qorasa, mwisa mwitaa timwaqinta vi variarave. Qine sia mwisa aananaate. Qini qova naavuni variva qine esaa mwi inraisarara aara naara vaa napisi seroma variso. 33 . Qine Gotiva qiniqa naqisianiraravaqa, mwiva qiniara avuqavuma se nruaatetianiraravaqa, nroraqama se riemwaqinta vuate. Qine mwitaa sivaro Gotiva qine aara ne inraisaravaqa sini mwi inraisaravaqa qini nianarove. 34 . Sura qovara siani inraisarara sia nrotaqama senta riaate. (Qine maqe mwaa isaraara variasave.) Sura vari nraase qorasa sura qovara siani inraisarara so riemwaqinta vivarave. Nkuaa ena nkuaa ena mwiva nrariara muaaaravaqa qai vasivave, tiro. Sisasiva tirama.