¹ . Sisasiva varitaro takuaisanta airi nraase qora ntununukaama vinta variavro mwiva qaataqaa uro mwatasaa viro varisanta mwira nraaqiaranravuvaqa mwiva varinaini uro variavaro ² . Sisasiva mwasaasa soqara tero mwiva nrai nraaqiaranravu timwa niro titaro, ³ . Ne Gotiva si inraisarara vesiqama varuko ti vari nraase qorasa mwisa variavaro Gotiva mwisama suqema nitaanarove. Gotiva mwisaqa naqisiqiro vi variranta mwisa mwira nraase qorama varivarave. ⁴ . Mwuntusa maquqa siranta nate varisa, mwisa varivaro Gotiva mwisama suqema nitaanarove. Gotiva mwisa mwuntusa qisaasama nitaanarove. ⁵ . Tineqa varitanta sia niarivaqa maquqama niterara riesa varivaro Gotiva mwisa suqema nitaanarove. Gotiva mwaa mwatara mwisa saama sairara tinta, mwisa mwia varevarave. ⁶ . Napisi se nrue osarara sasa siarisa, mwisa varvaro Gotiva mwisa suqema nitero mwi osararaqaantai mwisa soqama nitaanarove. ⁷ . Mwosara mpo ti nraase qorasa, mwisa varivaro Gotiva mwisa suqema nitero mwisara mpo timwa nitaanarove. ⁸ . Quqaaqama se Gotira qai vataqi visa, mwisa varivaro Gotiva mwisama suqema nitaanarove. Mwi nraase qorasama Gotira takuevarave. ⁹ . Naqirera sivanta vaitutu si vari nraase qorasa mwisa varivaro Gotiva mwisa suqema nitaanarove. Gotiva mwisara ni nraaqiarave tirantama varivarave. ¹⁰ . Gotirara rietanta napisi se nrue varivanta mwia saara mwisa maquqama nite vari nraase qorasa mwisa varivaro Gotiva mwisa suqema nitaanarove. Gotiva mwisaqa naqisiqiro vi variranta mwisa mwira nraase qorama varivarave. ¹¹ . Qine ni vataqi vi varivanta mwia saara qiniara maquqa si kuara timwaqi vinta, qini maquqama nitenta, qiniara mwo kua mwo kua kumaari kuave, maquqa si kuarave, qiniara timwaqi vi varivanta, qine ni vataqi vi varivaro Gotiva qini suqema nitaanarove. ¹² . Qini maquqama nitaanema senta ntaaruvaqa vainti mwo siasa Gotira kua qovara sia vaintisa maquqama nitaarave. Qini mwitaama senta maquqama nitaivanta qine quasenta variate. Gotiva qini saiqa suqe saiqara rietaro mwia qiata naavuni suqe inraisa qinini temanama tairave. ¹³ . Mwaa mwataraqa nraase qora variavanta qine mwisa vutaqaa varitanta qine sore voqiama senta variavo. Horevano maquqama viro sia viti sirera, sia so qavaa utu sairaro viti sianarove. Sorevano maquqama virera, so maquqama viravetimwa senta mwia qaqira saivanta nraase qoravano mwiaqaa namwaqinta vivarave. ¹⁴ . Mwaa mwataraqa nraase qora variavanta qine ovavano itainema senta variavo. Mwatusa mwovano qaataqaa vasiariva sia qumpau vasianarove. ¹⁵ . Sia mwovano ova qumpi sero nkura vara sero mwia numwaqu tairave. Qao, nraavuqi variasavaqa esaa takuaate tiro, ova qumpi sero virira naavuni siritairave. ¹⁶ . Qine mwia voqiama senta nraase qora vuqaa nruetanta ovavano itainema senta variqinta vivanta mwisa qine suqe saiqa vare varira takuenta, qini qova naavuni varira mwira utu nrora mwiqinta vuata. ¹⁷ . Qine niara titanta, Mosesiva timwa tai kuaravaqa, poropeti vaintinravuvano timwataa kuaravaqa, vara qaqira sarero nrivave, tivorave. Qine niara mwitaama senta aato rievora. Sia ne mwisa kua qaqira taiqa sarerave. Mwi kuava quqaa mwivau vasiarive tina, nevaqa nruvave. ¹⁸ . Ne qini timwa nianira riaate. Naavuvanovaqa mwatavanovaqa taiqa viraro esaa mwaara kua mwiva qaqi qai vasiqiro vuanarove. Mwi kuaraqintairo esaa kuave pata uapaa kua mwi kuavavaqa vasiqiro viraro esaa inraisavano qovarama vuanarove. ¹⁹ . Mosesivavaqa poropeti vaintinravuvanovaqa timwataa kuava vaisaro mwovano mwi kuaraqintairo uapaaqa neqa sero mwosaravaqa titaro, Qine mwi kuara uapaaqa vasira soma neqa sevarave, tirera, mwi vaintiva variro naavuni Gotiva naqisianiraini viraro Gotiva mwi vaintirara, Re ni nraaqiara untovi mianto qai variaravama variaro, tianarove. Vainti mwovano Mosesira kuavaqa poropeti vainti kuavaqa riemwaqiro vitaro mwosaravaqa mwi kuara riemwaqinta vuate tirera, mwi vaintiva variro naavuni Gotiva naqisiani mwatusaraqi viraro Gotiva mwirara, Re ni nraaqiara nritarera virinto variaravama variaro, tianarove. ²⁰ . Ne qini timwa nirerave. Parisi vaintinravuvaqa, mwaara osara tia vaintinravusavaqa, mwisa niari riemwa senta titanta, Te Gotira kua rietanta napisi se nrue varuro, ti variarave. Qine sia mwisa aatara senta suqe aaraqaa vivera, qine Gotiva naqisiani mwatusaraqi sia so vivarave. ²¹ . Ntaaru Mosesiva qini saivaqasara timwatai kuara qine mwi kuara riaarave. Mwataama tiro: Sia mwora ru saane. Mwora ru saari vaintiva, mwiva kuaqaa varianarove, tirave. ²² . Mwiva mwitaa tira sai ne qavaa qini timwa niari. Nrai qata vasaara raraqa taariva, mwi vaintivavaqa mwora ru saiva kuaqaa varinema sero kuaqaa varianarove. Ne qavaavaqa qini timwa nirerave. Nrai qata vasaara mwaaquvanove tiani vaintira mwira vitaqira uro nrora kaanisorinravuvano varinaini sairaro mwiva kua varaarive. Nrai qata vasaara re uera vaintivano sia naumaqaravaqa vasivave tiari vaintiva, mwivavaqa mwora ru sero kua varainema sero kua varairaro mwira uro qutu vuasa vi mwatara tiaqi tuta saanarove. ²³ . Mwi kuara rietarama re mwaara nraavu nroraqi varitara mwo inraisa Gotira mwira mwira quasama mwitarera sira takuairaro ri qata vasaa mwovano riqaa kua vataariva qaqi vasirera, ²⁴ . Gotira mwirera sina inraisara mwiaqaa qaqi vatera, uro rena qata vasaa mwiravaqa varitara mwi kuara naane timwa napisi sera mwiaqaantaira uro mwi inraisara Gotira mwitara quasama mwitaane. ²⁵ . Mwovano riqaa kua vatarero ri vita varero ko nraavuqiara virara mwisaniri aaraini vitarama qamwarama serama mwi kuara napisi saane. Re mwitaa siraitira, ko nraavu viraro ko rie vari vaintiva riqaa kua vatero pipo titairaro ri vitaqiro uro karavusiqi saanarove. ²⁶ . Ne quqaa tianira riaane. Re karavusiqi variqira vira karavusiqi soqaa sitara sia esaa mwi monira sairaro sia so ri qamwarama titairara vinarave, tiro. Sisasiva mwi kuara tirama. ²⁷ . Sisasiva mwitaa timwa sero mwiva mwisa timwa niro titaro, Ntaaru Mosesiva timwatai kuara mwo kua qine riaarave. Mwi kuava mwataama tiro: Sia mwora nraatavaqa mwora vaativaqa sampi nruaate, tirave. ²⁸ . Sai ne qavaa qini timwa niase. Vaintivano nraase takuero aatoqintairo qai riero, Ne mwiravaqa nruena variataarave, tianirara Gotiva titaro, Re vaa nraata vaati nukema sera siaro. timwa sero mwi vaintiraqaa kua vataanarove. ²⁹ . Mwirara rietara re saantutaniaa vuqaantaira takue varitara maquqa si saiqara uti varirera, qavaavaqa mwitaamaqina vuaso tira, mwia vauru sera qaqira pisaane. Re vu nkuainku qaivasirara sia maquqa si saiqara utiraitira, naavuni soma vinarave. Re vu taaratana vasiariva maquqa si saiqara utuqira vira naantiara qutu viraro ri tia nrora itaaniraqi tuta saanarove. ³⁰ . Re sauqu saantutaqaantaira maquqa si saiqara uti varirera, re mwitaamaqina vuaso tira, mwia teqa sera qaqira pisaane. Re sauqu nkuainku vasiariva sia maquqa si saiqara utiraitira, naavuni soma vinarave. Re sauqu taaratana vasiariva maquqa si saiqara utuqira viraro ri tia nrora itaaniraqi tuta saanarove. ³¹ . Ntaaru Mosesiva timwatai kuava mwataama tiro: Vaintivano nrai nraata qaqira sarero sitaro nrai nraata qara mwo mwiro, Ne mwira qaqirama sauko, timwa sero qara mwianarove, tirave. ³² . Sai ne qavaa qini timwa niase. Mwira nraatavano sia mwo vaintiniri sampi nruaraitiro variraro mwira vaativano mwira qaqira sairaro mwira nraatavano vainti saata varairera, Gotiva mwitaama tianaro: Mwi nraaseva qaraasa vaintiniri nruetaro nraata vaati nukema saisoma tianarove. Mwira vaati soqarenaava mwira qaqira saisaro mwia saara mwitaa siso. Mwitaa sisana ne mwira vaati mwiraqaavaqa kua vataanirave, tianarove, tiro. Sisasiva mwi kuara tirama. ³³ . Sisasiva mwitaa timwa sero mwiva kua timwa niqiro viro titaro, Ntaaru Mosesiva kua mwo qini saivaqasara timwatai kuara qine mwi kuaravaqa napisi saarave.Mwataama tiro: Re sauqu iqiqaa vatera titara, Gotira vuqaa varitanama ne quqaama mwitaa sirerave, tina kuara neqa serorave. Gotira utu netara timwa tena kuarara rietara varaane, tirave. ³⁴ . Sai ne qavaa qini timwa niase. Sauqu iqiqaa vatetanta, te quqaa mwitaa sirerave, titantama sia Gotira utu netanta, Te quqaa mwitaa sirerave, tiate. Gotiva naavuni mwatasaa viro varirara tinta, mwirara rietanatama sia naavu utu netantama, Te quqaa mwitaa sirerave, tiate. ³⁵ . Gotiva nrai qiqu tutu sero mwaa mwataraqaa miavi vatero varirara tinta, mwirara rietantama sia mwaa mwatara utu netanta, Te quqaa mwitaa sirerave, tiate. Serusaremivano nrora vuniaa vaintivano variari mwatusava vasirara tinta, mwirara rietantama sia mwi mwatusara utu netantama, Te quqaa mwitaa sirerave, tiate. ³⁶ . Sia nenta qiata utu netanta, Te quqaa mwitaa sirerave, tiate. Qine sia so nenta sausiara, Eqara sausive, rupisi sausive, vasine tivarave. Qine sia so mwitaa tirara tinta, qine qumina nenta qiata utu netanta, Te mwitaa sirerave, tivorave. ³⁷ . Qine varitanta mwitaa sirerave tivera, qine qaqi eo qai titantama mwitaa siata. Sia mwitaa sivera, qaqi siave qai tiata. Sia mwo kua mwo kua tiata. Mwo kua mwo kuavano Saataaniraqaantairo qovara sianarove, tiro. Sisasiva mwitaa tira. ³⁸ . Sisaiva mwitaa timwa sero timwa niqiro viro titaro: Mosesiva kua mwo timwa taira qinevaqa riaarave. Mwataama tiro: Mwpovano ri vu vauru sairara, re nrai vuvaqa soma vauru senarave. Mwovano ri vai ntuvihau sairera, re nrai vaivaqa soma ntuvihau senarave, tirave. ³⁹ . Mwi kuara vaisana ne qini qavaa timwa niase. Maquqa siari vaintiva mwovano qini maquqama nitaireranta, siama qine nrai maquqama mwitaate. Mwovano ri aatosai nuteqa sairera, sia nrai nuqutiraitira, mwira qaqira sairaro sini aatosaivaqa nuteqa saarive. ⁴⁰ . Mwovano ri soti varavero ri vita varero ko nraavuqi uro sarero uti varirera, rena soti mwiaqaarama sairaro ri vaaqavaqa vararive. ⁴¹ . Mwovano ri suvai sero, Ne su inraisara quqira vaini mwona uro mwitaane, tirera, vara quqira uro nriaraini mwitaane. ⁴² . Mwovano mwo inraisara ri sapara sirera, mwira mwiane. Mwovano riara mwo inraisa miraqe qaso varaqina nrima rina mwiase tirera, eo tira mwira mwiane, tiro. Sisasiva tirama. ⁴³ . Sisasiva mwitaa timwa sero timwa niqiro viro titaro: Ntaaru qini saivaqasa tia kuara qine riaarave. Mwisa mwitaa tiarave: Rina nravunaarara qai mwuntusavano vasiarive. Nravutaara maquqama mwitenta vu aatova vasiarive, tirave. ⁴⁴ . Sai ne qavaa qini timwa niase. Nenta nravutaa mwisara qini mwuntusa vasiranta variate. Qini maquqama nitesara Gotira sapara sivaro mwiva mwisa saaisaqama nitaarive. ⁴⁵ . Qine mwitaa sitantama qine qini qova naavuni varira mwira nraaqiarama varivarave. Gotiva tisaro suarivano suqe vaintiqaa itero maquqa sia vaintisaqaa itairave. Gotiva vati vara saisaro vativano napisi senta nrue varia vaintisaqi tukisaro sia napisi senta nrue varia vaintisaqivaqa tukirave. (Qinevaqa nenta qova sinema senta suqe vaintiaravaqa maqu vaintiaravaqa kuqemaqinta vuate.) ⁴⁶ . Qiniara mwuntusa vasiarisara qai qini mwuntusa vasirera, Gotiva nara inraisara rietarove qini suqema nitaanaro? Taakisi vare variasa mwisa sia suqe vainti varitantavaqa mwisa mwisa niari sena vaintiara mwuntusa vaisanta variarave. ⁴⁷ .Qine nenta nravunaasa qai kua mwanenta sauqu nivera, qine nara suqe inraisaqaantaive Gotira kua sia riaasa aatara sevara? Qine mwisa voqiama senta qaima varivarave. ⁴⁸ . Qini qova naavuni variva, mwiva sia maquqa si saiqara utiraitiro, avuqavuma sero nrue varivave. Qine mwira voqiama senta avuqavuma senta nruetanta variqinta vuate tuko, tiro. Sisasiva mwitaa tirama.