1 . Sisasiva nramari varaisaro Saataaniva mwira mwataara siarive tiro, Gotira mwaraquravano Sisasira vitaqiro uro sia vaintivaqa variara quminasanta saira. 2 . Saisaro Sisasiva mwini 40 enara varitaro sia saravaqa nraisaro sara raataa sisaro varira. 3 . Sara nraataa sisaro varisaro Saataaniva nri nero Sisasirara titaro, Re quqaa Gotira mwaaquvano varirera, ori mwaaravurara tiraro bereti tuemwa virara nraane, tiro. 4 . Mwitaa tisaro Sisasiva mwira nrai timwa mwiro titaro, Qao, Gotira bukuqi vasi kuava titaro, Vainti mwovano sara nraanirara qai riemwaqiro vuariva sia so qaqi variqiro vuanarove. Mwiva esaa Gotira oqintairo tiani kuara riemwaqiro vitaro soma qaqi variqiro vuanarove, tirave, tiro. 5 . Sisasiva mwitaa tisaro Saataaniva mwira vitaqiro Serusaremini Gotira nraavu qiata nrai verani vasiraqa uro sero mwiaqaa mwira mwaaviarama tero 6 . titaro, Re quqaaqama sera Gotira mwaaquvano varirera, mwaaqaantaira mua mwataini hatohira vuane. Gotira bukuqi vasi kuava titaro, Gotiva riara rietaromwiva tiranta naavuniaasa riqaa suqema senta naqisivarave, tirave. Re rena qiqu oriqa nuteqa serorave tinta, naavuniaasa niari sauquqaantai ri tu varenta vivarave, tirave, tiro. 7 . Saataaniva mwitaa tisaro Sisasiva mwira nrai timwa mwiro titaro, Qao, Gotira bukuqi kua mwo vasiva titaro, Nroravano ri mwariqavano varirara tira, re sia mwira mwataara siane, tirave, tiro. 8 . Sisasiva mwitaa tisaro Saataaniva mwira vitaqiro uro qaata nritaraira qiataqaa sero esaa vuniaa vaintivano niari mwata mwoqaa mwoqaa naqisiara esaa mwi mwata maatara mwia kempusa inraisa vaqamase qumiqero titaro, 9 . Re ni qiqu taraini unto nira varitara ni utu qai nrora mwirera, ne esaa mwi inraisara ri mwianirave, tiro. 10 . Mwitaa tisaro Sisasiva nrai timwa mwiro titaro, Qao, Saataanio, sane vuane, Gotira bukuqi vasi titaro, Mwariqavano Gotiva nroravno varirara tira, re mwira utu qai nrora mwitara mwira saiqa qai varaqira vuane tirave, tiro. 11 . Sisasiva mwtaa tisaro Saataaniva mwira mwini sero visanta naavuniaasa tuki Sisasira saaisaqa siara. 12 . Sisasiva riaisanta Sonira navaaqavu senta karavusiqi saavaro variso tiavaro riero, Sisasiva nrima nanero Garirini vira. 13 . Mwiva mwini viva sia uro Nasareti nrai mwaaqaini variraitiro, uro Kapenaamini variqiro vira. Kapenaami mwiva Gariri nruka tosasantaa vasira. Mwi mwatava vasirero Sepuruniravaqa, Napatariravaqa mwata vasira. 14 . Sisasiva mwini uro varisaro ntaaru Aisaiaava Gotira kua qovarama sai kuava quqaa mwivau vasira. Aisaiaava ntaaru mwataama tiro: 15 . Ne Sepurunira mwataravaqa, Napatarira mwataravaqa, tirerave. Sontaani nramari vaisaro mwi mwatava urovi vaisanta mwi mwataraqa Gariri mwataqa mwo mwatanaa mwo mwatanaasa variarave. 16 . Mwisa sonkiraqi variqinta vinta, mwiaqaantainta ovavano nroraqama sero itaanira takuevarave. Mwisa sonkiraqi variavaro qutu vua osarava mwisa numwaqu saisanta variavaro mwiaqaantairo ovavano nuvasama nitarero uti varirave, tira. 17 . Mwi enaraqaantairo Sisasiva nrai saiqa soqarama sero nraase qora timwa niqiro viro titaro, Gotiva nraase qoraqaa naqisiariva vaininto vasirara tinta, qine maquqa si aarara qaqira saate, tiro. Tirama. 18 . Sisasiva Gariri nruka tosasantaa vitaro takuaisanta qate vase taaratana variara. Vasaava Saimonniva mwira mwo utu Pitaava varisaro mwira qatavano Enturuva varira. Mwitana tavusa saiqa vare variasa varitantara tinta, mwitana nramariqi vahe ne variara. 19 . Mwitana vahe ne variavaro Sisasiva mwitanara titaro, Qinetana ni naantiara ni vataqinta nriate. Qine tavusa vahe namwa senta varaanema sentama qinetana ni vataqinta nrivaqe ne qini qumiqaarinta qine vainti ntitevarave, tiro. 20 . Mwitaa tisanta maqe mwiqara mwitana niari vahe mwini senta Sisasira vataqinta vuarama. 21 . Mwitana mwira vataqinta vuavaro Sisasiva pataiqa vitaro takuaisanta vainti mwotana Sepetira mwaaqutana Semisivavaqa mwira qata Sonivavaqa variara. Mwitana botiqi varitanta niari qora Sepetiravaqama senta vahe temanasi variavaro Sisasiva mwitana aarama saisanta 22 . mwitana maqe mwiqara niari botivaqa niari qoravaqa mwini senta Sisasira vataqinta vuarama. 23 . Sisasiva Gariri mwo mwatusa mwo mwatusa nruetaro mwaara nraavuqi vera nero varitaro mwasaasa timwa nitaro Gotiva nraase qoraqa naqisiani kuara, suqe kua timwa niqiro vi varisanta rumuara utisave, ita visave, mwisa variavaro sisasiva mwisa suqema saisanta so variara. 24 . Sisasiva mwitaamaqiro vi varisaro mwira kuavano esaa Siriaani visanta mwi mwatanaasa niari nraase qoraqa mwo qara mwo qarama sero ita visa, rumuara utisave, nroraqama sero ita visave, vaana sampaqa variasave, mwavana ririniri si variasave, sini mwavana qutu vi vaintisave, mwisa mwisa esaa ntitaqinta Sisasiva sinaini uro saavaro mwiva mwisa suqema saisanta so variara. 25 . Sisasiva aaraini vi varisanta nraase qora airivano mwira vataqinta vi variara. Garirintairove, Dekaporisi mwatusanravuqintairove, Serusaremintairove, Suntiantairove, Sontaani nramari qarasi sinintairove, nraase qoravano sinantai sinantainta ntununukaama vinta mwira vataqinta vuara.