¹ . Mwi enara Soniva nramari ni vari vaintiva nri nero Suntiaani qumina mwataqa varitaro nraase qora timwa niro titaro, ² . Qine maquqa si saiqara uti varira qaqira saate. Gotiva nraase qoraqaa naqisiari enava vainintoma vaiso, tiro. ³ . Ntaaru Soniva sia vari enara Aisaiaava poropeti vaintivano varitaro mwi vaintiva qovarama vuanarove tira. Aisaiaava Sonirara mwataama tiro: Mwiva qumina mwataini variro aasara nero titaro, Nroravano vuani aarara temanama mwitenta mwira aara avuqavuma mwitaivaro mwiva mwivauma so vuarive tianarove, tira. ⁴ . Soniva vaaqa utu taiva vasirero kameri quaara mwia sausi qai vara sero ututero reti tavaarana rumpa taira. Mwiva sia sara vara tu sero nraraitiro, mwiva kakumavaqa, voravano nkurutai nramariravaqa, qai nretaro varira. ⁵ . Soniva kua timwa ni varisanta nraase qora Serusaremintaintave, esaa Suntiantaintave, Sontaani nramari tosa sini sini variasave, mwisa sinantai sinantai ntununukaama vinta ⁶ . niari maqu saiqa varaara timwa qovarama saavaro Soniva Sontaani nramariqi varitaro nramari ni varira. ⁷ . Soniva varitaro takuaisanta Parisivanovaqa, Santusivanovaqa, nramari varareranta mwiva sinaini nriavro mwiva mwisara titaro, Qine quaisa nraaqiaravanoma variavo. Gotiva nraase qora rirera uti varisanta ntava qiniara aatu nuqema senta vuate ntisantave qine mwaini ne sunaini nriavo? ⁸ . Qine quqaaqama senta maquqa si saiqara qaqira sareranta uti varivera, qine suqe saiqa varaivaqe te takuaare. ⁹ . Qine sia nenta vaitutu sira kua titanta, Ebarahaamuva tiri tiqova varisantara tinta, te so varuro, tiate. Gotiva sove tirera, ori mwaanravusa vainti tuemwa vinta Ebarahaamura nrainti varivarave. ¹⁰ . Gotiva satari teqa sarero saari osaraqi temanama taiso. Sia suqe tamwa riaanira mwiva teqa sero sairaro tiama itamwa saanarove, tiro. ¹¹ . Qine maquqa si aarara qaqira senta suqe siani aararaqaa qai vireranta utuavana ne qumina nramari qini ni varuko. Ni naantiara nriariva Gotira mwaraqura qini nianarove. Mwiva tia itaanira voqia sira qini nianarove. Mwiva nroravano ni aatara saariva nrianarove. Ne qumina vainti varitanara tina, ne sia so mwira qiqu nraavu varaqina uro mwianirave. ¹² . Mwiva nrai savore sauquqi tu varero qapaaqiri voqia sira qintata sirero uro nero qintatama sero nrora qai nrai savoreqaantairo vaqitaqiro uro sia qimpa vuani tiaraqi tuta sairaro itamwa saanarove, tiro. Soniva mwi kuara tirama. ¹³ . Soniva nramari ni varisaro mwi enara Sisasiva Garirintairo Soniva mwira nramari mwiarive tiro, mwiva varira Sontaani nramariqi viro. ¹⁴ . Mwiva mwini uro naisaro Soniva Sisasirara titaro, Qao, re nramari ni miataara vaisarama re niara nramari ni miane ti variaro, tiro. ¹⁵ . Soniva mwitaa tisaro Sisasiva nrai timwa mwiro titaro, Maqe qaqi sera nramari qai ni miane. Gotiva avuqavu si kuara timwa taira, mwi kuara tetana riemwaqinta virerave, tiro. Mwitaa tisaro Soniva eo timwa sero Sisasira nramari mwiro. ¹⁶ . Nramari mwisaro Sisasiva nramariqintairo qaqini mwaari naisaro maqe mwiqara naavuvano qantua visaro Soniva takuaisaro Gotira mwaraquravano kuri baurira voqia siva tukiro Sisasiraqaa varisaro ¹⁷ . naavuntairo kuavano titaro, Mwaa ni mwaaquve. Ni mwuntusavano mwoqama sero mwirara vaiso. Ne mwirara quasetanama varuko, tiro. tira.