¹ . Herotiva nroraqama viro vari enara Mariaava Betarihemini Suntiaa mwataqaa varitaro Sisasira mwata tero. Mwiva mwira mwata tero varisanta vainti mwonravuvano mwo osara mwo osara takua vaintinravusa suari nri naira vevaintainta Serusaremini nrima naara. ² . Mwinravusa nrima nenta sapara sinta titanta, Nraaqiara mwo Suntaaqa naqisiani vaintira ntanave mwata taisaro variso? Tenravu suari nri nainani varitanta mwira qovora takuenta mwira utu nrora mwirera nrurausave, tinta. ³ . Mwinravusa mwitaa tiavaro Herotiva mwivavaqa mwi kuara riero isarama viro mwiva mwirara airi aato titaro varira. Esaa Serusaremini variasavaqa mwi kuara rienta airi aato titanta variavaro ⁴ . Herotiva vainti nroranravuara aasara nero. Gotira saiqa vara mwite varia vaintinravusa vuniaasave, mwaara osara ti varia vaintisave, mwiva mwisara aasra naisanta nrinta ntununukaama variavaro Herotiva mwisa sapara siro titaro, Ntanave Gotiva titairaro tukuani nraaqiarara Sisasira mwira nrova mwira mwata taani mwatava vaiso? tiro. ⁵ . Herotiva mwitaa tisanta mwisa titanta, Betarihemi Suntiaa mwataqaave. Ntaaru Gotira kua qovarama se vari vaintiva mwaa kuara qara numwa tero titaro: ⁶ . Betarihemi Suntiaa mwataqaa vasiaravave. Nraase qoravano riara sia qumina mwatusave tivarave. Riqintairo nrora vaintivano qovarama vuanirara tinta, nraase qoravano riara utu vataa mwatusave tivarave. Riqintairo vuniaa vaintivano qovarama viro mwiva Gotira nraase qora Isareriqaa suqema sero naqisiqiro vuanirave, tirave. Ntaaru poropeti vaintivano mwitaa tirara tinta, te Karaisirara Betarihemiqi mwata taanarove tturo, tinta. ⁷ . Mwisa mwitaa tiavaro Herotiva qumpau sero mwo osara mwo osara takua vaintinravusa nriasa aarama sero titaro, Ntaireve qovora mwiva qovarama viso? tiro. ⁸ . Mwitaa tisanta mwinravusa Herotira timwa mwiavaro riero mwiva mwinravusa Betarihemini titero titaro, Qinenravu qunaunama se mwi nraaqiarara mpaa sireranata vuate. Qinenravu mwira mpaama se takuentama qamwarama nivaqa nrima timwa mivaqe nevaqa uro nraaqiara mwira utu nrora mwiaase, tiro. ⁹ . Herotiva mwitaa tisanta mwisa aaraqaa vi variavaro qovoravano vaa mwisa suarivano nri nainani varitanta takuava mwisa vuni mwiva naane viva uro nraaqiara mwiva variraqa ra sero mwiaqa vasira. ¹⁰ . Mwiaqaa vasisanta mwisa qovora mwia takuenta mwoqama senta quasaara. ¹¹ . Mwinravusa nraavuqi vera nenta takuaavaro nraaqiara mwiva nrai nrora Mariaasaniri varisanta mwisa takuentama mwatasanta tori sauru ravi varitanta mwira utu nrora mwitantama mwira quasama mwitenta. Mwisa quasama mwitenta mwiaqaantainta mwo inraisa mwo inraisa tuaqintai ohi senta goriqaantai ututaa inraisarave, ohi senta mwitaara. ¹² . Mwira mwi senta vari vaite variavaro Gotiva ruvaatasaa mwisa timwa niro titaro, Sia Herotira uro timwa mwiate, tisanta mwisa ntivinta mwo aaraqaa niari mwaaqainiara nrima nanenta vuarama. ¹³ . Mwisa vuavaro Sosepiva vaite varisaro Gotiva titai vaintiva qovarama viro ruvaatasaa mwira timwa mwiro titaro, Ntivira rena nraata nraaqiaravaqa vitera Isipini aatu vuane. Mwini uro variraqe ne qaso uro mwonare tianira riaate. Herotiva ri nraaqiara mpaama sero ru sarero uti variso, tiro. ¹⁴ . Mwitaa tisaro Sosepiva ntiviro enaqi qai nrai nraaqiaravaqa nrai nraatavaqa ntita varero Isipiniara viva uro mwini ¹⁵ . variqiro vi varisaro Herotiva qutu virama. Herotiva qutu visaro mwiaqaantairo ntaaru Gotira kua qovarama se vari vaintiva ti kuava quqaa vasirama. Ntaaru mwiva Kotiva mwataama tiso tiro: Ne Isipintaina nena mwaaqu aaraariro mwiva nrianarove, tira. ¹⁶ . Herotiva varitaro takuaisanta suari vu nri nainaniaa vaintinravu mwira kua neqase sia mwira timwa mwiraitinta, vuavaro mwira mwoqama sero raraiqa taisaro varitaro uro mwo sia vaintisa titero titaro, Esaa qorainti nraaqiara taara isi varaasave, sia taara isi varaasave, Betarihemini variasavaqa, mwia vara ututu variasavaqa esaa ru taiqa saate, tiro. Mwiva qovoravano qovarama vi enara suari vu nri nainaniaasa timwa mwitaa kuara rietaro taara isi varesavaqa, sia taara isi varesavaqa, ru taiqa saate, tira. ¹⁷ . Mwisa ru taiqa saate tisaro ntaaru Gotiva poropeti vainti Seremaiaara oqintairo ti kuava mwivauma vasiro. Mwataama tiro: ¹⁸ . Ramaa mwatusaqintairo nroraqama sero nate variani kuara nraase qora rievarave. Tiri taatova Reseriva nrai nraintiara nate varianarove. Mwira nrainti esaa qutu virara tiro, mwira mwuntusa qisaasa siariva sia vasiraro mwiva nroraqama sero nate varianarove, tira. ¹⁹ . Herotiva variro qutu visaro Sosepiva Isipini varisaro Gotiva titai vaintiva qavaa qovarama viro Sosepira tairasaa ²⁰ . timwa mwiro titaro, Ntivira nraaqiaravaqa, mwira nroravaqa, ntita varera Isareri mwata Suntiaani nrima nanera vuane. Ri nraaqiara ru sarera siasa qutu vuavo, tiro. ²¹ . Mwitaa tisaro Sosepiva ntiviro nraaqiaravaqa, mwira nroravaqa, ntita varero Isareriniara viro. ²² . Mwiva mwiniara vitaro riaisaro Akerausiva nrai qora Herotira mwaata varero Suntiaqaa naqisi varisaro Sosepiva mwini mwini vuaro tiro aatuma sero varisaro Gotiva tairasaa qavaa timwa mwisaro mwiva sia Suntiaani virairo qaqira sero ²³ . Garirini uro mwatusa mwo Nasaretini nrai nraase nraaqiaravaqa variara. Nasaretini uro variavaro ntaaru Gotiva nrai poropeti vaintinravu oqintairo ti kuava quqaa vasiro. Mwi kuava Sisasirara mwataama tiro: Nraase qoravano mwirara Nasaretiniaa vaintive tivarave, tira.