¹ . Gotiva Sisasiravaqama sero qini qaqi vara ntivuma saisanta variarara tinta, qine naavuni vasi inraisarara nroraiqama se riaaqinta vuata. Naavuni Sisasiva kempusavano Gotira sauqu saantutaini mwatasaavi varira. ² . Qine naavuni vasi inraisarara nroraiqama se riaaqi vitanta sia mwataini vasi inraisarara riaaqi vuata. ³ . Qine Sisasiravaqa qutu vuarara tinta, qine Sisasiraqi varitantama qine Gotiravaqa nkuaaqi varinta. ⁴ . Sisasiva qaqi variqi vi varirara tinta, qinevaqa qaqi variqi vivara. Mwiva naantiara qovara siranta qine mwi enara mwiravaqa qoqaa varitanta mwiva kempusaiqama sero suqema sero variqi vinema senta qinevaqa suqema se variqi vivarave. ⁵ . Mwi kuara rietantama qini vu aato mwuntusaqintairo mwata mwaaqaanaa saiqa sampi saiqa varera ru taiqa saivaro esaara taiqa vuari. Nraase qora sampi qaraqinta nrue osararave, nraase qoravano niari mwavanaqa sia suqema numwaqi osararave, mwosa nraata vaatiqama se maaqu vu takue osararave, maaqu saiqa vararera uti varirave, mwo inraisa mwo inraisa vara ntununukaa sirarave, mwo inraisa mwo inraisa vara ntununukaa sisa, mwisa kumaari Gotira utu nrora mwivariasa voqiama se varitanta Gotira qaqira pise variara. ⁶ . Nraase qoravano esaa mwi saiqara uti variavaro Gotira mwoqama sero rara itairaro mwisaqaa nroraiqama seroa kua vataanaro. ⁷ . Qinevaqa ntaaru varitanta mwi aararaqaa qai variqi vi variarave. Maqe mwaa enara qine esaa sampi osara mwitaa siani osarara qaqira pisatenta nruaata. Rara itaani osararave, irora sitanta naqirera uti osararave, mwosa nrautaaqa si osararave, esaa mwi osarara qaqira senta nruaata. Maaquqa si kuavave, kuaaru tivave, qini oqintairo nriasorave. ⁹ . Ntaaru qini vu aato visosavano maaquqama sero vaisanta qine sampi aaraqaa qai nruaara. Mwiaqaantai qine sampi nrua aarara qaqira senta variarara tinta, sia nrariara nrariara kumaari kua tiata. ¹⁰ . Mwaa enara Gotiva qini vu aato mwuntusa vara sero qaraasa ututairara tinta, qine suqema se variqi vivaro Gotiva qini vara se qaraasa utuqiro viranta qine Gotira aananamwa se varitanta Gotira osara suqema takuaata. ¹¹ . Gotiva qini qaraasa utu sero vataivara tiro, mwiva siama qiniara titaro, Re mwo mwatanaave, Re Suntaave; re mwavana toqa sai vaintivave, re sia mwavana toqa sai vaintivave; re nrora mwatanaave, re pata mwatanaave; re rumpa taisara variara vaintivave, qaqi variara vaintivave; tianarove. Gotiva sia qini ntusama sero mwitaa tiraitiro, qiniara qine Sisasiravaqa nkuaaqi variasavema tianaro. Sisasiva esaa Gotira nraase qoravaqa nkuaaqi variqiro vi varira. ¹² . Gotira mwuntusavano qiniara vaisaro qiniara mwisa ni nraase qora varitanta mwisa ni saiqa qai varaqi vuate tiro, Gotiva qini nrai saama taisanta qine variara. Qine mwitaa si variarara tinta, qine nrariara nrariara mpo titanta suqe siata. Sia nenta utu nrora varaqinta viraitinta, mwosara qisaasamaqi vivaro sia puposairanta variata. ¹³ . Qine sia irora siraitinta, nrai saaisaqa si nrai saaisaqa sitanta variata. Qiniqintairo mwovano nrai qata vasaara mwo kua timwa sairera, mwi vaintirara qamwarama sera rena qata vasaara sove ri kua qaqira pisatauko sia kua vaiso tiane tiata. Qine mwitaa timwaqinta vuata. Tiri nroravano Sisasiva qini kua qaqira pisero nrunka nitainema senta qinevaqa mwosa kua qaqira pisenta tauru saate. ¹⁴ . Qine esaa suqe saiqa mwia varaqi vitanta nrariara nrariara mwuntusa vasiranta variata. Qine mwitaama variqi vivera, qine nkuaara nraati qaima varivara. ¹⁵ . Sisasiva qini mwuntusa qisaasama nitaisanta qine variarara tinta, qini mwuntusa qintai qisaasa siranta variata. Mwitaama varitanta nkuaara nraati Sisasira mwavana voqiama senta variqinta vuate tiro, Gotiva qini aarama taira. Mwirara rietanta Gotirara suqeve timwaqi vuata. ¹⁶ . Saivaro Sisasira kuavano anoma sero qini saaisaqa siari kuava qini vu aato mwuntusaqi vasiranta qine mwi kuarara qai riaaqi vitanta nruaata. Suqe naumaqara tu senta Gotira kua osara nrai timwa mwi nrai timwa mwi sitanta suqe aara nrai qumiqe nrai qumiqe sitanta variata. Gotirara quasetanta isi tiata. Gotira kua isiqama se timwaqi vuata. Gotira utu tuaareretanata mwoqavaqa isi timwaqi vuata. ¹⁷ . Qine mwo saiqa mwo saiqa varaqi vitantave, qine mwo kua mwo kua timwaqi vitantave, Sisasira utuaara riaaqi vitantama mwitaa siata. Sisasira utu netantama Gotirara suqeve tiata. ¹⁸ . Ne qini nraase vaati vataasara tiarinta riaata. qine nenta qora mwisa kua riaaqinta vuata. Qine Sisasira nraaqiara variasara tinta, qine mwitaamaqi vuata. ¹⁹ . Ne qini mwisa qorara tiarinta riaata. Sia nenta nraase mwisa maaquqama nitaraitinta, mwisara mwuntusa vasiranta variqi vuata. ²⁰ . Ne qini nraaqiarara tiarinra riaata. Qine mwo ena mwo ena nenta nrosa qosa kua rietanta variqi vuata. Qine mwitaamaqi vivaro Gotiva qiniara quasetaro varianarove. ²¹ . Ne qini nraaqiara qosara tiarinta riaata. Qini nraaqiaravano sia qavaavaqa suqe saiqa utivo tinta, sia mwisa irora siata. ²² . Ne qini saiqa vaintiara tiarinta riaata. Qine nintaqaa naqisi vaintisa kua rietanta saiqa varaata. Sia vaintivano quasama nitaate tnta, mwisa vuqaa qai varitanta saiqa varaata. Qine tiri vuniaa vainti Sisasirara nroraiqamase riaaqi vitanta mwisa saiqa unaunamase varaata. ²³ . Qine vainti mwoni mwo saiqa varetanta qine Sisasira saiqa varauro timwa setanta suqema senta varaata. ²⁴ . Mwaa kuara riaata. Qine vainti mwoni suqema se saiqa varaivaro naantiara tiri vuniaa vaintivano qini saiqara rietaro mwirara ninta soqaa niranta qine mwiva nrai nraase qorara rietaro niarinive tiani inraisara varevara. Qine Sisasira saiqa vainti variarara tiro, Sisasiva qini saiqara rietaro mwiraraninta soqaa nianarove. ²⁵ . Mwaa enara vaintivano maaquqa si saiqara utuqi vuanira naantiara Gotiva mwirara rietaro nrai soqaa napisi sero nrai mwianarove. Gotiva sia mwi vaintira utuara rietaro quasama mwitaraitiro, napisi sero mwira kua ntusa sianarove.