¹ . Ne qini timwa nirera. Qinivaqa, Reotisiaaqi variasavaqa, mwo siasa sia ni viri takuasavaqa, toqaamwu tusena saaisaqamaqi vi varura. ² . qini mwuntusa qintairo qisaasa siranta nrariaara nrariaara mwuntusa vasiranta nkuaaqi variqi vuate tina, ne qini saaisaqamaqi vura. Ne qini saaisaqamaqina vuarinta qine Gotira kua napisi se rietanta mwi kuava quqaa kua vaiso titanta Gotiva qumpau tai kuara, Sisasirara timwa tai kuara, anoma se riaaqinta vuata. ³ . Gotiva nrai suqe osara, mwo osara mwo osara Sisasiraqi qumpau taisaro esaa mwi inraisara Sisasiva qovarama saisanta te Sisasiraqintaima Gotira osara, mwo osara mwo osara so takue varinta. ⁴ . Vainti mwovano kumaari kua qini timwa nirero suqe suqe timwaqiro nrianira mwira kua sia riaate tina, ne mwi kuara qini timwa nina. ⁵ . Maqe ne nriaraini varitana siama qinivaqa varina. so ne nriaraini varitanavaqa ne qini vaqa varuva voqiama sena varitana ne qini saiqara rietana quasetana varuko. Qine nkuaa kua qai timwaqi vitanta Sisasirara kempusai qamase riaaqi vi variarara tinta, ne mwirara rietanama mwuntusaqintai suqe sisana qiniara quasetanama varina. ⁶ . Qine Sisasirara tiri vuniaa vaintivanove tiarara rietanta qine Sisasiravaqa nkuaaqi taaqau variata. ⁷ . Satarivano mwata suqeraqi tuqa tutase suqema sero kumpiqainema senta qinevaqa nrora tuemwaqi vitanta Sisasiravaqa nkuaaqi variqi vuata. Sisasirara timwa niu kuara, mwi kuara qine riaaqi vitanta kempusaqamaqinta vuata. Mwitaama vitanta Gotirara suqeve timwaqi vuata. ⁸ . Mwovano mwataniaa kua osara timwa nitaro mwi kuaara qontai qini numwaqu saaso tinta, qine takuetanta variata. Mwi kuava qumina kumaari kuama vasiro.Qumina vaintivano mwataniaa osarara qai rietaro nrai timwa mwi nrai timwa mwi sia kuava qaima mwi kuava vasiro. Sia mwi kuava Sisasira qaantairo qovara sirave. ⁹ . Sisasiva vainti mwavana vataava varisaro mwariqavano Gotiva qaqi variqi vi osarava, esaa mwi osarava Sisasiraqi varirara tinta, ¹⁰ . Qine Sisasiravaqa nkuaaqi variqi vitanta qine so varia nraase qorasama variqi vinta. Naavunivaqa mwatainivaqa varitanta mwo inraisa mwo inraisaqaa naqisi variasa variavaro Sisasiva mwisa aatara sero vuni varivama variro. ¹¹ . Qine taaqau vinta Sisasiravaqa nkuaaqi variavaro mwiva qini qintairo maaqu saiqa toqa pisaira. Mwiva sia Suntaa vaintivano nrai mwaara kua rietaro qorainti nraaqiara mwavana toqa sainema sero qini mwavana toqa saira. Mwiva qiniara sia sampi naumaqara titanta maaqu saiqa utuate tiro, qini mwuntusaqintairo maaqu saiqa toqa saira. ¹² . Qine ntaaru nramari varenta Sisasiravaqa variavaro mwi enara qini Sisasiravaqama senta qunamwa taara. Qini qunamwa taavanta qine Gotiva Sisasira qutu viraqintai qaqi vara ntivuma sairara kempusaqama se riaaqi vuavaro, mwiva Sisasira vaqamasero qinivaqa qunamwa taaraqintai qaqi vara ntivuma saira. ¹³ . Ntaaru qine maaqu saiqa qai utuqi vuarara tinta, qine qutu vuasa voqiama senta variara. Mwi enara qini mwuntusaqintairo sia qini maaqu saiqa toqa nitaisantara tinta, qine sia soqama se variara. So mwaa enara Sisasira vaqama sero Gotiva tiri qaqi vara ntivuma sero esaa tiri maaqu saiqa mwi kuara siqama timwi taira. ¹⁴ . Te Gotira kua mwo kua mwo kua neqa se varuraromwia saara tiriqaa kua nrora vaisaro Gotiva mwi kuara vara sero Sisaira rutaa satariraqaa mwi kuaravaqa rutaisaro Sisasiva tiriara rietaro qutu viro tiriqaa kua vasira taiqa saira. ¹⁵ . Sisasira satariqaa siritaavaro mwiva mwiaqaa varitaro tiriqaa kua vasira taiqa timwi tairara tiro, Saataanivavaqa, mwira senasa vaana vuniaasavaqa,tiriqaa kua vateva sia vasira.Sia vasisaro Sisasira satariqaa siritaavaro varitaro nraase qora vuqaa mwisa kempusa neqa sero mwisa aatara saira. ¹⁶ . Sisasiva mwitaa sirara tiro, mwovano qini navaaqavitaro qiniara ntaaruana mwaara kua rietanta qine mwi sararave mwi nramarirave nrevorave, mwi enara mwi enara nrora enaqaa mwitaa mwitaa siate, qaraasa tora nrima naaniraqaa mwitaa mwitaa siate, tianarove. Mwovano qovarama viro mwitaa mwitaa siate titaro qini navaaqavu saasorave. ¹⁷ . Esaa mwi osarava qoqaa vasi osaravama vasiro. Sisasiva qovarama viro esaa mwi osarara taiqa sairama. mamanaanru voqiama sero vaisaro Sisasiva quqaa inraisa mwivama variro. ¹⁸ . Mwo sisa qiniara titanta, Nrivaqe tenta utu vara mwatainiqama senta naavuniaasa utu nrora mwiqinta vuare, ti variara. Qine mwi vaintisa kua riaaqi vitanta sampiqa sivora. Mwi vaintisa te taira takuaurantave titanta qumina mwatainiaa osara riaaqinta mwisa niari utu qai nrora vare variara. ¹⁹ . Mwi vaintisa Sisasira qaqira pisenta sia mwiravaqa nkuaaqi variara. Sisasiva tiri qiata voqiama sero varisanta te mwira mwavana voqiama senta varunarave. Mwavanave, qiqu sauquve, nrunrunruve, esaa mwi inraisava qiatavaqa taaqau viro vasiraro soma vaintivano kempusaiqa siro nrora quaanarove. Mwira voqiaama senta senta te Sisasiravaqa taaqauvi nkuaaqi variarera, te mwira mwavana varitanta soma nrora quaanara. Te mwisa mwitaamaqi vitanta nrora quaate tirto, Gotira mwuntusa vasira. ²⁰ . Qine Sisasiravaqa qutu vuarara tiro, mwo osara mwo osara mwataniaa osaravano sia qiniqa naqisisanta qine qaqinaini suvanu vinta variara. Qine qaqinaini suvanu vi variasara tinta, qine naraiqamave mwataniaa osarara nroraiqama se riaaqi vi varinta. ²¹ .Mwo siasa niari naumaqenta titanta, Sia mwi inraisara tu varaane. Sia mwi sarara nraane. Sia mwi inraisara tu varetara takuaane, ti variara. Mwisa mwitaa tiavanta qine naraiqamave mwisa kua riaavo? ²² . Mwisa mwitaa ti varia inraisava, mwi inraisava pataiqa vasi inraisava vaisaro vaintivano mwi inraisara vara saisaro taiqa vi inraisava qaima vasiro. Qumina vaintivano niari naumaqa senta mwosa timwa nitanta tiri kua vataqi vuate ti varia kuava qaaima vasiro. ²³ . Airi nraase qora qao timwa tai kuara rietanta suqe kuave tiavarovaqa mwi kuava sia suqe kuama vaiso. Vaintivano mwi kuara riaaqiro vitaro nrai utu vara mwatainiqamaqiro viro sara aurero nrai mwavana nuquqi viro mwitaamaqi vuari osarava siama so mwira saaisaqa sianaro. Mwi kuara riaaqiro vuariva qaqi qaima maaquqa si saiqara utuqiro vuanaro.