¹ . Ne qini saiqa vaintiqaa naqisi variasara tiarinta riaata. Qine unaunama setanta nenta saiqa vaintiqaa naqisiata. Nintaqaavaqa naavuni variva naqisirara tinta, nenta saiqa vaintiqaa suqema se naqisiqi vuata. ² . Sia qoriri siraitinta, mwo ena mwo ena Gotirara aasara timwaqinta vuata. Sia vaitevaritanta Gotirara aasara tiraitinta, naumaqara tusenta aasara titanta Gotirara suqeve timwaqinta vuata. ³ . Nenta Gotirara aasara titanta tiriara mwisa saaisaqa siranta Sisasira kua timwa niqi vi aarava vasiarive tiata. Ne Sisasirara qumpautai kuara nraase qora timwa niqi vuvama varina. Mwi kuara nraase qora timwa niura saara ni rumpa saavanama mwaaqi varina. ⁴ . S niara rietanta Gotirara aasara tivaqe ne napisi se Sisasira kua nraase qora timwa niarinta napisi se riaata. Haunri ne sampi kua timwa niasora. ⁵ . Sisasira kua sia rie nraase qorasa varivanta qine mwisa vuqaa napisi se nruaata. Sia qine mwisavaqa qumina variraitinta, qine takuaivaro Sisasira kua timwa ni aarava vasiranta qine Sisasira kua mwisa timwa niata. ⁶ . Qine mwisavaqa kua titanta sia mwisa qoriri siani kuara tiraitinta, mwisa sasa siani kuara tivanta mwiaqaantai mwisa mwo kuara qini sapara sivanta qine so niari timwa ninema senta variata. ⁷ . Titikaasiva ni mwasaasa qini timwa niso. Titikaasiva tiri qata vasaa suqeva varitaro napisi setaro tirivaqa nkuaa saiqa Sisasira saiqa vare varira. ⁸ . Ne mwira titaariro mwiva qine varinaini uro tiri mwasaasa qini timwa niranta qini mwuntusavano suqe siranta quasetanta variata. ⁹ . Ne mwiravaqa Onisimaasiravaqa titaarinta vivarave. Onisimaasiva tiri qata vasaa suqevama. Mwiva quqaaqa sero esaa saiqa varaivama variro. Mwiva qiniqinraavama variro. Mwitana visa uro mwaaini vasi mwasaasara qini timwa nivarave. ¹⁰ . Arisitakaasiva mwiva nivaqama sero rumpa taava, mwiva qini kuamwanaiso. Banabaasira qata Maakivavaqa qini kuamwanaiso. Ne va qiniara titana, Maakiva qine sianaini viranta qine mwira quasama mwitenta mwira vitaate, turama. ¹¹ . Sosuaara mwira utu mwo Saasitaasivave tia vaintiva, mwivavaqa qini kuamwanaiso. Gotira nraaqiara Suntaaqintai so taaramwo mwinravusa qai nivaqa varitanta Gotiva naqisiani kuarara nroraiqama se rietanta ni suqema se saaisaqa si variara. ¹² . Epaparaasivavaqa qini kuamwanaiso. Mwivavaqa qiniqinraava Sisasira saiqa vaintivano variso. Mwiva qiniara rietaro kempusaqama sero Gotirara aasara ti varira. Mwiva qiniara Gotirara aasara tiro titaro, Gotio, re mwisa saaisaqa siranta mwisa sia puposairanta mwisa kempusaiqama varitanta sia nraaqiara uapaa variraitinta, kempusa nraase qora varitanta ri kua suqema se riaaqinta vuate, tira. ¹³ . Ne takuaukaro mwi vaintiva kempusaiqama sero saiqa varetaro qinivaqa Reotisiaani variasavaqa, Hiraporisini variasavaqa, saaisaqa si varira. ¹⁴ . Rukuva tiri totaa suqevavaqa, Demaasivavaqa, qini kuamwanaavo. ¹⁵ . Tiri qata vasaa Reotisiaani variasavaqa mwisara rietana mwisa kuamwanaura mwisa timwa niate. Nraase mwo Nimpaaravaqa mwira nraavuqi ntununukaa siasa, mwisaravaqa ne rietana kuamwanaura mwisa timwa niate. ¹⁶ . qine qara mwaa saara numwa senta Gotira nraase qora Reotisiaqinraasavaqa nivanta mwisavaqa saara nuate. mwiaqaantainta ne qara mwo, Reotisiaqinraasaini vara saura, mwia qinevaqa vara senta saara nuaate. ¹⁷ . Qine Akipaasira mwataama se timwa mwiata. Tiri nrora Sisasiva ri saiqa mwira quqaaqama sera varaqi vira uro taiqa saane, tiata. ¹⁸ . Ne Poruvama, nena sauquqo qara nitanama qini kuamwane varuko. Ni rumpa taavana mwaaqi varuravaqa sia taunru saate. Gotiva qini suqema nitaarive tuko.