¹ Ihuba botu boru'i barirero, biro nai nora tauni'i orurero. ² Tabate, bainti bokiaka aiha bainti tari'a bita bare Ihu bira'a ani. Bainti biba buhari'i aiha bataiba. Ihuba bika mara'ura ututara tabero aiha bainti tiba miharo, "Baainti baubo'o are wahane nanarae, tee ai bauhaika bi'u amitauro." ³ Taba, bainti hinkiaka lo autu bariaka nariara tiha, "Ma bainti biba Kotirara ma tauba'a uba tabaibo." ⁴ Ihuba baka bika irirahika tabatero tiharo, "Nanti manta nee nenta arara ihai ora arara bate? ⁵ Nanae bira bo'abata tia'arira, 'Tee nii kumi bi'uma nimitauro o himpira buane?' ⁶ Imanta nee tabe babe, Bainti Baainti bano aima batai bainti kumi bi'ibaria aikarora bataibo. Ihuba aiha bainti tiba miharo, "Himpuane, nena tarianta barera nabuni buane." ⁷ Bainti biba himpiro nai nabuni bira. ⁸ Bainti nahenti bira tabe, bika rabukubi Nora autu bara bini'i, bira nanarae biba ma minti aikarora bainti nimira. ⁹ Ihuba ma bi batukara kero biro, oru bainti bora bira autu Matiura tabero. Bainti biba monu bare bariaka nabu'i baibo. Ihuba bira tiba amiharo, "Tii ani abatane," Biba himpiro Ihura abatero. ¹⁰ Ihuba nabu'ira o'ubiro kara nareba ibo, bainti ora monu bare bariaka bata kumi bainti bata ani Ihura bata bira kai'a bainti hampata kara ne. ¹¹ Farisi bainti bira tabe, bika himpi Ihura kai'a bainti tiba nimiha, "Bira nanarae Ihuba kumi bainti nahenti bata monu bare bariaka batakero kara naibo?" ¹² Ihuba bika uba iriro tiba nimiharo, "Bainti kia aiha bataka, kiama bika haba heba bainti tabeba, ibo bainti aiha baraka'i ma haba heba bainti tabeba." ¹³ Nee bima abatate nana ubae tee kubai tauna. 'Tee bo'ake umpo iarara antu'aruro, kia opara. 'Bira nanarae, kia tee tubuna bainti taukae iriha tenabu kia kumi mintirai abu abu abi bauraukabe, kumi bainti kaira nai kumiara umpo'iate." ¹⁴ Bira nantiara Ionira kai'a bainti ani Ihura tiba miha, "Bira nanti mantae tenabu bata Farisi bata kara a'irakeha nunabu tibauro, aii'a aii kai'a bainti bata kia mintia bo?" ¹⁵ Ihuba bika tiba nimiharo, "Hoe bainti taukae nahenti irai karara'a anika i'irateha baiba nahenti baraira orantiba bira'a baira? Ibo bo enta anianoma nahenti baraira oraintiba bika kero buano ma, bi entara ma bika kara a'irakeha nunamu tiba. ¹⁶ Kiabira bainti bobano harua raba'era ata araka raba'era bari bataira, bira nanarae biba raperiaro bara bo bata ma anoma raperiano. ¹⁷ Aii'a kiama bainti bobano araka waini namai harua memera paha ira batano. Bika minti bera waini uta bano orai'a biro raperiro raurua noma. Minti manta araka waini araka uta'ira bataira bika hantai ake bukai ma baiba. ¹⁸ Ihuba bi haikarara tiba nimubai manta, iata bainti bobano ani torikauru arero. Biba Ihura tiba amiharo, "Tii rabura bano bate ma bi'ana ma utubibo, hoe are ani kau'u bira'a batairo a'ii uri himpua narobe." ¹⁹ Ihuba himpiro bira abata barero, nai kai'a baintia rabata. ²⁰ Bi bantarai, nahenti bobano tora tabaiba kia tai'ero a'ii bairo 12 ihi baraiba. Ihura natiara anirero raba'era bitiro wata barero. ²¹ Naheti bano nai tiba miharo bira nanarae,"Tee bate bira raba'era wata bare, tee ho'ama bira be." ²² Ibo Ihuba tuanta biro bira tabero tibamiro, "Nahenti baainti bee, kia etane nena mara'ura utuaraba nina ho'aba kaibo." Bi'arika nahenti bano ho'abira. ²³ Ihuba bi iata baintira nabu'i ori'etero, biba tabai banta bainti ta'a ru'utiha ora uba tibariabo. ²⁴ Biba bika tiba nimiharo, "Nee bira ahi niarai a buate biba kiama utibo a'ii baita teroma baibo." Bika narahiha tauba'a uba birara tiara. ²⁵ Bainti nahenti eka baha'ai bebarabo, Ihuba ori'etero nahenti baainti kau'u wata baraibo himpiro. ²⁶ Ma bi ubaba bi batuka'i eka biro aniro birama. ²⁷ Ihuba bi batukara kero bimanta tarau abu impara bainti bira abata bare. Bika hanta naberai tiha, "Devitira Baainti bano be, tihantara umpo iane." ²⁸ Ihuba nabu'i uri'etero, bika hanta Ihura abata bare aniabo Ihuba bika hanta tiba nimiharo, "Nee hanta mara'ura uti tee nii hanta ho'ae kara?" Bika hanta bira tibamiha, "Eiyo Nora baubo'o," ²⁹ Ihuba bika hanta'a kau'u batero tiharo, " Kairo naihanta mara'ura utu tainte kero obariare," ³⁰ Bika hanta abu bano rampai bira. Nantiara Ihuba bika tiba nimiharo, "Nenanta kiama boru piri bata ma bira obarira tiba amiate." ³¹ Bika hanta buru eka bainti tiba nimura bira nanarae bika hanta ata bihaikaba obari manta ratii. ³² Bika hanta buabo, bainti bobano no tintara ba ora aiho bano baiba, bainti bokiaka bira bitake Ihubira'a ani. ³³ Ora aiho bano bira ihairo aitaraibo, biba uba tibai manta, eka bainti rabukubi tiha, "Kia tenabu naru Israilini minti haikara tabaunabe." ³⁴ Aii'a Farisi tiha, "Ora aiho raikiraba bira aikaro amibo ma biba ora aiho barake baibo." ³⁵ Ihuba eka batuka iraihairo nora tauni nira. Biba bika irirara tiba nimiharo mono nabu'irai. Biba ko'e uba tiba o'ai'a kero Kotira kindomuara, aii'a eka bo bo aiha baraka ho'ikero. ³⁶ Biba ora bainti nahenti tabero, biba bikara ha'uru itero nanarae, bika ora mara bareha iri mara reha. Bika baireka sipisipi kia bika ra'ikira ba baika. ³⁷ Ihuba nai kai'a bainti tiba nimiharo, "Kara bano pi'abiro baibo, ibo kai'a bainti bira bareka kia orai iabo. ³⁸ Mintibo ma bo'akera nunamu Norai tiro nai bibama kara oba, bira nai kai'a bainti orai akero barakaira kara oru barate."