¹ Ihuba bii ubara tikero, aii'a biba nai disaipoli mintia kero tiba nimiro, ² Nee mintu make tabate, tara kuari abu nantiara, Pasova anira bika Bainti Baainti bara bitake nimiba bainti taukae bira bara katari ata ari baintika kau'u ira." ³ Bira nantiara eka hetpris bata iata-bainti bainti nahenti raiki rauka iata-pris Kaiapasira nora nabu'ira ruba uabi. ⁴ Bika eka uba rumpake ebaria ake Ihura raba'abuke arukareka. ⁵ Bika boha arara bate tiha, Kia tenabu bira nora kara abutana mintiare, bira nanarae, bainti nahenti i'oka bate borabe. ⁶ Bate, Ihuba Betanini Saimonira bii baintiba lepra aiha ihairo ho'ira bira nabu'i baimanta. ⁷ biba tainta ata o'ubiro kara nebai baro nahenti bobano alabasta bahubera ta'u barero nora miakara baira, aii'a bira biri Ihura iata ata rauru kero. ⁸ Ibaro, disaiporu bira tabe, bika arara itake tiha, "Bira nana okararae nora monu bai haikaba umina rauru biro bibo? ⁹ Tenabu ma bahubera ta'u nora monu ata kaura bara manta bii monura barake behi bainti nahenti nimiatara be." ¹⁰ Ibaro Ihuba baka bika uba tura iriro, mintibo biba bika tiba nimiharo, 'Bira nanarae nee uba notahi nahenti bara amiabo? Bira nanarae biba bo ko'e okara ma tini minti bo. ¹¹ Bii behi bainti nahentika airu entama nii batake baiba, tere kiama nii hampata bariaina. ¹² Biba bahubera tii bata baura ahia kaira, bira tiri batama bara heno amakero batta ira buainara. ¹³ U'ai ake nii tiba nimuro, ma bii ubara eka batana timanta, bika bii nahentiba nana hika mintira bira timanta birara bata ma iribabe." ¹⁴ Bira nanatiara, 12-nabu ihairo disaiporu boru bano, bira autu Judas Iskariotiba oru hetpris tabero, ¹⁵ Biba tiharo, "Nee nana haikae tiri timi babe tere Ihura nii nimiai?" Bika 30-nabu silva monu bira ami. ¹⁶ Bii entara'i, Judasiba ara rantaura Ihura nabuta nimireba. ¹⁷ Abuhaina kuari abu ata nora kebu ruba iha bareti kiabu yis baira nareka, disaiporu Ihubira ata ani bira ireha, "Tainie tenabu aii batuka heno ama ami tarira Pasova kara nenabe?" ¹⁸ Ihuba bika tiba nimiharo, "Nee nora tauni ira bii bo bainti mintiake tiba amiate,'Tisaba mintia kero tibo,tiri kuari abu imanta tenta disaiporu hampata Pasova ari nabu'ira nare rabe." ¹⁹ Disaiporu Ihuba tinteke eka hika mintuake, Pasova kara heno ake. ²⁰ Erai manta, 12-nabu bata kero kara ata o'ubiro. ²¹ Kara neha baubaro, Biba tiharo, "Tere nii u'ai ake tiba nimuro, nii ihairo boru bano ma tii nabuta kau'u ira kanaro be." ²² Eka ha'uru itai manta aii'a bohau bohau bano bira ireha, "U'ai akebe, Nora baubo'o kia tere haube?" ²³ Biba nai tiba nimiharo, "Bainti bano tabae tikantiro boha kuampa ira kau'u bataiba, bii baintiba ma tii nabuta kau'u ira kanaro. ²⁴ Bainti Baainti bano buano be, mintuake uba ararua tara. Ibo nora umpo ira bii baintira tabae Bainti Baainti bara kero nabuta kau'u ira kaira! Bo'abata ko'eha bira noba kia bira batataba." ²⁵ Judasiba, tabae bira nabuta nimiairaba ireharo tiharo, "Tisa baubo'o, aira tere ma ira?" Ihuba bira tiba amiharo, "Birama nena tibakarao." ²⁶ Kara nebaria manta, Ihuba bareti bara kero, aii'a aiho akero bara kui kero nimiro tiharo,"Barake nate, ma bira tiri batabe." ²⁷ Biba waini kapu ira barakero ko'erabe tiro aii'a bika nimiro tiharo, "Nee eka nate. ²⁸ Bira nanarae ma bira Tiri narebe mintia kero kontraki ahiarero eka bainti nahenti kumi bi'uainara. ²⁹ Imanta tere nii abu abu ake tiba nimuro, Tere kiama aii'abata ma waini tabara naina biro bii entara nii hampata araka waini aii'a Tenta Ora Kindomu ira naina." ³⁰ Bika bo ihianta tibake bebare Oliv Ai'ina ata oru bura. ³¹ Bira nantiara Ihuba bika tiba nimiharo, "Tii ahi aibe, nee eka bate enta i'aima kebabe, bira nanarae baka uba bano nane bairabe, 'Tee sipisipi raikira bainti orai akai sipisipi hampi auri ma bibabe.' ³² Bira nantiara tere uri himpuai, nii abuni Galilini ma buaina be." ³³ Ibaro Pitaba bira tiba amiharo, "Airakate eka ima hi'iruabo bira nana hika aini oba riainarara, tere kiabu ma ari tauba'a utu amiainara be." ³⁴ Ihuba bira tiba amiharo, "U'ai ake tee aii tiba amuro, bate enta'i'ai, kokorara bano kiabu uba tira, are tina be, are kiabu tiriara tabau nabe tarau bohau taimi ma tina." ³⁵ Pitaba Ihura tiba amiharo, "Airakane tere ari kantima utuainara be, kiama tere ari autu kuke ainara be." Aii'a hinikia disaiporu bata boha ari ubara'i tura. ³⁶ Bira nantiara, Ihuba nari disaiporu hampata bo batuka Getsameni bura, aii'a biba bika tiba nimiharo, "Nee ma ata bai'e tee butura ata oru nunamu tirebe." ³⁷ Biba Pitara bata Sebetira baainti tarau bata tinta kero biro, biba ho'ara kero ha'uru iteharo aii'a arara maru ibo. ³⁸ Bira nantiara biba bika tiba nimiharo, "Tiri arara bano nora umpo ira'i baiharo utua ari bo. Nee ma'ata baiha tabeha raikiha tiri batake bariate." ³⁹ Biba inarau biro, aii'a birihairo hi'iriro nunamu tura. Biba tiharo, Tiri O'o, bira aini ho'irera, ma bi kapu mara a'ini bara kane teuna, ibaro kiabu tinta antu aube, kiabe, kiaro aii antu abano abariaire." ⁴⁰ Biba anirero tabau manta bika baitete baubaro aii'a biba Pitara tiba amiharo, "Bira nanarae nee kia ho boha auwau bata tibatake tabeha raikiha baiba be?" ⁴¹ Raikiha aii'a nunamu tihara baiha ma kiabu aba'ara ira hi'irina be. Bira nanarae aiho bainti bano wahe baibo aii'a batta bano ma kiabu kekau ibo." ⁴² Aii'a bata oru nunamu mantia kero tura, "Tee O'o, ma bihaikaba kiabu atarairera bira narabe, kairo ari antu'a obariarire." ⁴³ Biba ani tabau manta bika baitate baubaro, bira nanarae, bika abu bano tauntai manta. ⁴⁴ Aii'a biba bika kero anirantero tarau bohau taimi bata oru boha ari nunamura tura. ⁴⁵ Bira nantiara, Ihuba disaiporu biri mintia kero tiba nimiro, "Nee a'ii buru baitehae bariabo? Tabate, kuari abu obara bibo Bainti Baainti kumi bainti kau'u ira kera." ⁴⁶ Himpi enabu buare. Tabate, bainti bano tiri bara nabuta kau'u ira kairaba ma bira ani aumai abibo." ⁴⁷ Biba a'ii uba tibaibo, Judasiba, 12puna bu'ihaina disaiporu bainti bano airu hampata bika iata pirisi kai'a bainti bata bainti nahenti iata bainti kai'a baintiara bata aniara. Bika bainati ihai batake i'oka hikara batake anura. ⁴⁸ Bate, bainti bano tabae Ihura nabuta nimiairaba bika tiba nimiro nanahika biba mintira tabe ee bii baintira be tiba, biba tiharo, "Tere mo'aina, bii baintira be, nee bira ma tatau watate." ⁴⁹ Totara bata Ihubi ra'ata aniro tiharo, "Enta'ibe Tisa baubo'o!" aii'a Ihura mo'ero. ⁵⁰ Ihuba bira tiba amiharo, " Ara'o baubo'o, nana haikara anina bira'i mintuane," Aii'a totara bata bika Ihura ani wata tatau bare. ⁵¹ Aii'a totara bata bainti bobano Ihura batake bauka bainati re'ukero iata pirisi kai'a bainti ato te'a ukaira. ⁵² Ibaro, Ihuba bira tiba amiharo, "Bainati bara beba nai uta'ira batane, bira nanarae, tabae bainati watairaba, bainati bano ma bira orai'a amitanaro." ⁵³ Are mintia kera iriha, Tiriara nai Obinai naberai tiraro Biba nai airu ankero baraira tubu tiri kaho iate? ⁵⁴ Ibaro, bira nana arae Kotira uba bano u'ai'a tini buanaro, kairo ma biba obariarire?" ⁵⁵ Bii entara, Ihuba airu bainti anuka tiba nimiharo, "Nee tini anireka bainati batake aii'a i'oka hika batake muara bainti bitareka bo'arabe? Tere airu enta mono nabu entana o'ubiha irirara tibauna be, nebo kiabu tiri wata bare rampa rabe. ⁵⁶ Ibo, ma bihaikaba obarira bira nanarae, eka poropeti uba bano u'ai akero obariarire," Aii'a bira nantiara eka disaiporu bira ke eka etake binuara. ⁵⁷ Bainti taukae Ihura wata baraka bira bitabare nora iataprisi Kaiapasira ata bura. Bira ata, nora bainti iata bainti birara ruba uabi bekai ura. ⁵⁸ Ibaro, Pitaba bika nantiara abata barero iatapirisi nabu nante'ara urira. Aii'a biba ori'etero bira ira soldia hampata o'ubiro bika Ihura nantira tabareba. ⁵⁹ Bate, iataprisi bata eka kaunseli bika una ara ranteha tirara, bira Ihura arukerara. ⁶⁰ Airu una'ara tubo bika kiabu bo orahika rantora. Bika mintura hairo tarau bano una'ara uba batake anura, ⁶¹ aii'a tiha, "Ma baintiba mintia kero tirabe, "Biba Kotira mono nabu rakabu kero aii'a tarau bohau kuari abu enta ma aii'a bara ai'aro akanobe." ⁶² Aii'a iatapirisi banora uri himpiro Ihura tiba amiharo, "Are kiabue uba hinikira ariara tira nai tiba niminara be? Bira nanti ubarae arini tiabo?" ⁶³ Ibaro Ihuba kiabu bo uba bata tura. Mintibo iatapirisi bano bira tiba amiharo, "Tere ari kekauke Kotira autu ata turo are ma Karaitibae, Kotira Bainti banoe o kiae?" ⁶⁴ Ihuba bira tiba amiharo, "Are nena tiba makarao, Ibaro, ari tiba amuro, bateta tabairo Bainti Baainti bano aikaro kau'u tanarai o'ubiro ma narubai haina tonabu ata tubuanaro." ⁶⁵ Iata pirisi bano bira iriro, biba nari utaba'a umpani kero tiharo, "Ma bira tauba'a uba ma tibo! Bira nana okararae bo'abata ubara rantara be? Tabate, bate nenta ma tauba'a uba iriabo. ⁶⁶ Bira nee nantua ke'e iriabo?" Bika bira tiba amiha, "Utiraha atama baibo." ⁶⁷ Aii'a bika bira biri ata tara bihike, bika bira nai kau'u notahi ari, ⁶⁸ aii'a bika tiha, "Are o'ia akera tinabu tiba timiane, bira nanarae, are Karaitiba be. Bira tabae ari aribo?" ⁶⁹ Pitaba nabu baha aini aii'a tubika ira o'ubiro baibaro, bo kai'a nahenti bano bira ani irero, "Are boru bano ma Ihura Galilini hainara abata ihaira." ⁷⁰ Ibaro biba kiabe tiro ekaka abu ata aii'a mintia kero tiharo, "Kiabu ma tere tabauro nana hika nee tiara." ⁷¹ Biba tubika enta ata hiro bebare baibo, bo kai'a nahenti bano bira tabero bira batake bariaka tiba nimiharo tiharo, "Ma baintiba Ihura Nasaretini hainara bata kero nibai babe." ⁷² Biba kekau kero tiharo, "Tere kiabu ma baintira tabaunara be!" ⁷³ Bira nantiara kiabu bukai, bira batake himpi bariaka bika Pitara tiba amiha tiha, u'ai akebe, are Ihura abate bariaka bika ira hanobe, bira nanarae, ari nina uba atama iruro are bika irababe." ⁷⁴ Bira nantiara uba baru tiba kero tiharo, "Tee kiabu ma baintira tabau nara be," aii'a totara bata'i, kokorara bano uba tura. ⁷⁵ Aii'a Pitaba irura Ihuba tura, "Kokorara banora kiabu tara anta bohai'a uba tira, are tihara kiabu tiriara tabau narabe." Bira nantiara bebarero ora i'irataura.