¹ Aii'a narubai haina kindomu baireba, 10-ninabu barata nahenti nai oba bare bainti bano bika barareba anira tabareka bura. ² Aii'a bika ihairo 5-nabu ko'e irirahika batamanta aii'a 5-nabu kiabu ko'e irirahika bate. ³ Aii'a 5-nabu kiabu ko'e irirahika bataka bika oba i bare, aii'a bika kiabu bahubera bararai buara. ⁴ Ibaro 5-nabu bika ko'e irirara bataka bika ta'u ira bahubera bare oba batake bura. ⁵ Bainti bano nahenti barairaba kiabu totara animanta, nahenti haika abu tauntai manta aii'a bika baitabi. ⁶ Ibo enta tabarana, bo naberai bano tiharo, Tabate, Bainti bano nata bati iairaba anibo! Biha oru aranahi bitakate. ⁷ Aii'a bii nahenti haikaka rabukubi himpi nai oba bara abu abu iha. ⁸ Nahenti haika kiabu ko'e irirara bataka aii'a nahenti haika ko'e irirara bataka tiba nimiha, tinabu hinikina bahubera nee tibiate, bira nanarae, tinabu oba bano impa bire babe. ⁹ Imanta nahenti haika ko'e irirara bataka bika tiba nimiha, bate kiama ho baibo tenta nabu bata nii bata kaho iainarabe, minti boma nee nentara oru bahubera ko'ai iate. ¹⁰ Bika bahubera barareka bua manta, Bainti bano nata bati iairaba animanta. Aii'a nahenti haika taukae heno'a bariaka bika bira batake kara ata ori ete, aii'a bika enta tinta kaura. ¹¹ Bira nantiara 5-nabu barata nahenti kiabu bainti batake bauka anire tiha, E'ara baubo'o, e'ara baubo'o, tinabuni enta antua rane. ¹² Biba bika tiba nimaharo, U'ai ake nii tiba nimuro, tere kiabu nii tabau raukabe. ¹³ Mintira ko'eke ra'ikiate, nee kiabu taba bo bii kuari abura. ¹⁴ Mintia kero baibo, Banti bobano bo kantari ira bireba. Biba nai kai'a bainti narakero biba nai haikara ko'e haika bika nimiro. ¹⁵ Bo bainti 5-nabu silva uta monu amiro, aii'a bora tara anta silva monu uta amiro aii'a bora boha silva uta monu amiro. Bohau bohau bano nai kai'a barai natekero, aii'a biba bo niara batuka bura. ¹⁶ Bainti bano 5-nabu silva monu uta baraiba biba oru bo 5-nabu silva monu uta kai'a barakero mintua barero. ¹⁷ Boha arira okara, bainti bano tara silva monu uta baraiba biba bata oru kai'a barakero bo tara uta silva monu barero. ¹⁸ Ibaro bainti bano boha silva monu uta baraiba biba oru batta ira uikero nai e'ara monu bira ira unta tero. ¹⁹ Bate bukai akero kuari abu bibo, bika e'ara banora aniro ani bika kai'a baraura monu tabareba. ²⁰ Kai'a bainti bobano tabae 5-nabu silva monu uta baraiba biba bo 5-nabu bata silva monu uta bata barero anira. Aii'a biba tiharo, 'E'ara baubo'o, are 5-nabu silva monu uta timiara manta. Tabane, tere bo 5-nabu bata silva monu uta mintua bare anuro. ²¹ E'ara banora bira tiba amiharo, 'Ko'erabe, are tiri ko'e kai'a bainti banobe. Are ampara haika ko'e kera ra'ikiana be minti manta ari airu haika ata ma karira hinta utinarabe. Anira tikantira wahane.' ²² Kai'a bainti tabae tara silva monu uta baraiba biba bata aniro tiharo, 'E'ara baubo'o, are tiri tara silva monu uta timianabe. Tabane, tere kai'a barake bo tara silva monu uta bata ma bare anuro.' ²³ Bira e'ara bano tiba amiharo, 'Ko'erabe, are tiri ko'e kai'a bainti banobe, are ko'ekera ina hika raikiara babe, minti manta ari karira airu haika ma hinta uti narabe. Anira tikantira wahane.' ²⁴ Kai'a bainti tabae boha silva monu uta baraiba, biba aniro tiharo, 'E'ara baubo'o, tere tabauro,are iha bainti banobe. Are kara ka'a kiabu utuanara ruba ihara aii'a are kiabu kubu kana a'iraira kara i ubi bariara babe. ²⁵ Tere ariara bo'amake eteha ari silva monu uta batta ira kuke'a taunarabe. Tabane, ma birabe, ari monu be.' ²⁶ Ibaro bira e'ara bano bira tiba amiharo, are kiabu ko'e kai'a barera aii'a are tiri popoha nara kai'a bainti banobe, are mintiakera tabera, tere kara kiabu uti raiha anti baurau kabe aii'a kara kubu kiabu a'iraiha kara ubi baurau kabe. ²⁷ Mintiba hoe are tiri monu bira monu nabu'ira baraka nimiaraitirio, aii'a tere oru rante ani, tere tenta monu batake bira ata wahara monu bata barauraitirio. ²⁸ Mintira nee ma bira boha silva monu uta barake amiate tabae 10-nabu silva monu uta batai kai'a baintira. ²⁹ Bainti bano tabae airu haika bataira, tere bira oora haikaba amirabe. Ibaro tabae kiabu airu haika bataiba, tere bira barake bainti taukae airu haika bataika bika ma nimiaina be. ³⁰ Bara ma ora kai'a bainti beba baha'ai a'u konkira'ira kaibo nari arai tenti riharo i'irate haro bariaire.' ³¹ Bainti Baainti bano nai atahara ira nai ankero batakero ma tubuanaro, bira nantiara ma nai kempuka kini oba tainta ata o'u buanaro. ³² Biba tubuai nara bairo, eka bainti nahenti ma eka kantri i raipi rihai ma ani bira abu ata ruba iba, aii'a biba bainti bohau bohau ma raira naro sipisipi raikira bainti bano sipisipi bata memera bata rairai tekero. ³³ Biba sipisipi kau'u tanarai batero aii'a memera katani. ³⁴ Bira nantiara, Kiniba taukae bira kau'u tanarai bariaka tiba nimiro. Bare aniate, tiri Oba niara ha'uru ita nimi taibo. Aii'a biba nari kindomu niara heno ama taibo ho'arero eka hika mintu baka. ³⁵ Tere karara narara baura nee tiri kara timiara, tere namariara antu arura nee tiri timiara, tere bobatana ura nee tiri bitabare nenta nabu'ira buara. ³⁶ Tere utaba'a kiabu bataura nee tiri kaho iara, tere aiha bareha baura nee tiri ra'ikiara, tere karabusi ira baura nee tiri oru tabara. ³⁷ Aii'a abu abu bainti nahenti bira tiba amiha, Nora baubo'o, ta entara are karara antu aruara manta tenabu aii kara amunabe? O namariara antu aruara manta amuro? ³⁸ Bira ta entara are bobatana bainti bano iara manta tenabu aii bitabare tenta nabu nabu'ira buro? O kiabu utaba'a batara manta tenabu aii amuro? ³⁹ Aii'a ta entara are aiha barerae o karabusi ira bariara manta tenabu aii oru tabe? ⁴⁰ Bira nantiara kiniba bika tiba nimiharo mintima tianarobe, 'U'ai ake nii tiba nimuro, nana hikae nee tiri ata baraini mintira, bira nee tinima mintiabo.' ⁴¹ Aii'a bira nantiara biba kataini bariaka tiba nimiharo, 'Nii tiri abu ahi u'aitate, nee iha bano kiabu impe baira ima bibabe, satara batake bira ankero bii batukara. ⁴² Bira nanarae, tere karara antu ari manta baura nee kia timiara, tere namariara antu ari manta nee kiabu timiara, ⁴³ Tere bobatana bainti baura nee tiri kiabu bitabare nenta nabu'ira buara, aii'a tere kiabu utaba'a bataura nee kiabu timiara, tere aiha bare bata aii'a karabusi ira bata baura nee kiabu tii tabara.' ⁴⁴ Aii'a bira nantiara bika tiha, 'Nora baubo'o, ta entara are karara iara manta tenabu aii kara amuro, o namaira iara manta, o bobatana bainti bano iara manta, o kiabu utaba'a batara manta, o aiha barera, o karabusi ira bariara manta kiabu tabe? ⁴⁵ Bira nantiara bika tiba nimiharo, 'U'ai ake nii tiba nimuro, nee ma bihaikara mintiara kia bira kiabu autu bataraini hauma mintua bo, aii'a bira bata kiabu tini hauma mintia bo.' ⁴⁶ Nee iha irama biba bira kiabu impe bai ihara ibo abu abu abi bariaka bika airu enta bai aiho rama bare babe.'