¹ Bii entara Ihuba eka uba tai'a kero, Galili batuka tutero, aii'a hini bantarai Judia batuka Jodani namai ata hiro hini bantarai anura. ² Nora bainti nahenti Ihura abata bare bura, aii'a biba bika aiha ho'a nimitaira. ³ Aii'a Farisi Ihubi nai ani, aba areka, bika tiha, "Bira hoe bo ara tubake nahenti ami bira a'ira nai antu'a ata atita keba? " ⁴ Ihuba bika tiba nibiharo, "Nee ara tanu kara ruake tababo, Ho'ara kero Kotiba bainti mintua kero, biba boha nahenti boha orainti aii mintua taura." ⁵ Aii'a Kotiba tiharo, 'Bii okarara ma bainti bano nai nora ora tutero nai nata tiro tatau buano, aii'a bika hanta boha batai abiba.' ⁶ Aii'a kia tarau bai, kiabube, bika boha batai abuabo. Minti bo nana hika Kotiba tatau taira, kiama bainti bobano rauha kanaro." ⁷ Bika Ihura tiba amiha, "Bira nanarae Moseba tinabu tiba timiharo, ara tubakeha nahenti nimiha atitake bariara?" ⁸ Aii'a Ihuba bika tiba nibiharo, "bira nanarae nee bikoka bano kekau ma bibo, minti bo Moseba ara ruba nimiha nahenti atitate, ibaro ho'a rero kiabu mintua kero abarira. ⁹ Tee nii tiba nimuro, "Nahenti bano kiabu pamuku okara mintibo bainti bano pepa ara rua kero amiro atita kareba, aii'a bo nahenti barareba, bii bainti ba pamuku okara ma mintua naro. Aii'a bainti tabae bii nahentira barairaba, biba bata pamuku okara mintua naro. ¹⁰ Disaipori Ihura tiba amiha, "Mintirera, bo'abata ko'era bainti kia nahenti barate!" ¹¹ Ibo Ihuba bika tiba nibiharo, "Ma ubara kiabu eka bainti iara aube, bohau bohau bainti iarabe takae ma ubara bara a'riaka. ¹² Bainti hinikiaka bariabo taukae kia nahenti bare baainti bateka. Hini kiaka nora arara ihai mintuake obara buaka. Hinikiaka, bainti bika baata to'a kamanta ma kia nahenti bareba. Aii'a hinikiaka nai mintiake kia nahenti bararai Kotira Kindomu kai'a barareka. Bainti tabae ma ubara barero nahenti barareba, kairo biba ma ubara ko'e kero barai." ¹³ Bira nantiara bainti nahenti baainti bite bare Ihubi nai ani kau'u batero nunamu tiba nimi tairera, ibaro disaipori bika atumanta. ¹⁴ Ibo Ihuba bika tiba nibiharo, "kiabu bika raba abuate, kaimanta baainti tuna naini aniate, narubai haina kindomu baireba bainti tabae nai bara muntu bike baainti nati bo'arake mara ura utuaka iarama." ¹⁵ Ihuba kau'u baainti haka ata batero nunamu akero, aii'a mini tutero bura. ¹⁶ Ihuba bubaro bo ubara bainti bano bira ata aniro tiharo, "Tisa baubo'o, tere nana ko'e haika mintie mara ura airu enta baira bararabe?" ¹⁷ Ihuba bira tiba amiharo, "Bira nanarae are tii ko'e haikara ire bariarao? Kotiba bohau bano ma ko'e babe. Ibara are airu enta bare baria mara urara barareba irera, Kotira lo eka ma abatakena. ¹⁸ Ma baintiba natina lora abatare bae ire baibo, Ihuba bira tiba amiharo, "Kiabu bainti bora aru utuane, kia pamuku okara mintiane, kia muara barera kiabu ko'ata una'ara tiane, ¹⁹ Nena nora ora bebarai bariane, aii'a nenara antu'ari nantia kera borara bata antu aruane." ²⁰ Bii ubara bainti ba Ihura tiba amiharo, "Tere Kotira lo ekama abata kauro, tee nana bohaika mintie airu enta bai mara urara bararabe? " ²¹ Ihuba bira tiba amiharo, "are abu abu bainti abireba irera, are nenia nahikara oru eka monu ata bataira baraiba behi bainti nimia, aii'a are ora hika ma narubai batena. Mintia kera ani tii abata." ²² Ibaro ubara bainti bano Ihuba tura iriro, bira bikoka aribo auha mara rabata bura, bira nanarae biba oora monu onana bataiba. ²³ Ihuba nai disaipori tiba amiharo, "U'ai'ake nii tiba nimuro, oora onana bataira ba Kotira Kindomu ira ori etare ba kikipama ianobe." ²⁴ Aii'a nii tiba nimuro, kiabu iha ibo kameli bano uu'a abuaka bi'etanaro be, boha aribo bainti oora onana bataka Kotira Kindomu ira ori etebabe." ²⁵ Disaipori bii ubara iri, rabukubi tiha, "Tabae ho'akero aiho baranaro be?" ²⁶ Ihuba bika tabero tiharo, "Bainti nahenti kiabu ma ho nai kaho ake aiho barebabe, Kotiba ima bika aiho nimia narobe, bira nanarae Kotiba ima eka hika mintia narobe." ²⁷ Bira nantiara Pitaba Ihura tiba amiharo, "Are tabe rabe tenabu eka hika a'ira kema ari abatauro. Tenabu nana haikae ari abateha bararabe? " ²⁸ Ihuba bika tiba nibiharo, "U'ai'ake nii tiba nimuro, Kotiba baata araka mintua tero, Bainti Baainti bano kini tainta ata nai ruba hara ira o'ubira, nee tiri abataika 12para Kini tainta ata o'ubima 12para Israeli antu raireba. ²⁹ Eka bainti taukae nabu tutaika, aii'a bika aura ata, aii'a bika noka oka, aii'a bika baaintiti, o bika batta tii autu ata, Kotiba 100 amakero ma bika nana haika kaira nimiro aii'a airu enta bai mara urara ma nimianaro. ³⁰ Ibaro oora bainti abuni bika nantiarai ama iba, aii'a bainti nantiarai ikama abuni ibarabe.