¹ Sabathia Ihuba witi naho ira bibai manta bira kai'a bainti karara antu'ari manta bika witi taba hi'ike naura ma. ² Imanta Farisi bira tabe, bika Ihura tiba amiha, "Tabate, bira nanarae Ihura kai'a bainti sabati lo rauhabo." ³ Ibo Ihuba bika tiba nibiharo, "Nee kia nana hika kararuake Devitiba nana hika bainti bira batake bariaka hapata mintira karara antu'aru bo? ⁴ Biba Kotira nabu'i biro oru bareti kia nanetiara barakero naira, bira biba kia ma ho bira batake bariaka nimiano. Bi baretira bira mono nabu ira kai'a bainti ai nebaria raba? ⁵ Kiae are bira lo bano tura karantua kera iriarao sabati'a mono nabu'ira kai'a bainti lo rauha keha iabo bikai bira kia kumi aube? ⁶ Imanta mantiake nii tiba nimuro bobano mono nabu'i bo'a bata binto'ake baiba ma'a baibo. ⁷ Are bira nana okara bai ubara tabairera, 'Tee ha'uru itarara ma antu aruro kia ofabe, 'kia ma are ho kia kumi mintiaka ko'ata batena. ⁸ Bira nanarae, Bainti Baainti bano biba sabati Nora bano ma." ⁹ Bira nantiara Ihuba bi batukara kero Juda batana mono nabu'i ori'etaira. ¹⁰ Mini, kau'u orai abi bainti baira. Farisi bainti Ihura ire, "Bira ho'e aiha baraka sabati ata kaho'iba?" Bi ubara bika tiara bira Ihurara are kumi ma mintiarao tireka be. ¹¹ Ihuba bika tiba nibiharo, "Bainti bobano nii ihairo bohau sipisipi batero, aii'a sabati ata sipisipi biba rubu'ira otu raba'ubiro, biba kiae sipisipi bira kaho iano? ¹² Bainti bano ma sipisipi atara kera baira, bira ko'e hama sabati ata sipisipi kaho iba." ¹³ Aii'a Ihuba bainti bira tiba amiharo, "nena kau'u bara u'aitane, "biba Ihuba tintekero ibaro bira kau'u bano ho'a bo kau'u bo'ara bira. ¹⁴ Imanta Farisi bebare ora ara Ihura arirara rantara. ¹⁵ Ihuba baka bika irirahika tabero, mintibo biba bi batukara kero bimanta ora bainti nahenti bira abatau baro, aii'a biba bika aiha ho'a nimitaira. ¹⁶ Ihuba bika kempukai akero tiba nimiro kia bokia bainti nahenti tiba nimiate biba tabae. ¹⁷ Ma biba abu abu akero poropeti Aisaya ba tintekero obarira, ¹⁸ "Tabane, tii kai'a bainti be, aii'a tee kubaite bira bo'ake arara ihai antu'ari. Tee tenta Aiho bira'i batairo biba abu abu okarara tiharo taukae kia Juda batana. ¹⁹ Kiama biba bika uba ra'ano o naberai tiano o bainti bokiaka bira uba kiama tauni aratuna tira iriba. ²⁰ Biba kiama kunkara kia kekau intana bata rauha kano, aii'a kiama ramu kia ko'e kero itaina impa kano. Biba a'i kai'a bara'i biro ko'e okara atara kaina ma. ²¹ Bira autu ata ma bainti taukae kia Juda batana bira ata mara ura utiba. ²² Nantiara bainti bo abu impa bibo no tinta bibo kia uba tebai bainti bitake Ihube ata ani, bi baintira ho'a kaibo abu bano ho tabaibo no bano ho uba tira. ²³ Eka bainti nahenti rabukubi tiha, "Aii ma baintira, bira Devitira baaintie?" ²⁴ Ihuba ma bainti bira bara ho'a kaira Farisi irike, bika tiha, "Biba ora aiho barake baira bira Belsebali ba kempuka ami bobe, biba bira ora aiho iata baintibe. " ²⁵ Ibaro Ihuba baka bika irirahika tabatero tiharo, "Eka kindomu abutana hiro rakabu biraba orai ama buano. Aii'a eka nora taunie o nabu banoe abutana rakabu biraba biba kiama ho kekau kero barianarobe. ²⁶ Aii'a Sataba bara Satara a'inikareba, bira abutana rakabirara ma barianaro. Bira kindomu bano nantia keroe kekau kero himpuanaro? ²⁷ Aii'a tee Belsebalira kekau'a ora aiho a'ini bara karera, bira nii baaintiti tara kekau atae ora aiho barakeba? Bi okarara rama nii rairebabe. ²⁸ Aii'a tee Nora Kotira Aiho ata ora aiho barakarera, Bira Kotira kindomu bano nii hampata ma baibo. ²⁹ Bira nantia keroe muara bainti bano kempuka bainti nabu'i ori'etero bibi haikara barano? Biba kempuka bainti ai'u kau'u rumpa tero ma bibi haikara barano. ³⁰ Aii'a bainti bobano kia tikantiro bairera, bira biba tii nabuta bano be,aii'a bainti bobano kia tinabu hampata barera, biba bira tinihairo niarai ama biro. ³¹ Bira nii tiba nimuro nee kumie minti o Kotirarae ora uba ti, aii ba'u haika bi'uma amitano ira Kia Rupintira Aiho Baintiara tina ho kia bi'u amitano. ³² Tabae Bainti Baaintiara ora uba tinara, bira ba'u haika bi'uma amitano, ibo bainti bobano Kia Rupintira Aiho Baintiara ora uba tiraba ho kia bira ba'u haika batai bata nantiara bata bi'u amitano. ³³ Ko'e katari bano ko'e taba ma riano. ora katari bano, ora taba ma irano. Bira taba bano ma nanti katarirae umi'ano. ³⁴ Nee ora memaru baainti'ti be.Bira nanti baimantae nee ora okara bata ko'e okara bata minti baria bo? Bainti bano ma minti irirahika nai arara ira pi'a biro baira bira tiba riarabe. ³⁵ Ko'e bainti bano nai arara ihairo ko'e hika obaribaira aii'a ora bainti bano nai arara ihairo ora hika abaribaira. ³⁶ Tere nii u'ai'ake tiba nimiro, nora kobano aniaina ata bainti nahenti eka uba kia ko'e ira tiba riara bira eka ma tiba kebabe. ³⁷ Nena uba ata ma, abu abu bainti abina, aii'a nena uba ata ma ora bainti abina. " ³⁸ Bira nantiara lo irirahika bataka bata Farisi bata Ihura tiba amiha, "Tisabauboo, aii'ata bo hika obari'e tabarebe." ³⁹ Ihuba bika tiba nibiharo, "Nee ora aiho bata pamuku okara bainti nahenti nana bohaika tabarekae. Ibo, kia ma bo haika nini obariano aii'a bira nana hika Poropeti Jonara enta obarira nee bira ma taba tabo. ⁴⁰ Boha arakero Jonaba nora habuka arara ira tarau bohau enta ibata atitaira bata baitaira, boha arakero ma Bainti Baainti bano bata'ira tarau bohau enta ibata atitaira abata barianaro. ⁴¹ Kobano anina entara Ninibe batana bata bi entara hina bainti nahenti ma ko'ata himpiba. Bika Jonara tababo uba timanta bika arara tu'antara rama. Ibaro, bainti bobano Jonara bata abe'akero baiba ma ma'ata baibo. ⁴² Kuari abu urinai hai na Nahenti bano ma ko'ata uri hipuano bientara hina bainti nahenti batakero. Biba baata tai'ai nai hairo Solomonira irirara irireba urira, aii'a taba, Bobano Solomonira bata abe'akero baiba ma'ata baibo. ⁴³ Ora aiho bano bainti bora ihairo aitarero, ahara batana biro oru bariai narara rantero, ibo kia bo batuka bariai na baibo. ⁴⁴ Biba tiharo, 'Tere anirante buaina be bakai haina nabu'i.' Aii'a biba anirante biro, biba tabaibo nabu bira rupike ko'eke abu abu ake batabo. ⁴⁵ Biba anirantero oru sebeninabu aiho bira bata atarake orai'iha bariaka tintakero, ani bainti bira'ira baura. Nantiara bainti bira okara bano kiama boha ariano anoba ma orai ianaro. Biba boha'ara keroba ora okara minti bariaka nana rama buano." ⁴⁶ Ihuba a'ii oora bainti nahenti batakero uba tibaibo, Ihura noba bira atabakauka hampata ani baha'a himpi, bira batake uba tireka. ⁴⁷ Bobano Ihura tiba amiharo, "Tabane, aii noba aii atabakauka hampata aii ranta bare ma ani baha'a himpuabo. Aii bata uba tirekabe. " ⁴⁸ Ibo Ihuba bira tiba amiharo, "Taukae tii noka tee atabakauka be?" ⁴⁹ Ihuba nai kau'u bara buru bikero nai kai'a bainti kubai kero tiharo, "Tabate, mauka bika tii noka bara tii atabakauka bara ma ma'a bariabo! ⁵⁰ Tau bainti nahenti kae tii Ora narubai baira antu'a abataka, bika baireka ma tii nora tii aura atabakauka bara bariabo."