¹ Tenabu bika ke, tenabu sipi bare nora tauni Kos ni bii. Aii'a bira arara nora tauni Rodes ni bii. Bira'ihai nora tauni Patara bii. ² Bira ihai bo sipi Foinisia buiana rantake, bira ira barire bii. ³ Tenabu ailan Saiprus tabauro niarai imanta, tenabu kau'u tanarai tu'anta bare nora tauni Taia bii, bira nanarae sipi ira bariaka hiniki onanara bara mini kareka. ⁴ Bira natiara, hinikia disaiporuka rantake, mini 7nabu enta baite. Bii disaiporuka Porura tiba ami tiha Kotira Kempuka Aiho Bainti bano tiharo Poruba kia Jerusalemini buaire. ⁵ Mini bariaina entaba tai'ai manta, tenabu bii batukara ke biha tai'e bire una arana, baainti nahentiara batake nora tauni tute. Wesani hantara tenabu muntu tori kauru are, nunamuti. ⁶ Tenabu nariara nariara nena-nenabeti. Bira nantiara tenabu sipi ira bariraura bika nai nabuni buara. ⁷ Tenabu tentanabu kantara Taia hai ani Tolesmais ni ani. Tenabu mini baria ata-bakauka ko'erabe tibanimite boha enta bikarahampata bai. ⁸ Bira arara bii batukara ke bo tauni Sisaria bii. Filipira nabu ira orubi, biba Kotira uba tibai baintiba, biba nira 7nabu ihairo kubaitaba, tenabu bira batake bai. ⁹ Bainti biba 4nabu barata bataimanta bika porofeti uba tiha bika kia bainti hampata baitaka. ¹⁰ Tenabu a'i mini hiniki entara bauro, profet bo bira autu Agabusba Judiaro tubiro. ¹¹ Biba tinabuni tubiro Porura leti barakero. Biba leti bira barakero nai ai'u-kau'u rumpe-tero tiharo, "Kempuka Aiho Bainti bano minti tiba kero tibo, 'Juda batana Jerusalemini bariaka ma letira bira ora rumpake bira bara hinikiaka kau'u irama bateba." ¹² Tenabu bihaikarara ira, tenabu batake bainti nahenti bira'ira bariaka kekauke Porurara kia Jerusalemini orubuaire ti. ¹³ Ibo Poruba tiharo, "Nee nanahika'e mintiabo, nee tii muntuka rapeke iamanta i'iratauna? U'a turo, tee heno'uro bika tii rumperara bata aii'a heno'uro Jerusalemini Nora Ihura autu ata utuaina." ¹⁴ Ibo Poruba kia antu ariro tenabu bira raba'aburo, minti manta tenabu kia bira aii'a ire tiha, "Kaibo Nora antu'abano obariaire." ¹⁵ Hiniki entaba aitarai manta, tenabu tentanabu minta hika bare-bare Jerusalemini oture. ¹⁶ Sisarea batana disaiporu bata tinabu hampata bii. Saiprus bainti bo bata bika bitake, bira autu Nason ra, haru disaiporu bainti, tinabu batakero aniro bira batake bariatera. ¹⁷ Jerusalemini anire, ata-bakauka binihainaka wahara uba ti ko'e bikoka batake tinabu bite ori etara. ¹⁸ Bo enta Poruba tinabu hampata biharo Jems ra tabareba, aii'a eka nobainti bata mini ai bariabo. ¹⁹ Biba bika wahara uba tiba nimitero bira nantiara boha hika boha hika Kotiba bobatana abutana mintira kai'a bare baibo. ²⁰ Bika bii ubara iri, bika Kotira autu bara bini'i,bira tiba amiha tiha, "Are ata-bakauka tabane, bika nantuma tauseni bainti nahenti mara ura utuaka Juda batana abutana bariara. Eka bika a'i'ma Mosesira lo abatareka kekau iabo. ²¹ Hinikiaka aibantarai tiha, are Juda batana tiba nimi bariarao taukae boka batake bariaka bika kia Mosesira lo abatatera, aii'a bika tiha are bikara kia orainti baainti nati baata to'ate, aii'a kia harua na'u tatoka okara abtate. ²² Tenabu nanti'e iainabe? Bika are maini aninara irira. ²³ Mintira are tenabu nanahikara tiaina bira mintiane. Tenabu bainti 4nabuma batauro bika abu-abu uba tibataka. ²⁴ Bainti 4binabuka are bitakera nena batake nenta bara Nora abu ata hi'ake aii'a are kahi to'ara ko'ai akera kahi eka to'akane. Mintia are kaira, bainti nahenti tabebama bika nanahika ai tiba amiara bira una'arabe. Bika bira atahima tabeba are bata lo abate bariarababe. ²⁵ Ibaro bira hinikiaka taukae Ihura ata mara'urai iaka, tenabu ara arantubake bika tiba nimi bika nanahika barake mintiha una'ara kotira mono ibariara, bihaikara kia barake mintiate. Kia nare nate, aii'a wara aunta tuantarakabo utubinara nate, kia pamuku okara bata mintiate." ²⁶ Bira nantiara Poruba bainti 4nabu tinta kero, bo enta, biba bikarahampata nai bara hi'ake bika mono nabu'ira buara, bika nai nantuma enta nai bara hi'ara tiba'i biha bika eka opa bo auti abu-abu abuara. ²⁷ Aumantaka 7nabu enta tai'areba ibo, bainti hinikiaka Juda Esia Provins ihai, Porura tababo mono nabu ira baibanta, bika bainti nahenti bira'ata ruba uabi bariaka arara tiba ubike Porura ata kau'u batara. ²⁸ Eka bika naberai tiha, "Isreal bainti nahenti be, tinabu kaha iate. Bainti ma biba tabae eka tinabu bainti nahenti eka batana nanahika kia abu abu irara tiba nimi baibo, Mosesira lo bata ma batukarara bata. Biba Grik batana kia Juda tinabu batana tinta kero mono nabu ira uri'eteharo bara orai'ibo. ²⁹ Bika tiha, bira nanarae naru Trofimus ra tabe, Efesus nora tauni Jerusalem mini Porura batake, bika Poruba bitakero uri etaibo ti iriara. ³⁰ Eka bainti nahenti nora tauni ihai rabukubi kante oru Porura tatau wata bare. Mono nabu ihai rarau bebake, totara enta tintake. ³¹ Bira arireka iabo, uba bano soldia raikirara ata bibo iriro eka Jerusalem bainti nahenti nora mara obarakabo. ³² Biba totara bata soldia bata bika raikirauka bata, bika kante bainti nahenti ruba uara ata tubi. Bainti nahenti bika soldia bata bika raikirauka tabe, bika kia Porura ari. ³³ Bira nantiara raikira bainti bano Porura oru watero soldia timanta seni nohai Porura rumpaki. Biba Porura irero are tabae aii'a nanahikae mintia karao. ³⁴ Bainti nahenti ruba uatana hiro bobano bo uba tiba kaibo bobano bo uba tibake. Airu nora aubai mintiha uba tiha iabo soldia raikira bainti bano kia kanko kero bika nanarae tiara iriro. Mintibo biba kekau kero soldia timanta Porura bitabare nai tubika'i nabu baira'i buruke. ³⁵ Poruba bira ata uriro nabu rata ata oru bimanta, soldia bira rabuku bare, bira nanarae bainti nahenti bira arireka. ³⁶ Airu bainti nahenti a'ii bira abata'i. Bika naberai tiha, "Ma ata bara bebakate!" ³⁷ Soldia Porura raikirara tubika'i bita berake, Poruba nora raikirara tiba amiro, "Hoe boha hikau tiba amirabe?" raikiraba tiharo, "Grik uba are irietarao?" ³⁸ Are aira Isip bainti banoma ina i'oka gabanira batakero batero 4000 bainti tinta barero umina batana bira?" ³⁹ Aii'a Poruba tiharo, "Tee Juda bainti, Tarsus nora tauni Silisia ira. Tee bata-okara bainti bo'ara bo nora tauni ira bauna. Aii irauro, kai'e ma bainti nahentika hampata uba tiare." ⁴⁰ Raikira bainti bano hobe uba tinabe tibo, Poruba kau'u bara burubi bini kero bainti nahenti uba e'ai'e tiare tiro. Eka bainti nahenti ebara bariabo, biba Hibru uba ihairo tiharo,