¹ Teni puga waini yani wanami ten Tifoi anayo afom wemino. ² Weni tenkinke agan iye irenin ayamaruc yomanani acnemino. Weni agan irenin ayayamaruckaci titoc ayanuc afisarami amucno agami iremino. ³ Igemi wayani tiyimeguna andakaci ikeni aci anteckamino. ⁴ Tenkim wanakaci teni enkim wano. Waini ayami yasac iye wemi agami iyewaci iremino, micnimugemifo, eni tenkim wewaci agami irano. ⁵ Teni waini yani wanaci ikeni ayanuci wamino. Iyeci tenkim wagaci teni wenkimi wegafu, weni amucna agami irantemifo, temi iye dukei agami iyewaci iranonamino. ⁶ afo igeni tenkin iyewac wege, acyan yay ayanuckeken yureni igafimi karucdaci igan kanagomino. ⁷ afo eya tenkim wanana ten tiwayani enkim wanawe, ne andandawaraci indintefono, mini andanda ampamiric manan intemino. ⁸ Eni tentic disaiporouc wamifo, agan irananaci ten Tifo anom wic marano. ⁹ Ten Tifo temi ayewaci teni igemaci tiyecumpo, igeni tentic ayintinaci wago. ¹⁰ Teni ten Tifon awayani awakureci wenic ayintimi weguna amankaci igeni ten tiwayani awakureci tentic ayintimi wanagomino. ¹¹ Mana andandaukani tegunai, tentic timoyini igenkimi wemi igenyic yimoyini amankafic ugantemino. ¹² Ten tiwayani wenimi, teni emi ayegunac urewaci ena ayeno. ¹³ Maya weni macnuren iyena awacwac iyen dukemi, wen agonawani iyem pugintemino. ¹⁴ Igemi tiyimeguna andandauc uwandeci ten tigonuyuc wanagomino. ¹⁵ Igenani yogar intauge tirec iyewaci yiwic dantecumpe, yogar intai wenic dafisin neci uwarenafi, iyewaci indigemino. Teni igenani tigonuyugen tireci yiwic decumpe, umacden andandauci ten Tifon tici indegunauci, igemi tiyimunaci indamino. ¹⁶ Igeya temi ugaganaino, igeni wega pa wanana wam agan iragowani teni igemi ugagecumpe. Micnimugami igeni ne anecnewaraci ten Tifon awitimi indaintegafe, yimiric manan intemino. ¹⁷ Enawaci ayenowani mini andandaugani tiyimecumpe. ¹⁸ Magagackenu igen yifogeni, tenaren yifoganayonic mureni igemaci yifogantenofo, miniwaci indeko. ¹⁹ Eni magagackeno wananani, magagackenuni yenyinda onaric mureni ayintenono. Eni magagackeno wano wara emi ugagegauno, micnimugani magagackenuni emi yifonkantenono. 20Wayani igemi tiyimegunawaci omarec indeko, ‘Yogar inta weni wenic dafisini iyewaci yeankagemino.’ Yeni tem mandaic usinkeni, igemaci mandaic uyinkantenono. afo ten tiwaya indire awakureni, igeni tinagom wayayawaci indireni awakurintenone. ²¹ Ten tiwitimi mini andandauc uwanyinkantenono, newarafino temi iyeci tisinkenafino yeni iyewaci indikenono. ²² Iyewac tiyimiranani manda andauc iyen dukactifo, mage yenyic manda andauc ayofanayon ani iyewaci dukenono. ²³ Iyeci temi afogenafi ten Tifomaci afokemino. ²⁴ Mayawac yenarosirem mararic iyeugananin yogani teya iye mandanani, manda andauc iyen dukactino. afo yeni mage oneni ten namac ten Tifon namaci yifogenono. ²⁵ Payanugami temi yifogeyon tireni yenyic logimi tareyomi afotaficintemino. ²⁶ Yofaini ten Tifompaten tankanami yintemino, weni puga wayayic Aumi wemi ten Tifompaten yeremi tenani timani pacwan intemino. ²⁷ Igeni kugarantapate tenamaci weci igeyandawaci tenani timani pacwan inagomino.