¹ Ecanan en arac umaric iyewac ino. Koctinkin andum munkewe, tenkimakaci andum munkono. ² Ten Tifon amackimi amucno rumum wemino, afo micni iyeukanake iyewaci tamuctino. Micnimukaci enic makuy anufarani ureko. ³ Afo mini makuy uman anufareci umwaekeci kun yiwikanaci teni wanuna makusaci temaci umbanakomino. ⁴ Make wekuna ani ikeni onankamino. ⁵ Tomasi Jisasinani macnin temino, "Iyeno eni weona ani iyen onec iyen indikeko, inkecniurekaci ani onanuno?" ⁶ Jisasi macinin tiremi tamemi, "Teni ani weci, teni puka wayani, ayum pawam wani wecumpe. Tenkinkac manam winonamino. ⁷ Afo ten tonaic ewe, ten tifomaci onaic minonamino makekackem wemi onaicure indanamino." ⁸ Filipi Jisasinani macnin temi, "Iyeno, mayau tifon yotikanaci amankafic ino." ⁹ Jisasi yewekem macnin tiren tamemi, "Teni enamac makac iyakakukami wacumpe, eni temi anufare tonaic iyemonamino, Filipi? Iyeci temi tonefe, ten Tifomi onanonami. ¹⁰ En anduni munkec wefe, teni ten Tifonkim wanami weni tenkim wemi, wayani ikemi tiyi mekunai tentic eran takewaino, ten Tifon tenkimi wem wenic yokam maremi. ¹¹ Andurac munkono, teni ten Tifonkim wanami weni Tenkimi wemi, yokani afotafic eninkakaci andum munkono. ¹² Puka ukami tameko, iyec tenkin andum munkintefe, eyaukami teni marekuna yokani maranonami, ten Tifo wapaci urontecumpo, eni temaci yesankare anon yokarukami maranonami. ¹³ Newarac tenkac inda intefe, teni uranami ten Tifo tenkinkac anom wic marantemi. ¹⁴ Newarac ten tiwickin inda intefe, ,teni iric manan ontecu. ¹⁵ Ten tiyi karac ewe, tentic ake wayayuci weninukaci awakurono. ¹⁶ Ten Tifompac inantenami ena dafisim wainta danami iken namaci kumban temino. ¹⁷ Puka Acyun Aune, mapatena iniya waintauc iyem marantenono, newarafi iyewaci wemi one indicukeno, ikeni wemi indeci onankamino. Weni en namac wemi enkimi wantemino. ¹⁸ Emi yere ankana eyagac iyem wanonamino, eni wanonafaci omwegeci yentecumpe. ¹⁹ Wagac yafomi magakackena iniya waintauc iyewac tonantenofo, igeni tonanakomino. Newarafi teni ayumi pani wanaci igeyandawaci pani wanagomino. ²⁰ Mini nurami ten tifon namac wanami indic inonamino, micnugaci ikeni tenkimi waci, teni igenkimi wecumpe. ²¹ Iyeci Mosesinic Lo dukenaci awakurenafi weni temi ayemino. Temi ayewananimi ten Tifo wemi ayintemino. Teyandawaci wemi ayireci teyani wenkaci afotafic ontecumpe.” ²² Judasi weni Iskariotiwa wenai, weni Jisasinan temi, “Iyeno eni naceci enuy yukankac iyewac afotafic eci mayau tukankac afotafic intefono?” ²³ Jisasi yewekemi tamemi, “Iyeci temi ayenafino, weni ten tiwayani packarukemino. Ten Tifo wemi ayintemino. afo wende kanda wenkimi yereci wen namaci mayau timaci uwarantecumpe. ²⁴ Iyeci temi iyewac ayenafi, weni ten tiwayani iyewaci packarukemino. Wayani indeona tempatewaino, ten Tifo temi tisinkeni wempateino. ²⁵ Teni iken namaci wekunakaci mana andandauc tiyimecunkumpe. ²⁶ Afo yofaini Acyun Aumi ten Tifo ten tiwitimi tankananiwe, weni awakurokowani tiyimiremi umacden andandaukani tiyimekunaukani ikenyic indiruci kumanani ukuka yinkantemino. ²⁷ Ikemi tentic nanayini yimecumpe. Makakackenuni yimeyon amankaka yimekauno. Iken yinduntimi umaric iye ekaci iyewac pekago. ²⁸ Macnin teguna ikeni indekomino, ‘Teni wecumpo ikeni wangopaci owkeci yentecumpe,' tecmokunamino. Eya ten ayewanawe, eni amoninonamino, newarafi teni ten Tifo wapaci wecumpe, weni temac tiruremi anonicukemino. ²⁹ Nanayukemi ampaminanici ikemi maken tiyimecumpe, afo mini ampaminaci ikeni yinduni munkinakomino. ³⁰ Iyewaci iken namac iyakac weci tentecumpe. Mana makaic dafisini yemwemifo, weni erani iyen dukemi temi iyewaci dacdantemino. ³¹ Afo makakackenuni ten Tifomi ayekunawani indintenono, afo teni ten tifon teninukami uwarantecumpe. Ukukec mareyic makake wono.