¹ Afo mage nevec sentecyara funo? Amanac kumic anda mana uwarec ya bananaci beni mayau nanan agun anecne marem mana bantennafi? ² Iyevac mana ino. Yeunamac i fugam bainta kacnac i ugeyaramumpe, ingkecnic ureyarac i mini kumic anda kim bantecyarafu? ³ Yeunamac i Krais Jisasi namac agacec yarami nomi marec yaramumpe, mini avucavac foni Kraisinic fugintim umacde maro ofegec yaramumpe. Yigeni mini vam oimarec iye indegac? ⁴ Nom maran avucavac foni Kraisi namac fucosuanami matikim masic enone. Afo beyic anon eran foni ben Afo Kraisim matikinge mandan ukukemino. Micnuranac yami yeunamac bac oyam aum maratec yamu. ⁵ Yeunamac Kraisi namac agac ecyarami bena fuginic ecyarami fugeyamumpe. Manac mana ugemino benamac agac ecyarami yevegec fugintinke ukukantec yamumpe bena yevegem ukukanic urecyam. ⁶ Yeunamac i indinkec yamumpe, feyankena avucavac i ac i Kraisi namac maripo sasac i fukemino, micnugami manda anda mayau sinduntim ma eran yogaric evami yomandani kipantemi. Micnugacyami kumic andaic yogam baintac iyen onteyamu. ⁷ Nevaraino, iyen bainta fi benic manda andauc ma fukanane beni manda anda gim iyen agackantem. ⁸ Afo yeunamac ac i Kraisi namac fugeyamumpe, micnugac yami yeunamac i erar indiric ugami ecyamumpe, iyevac kipan aumi benamaci maranteyamumpe. ⁹ Yeunamac indinkec yamumpe, Kraisi ac i matikinge ukukemino, yevegem iyen fugintemino. Fugini bemma mandan magapac davac inanim erar iyen dukemi. ¹⁰ Ac i mana yac mana fugemino, mini avucavac foni fugin andaic erar mandan nonic emi. Afo mage iye kipam aumi dukemino, mage fanana ban bantimi Kocti manac bemino. ¹¹ Yige yacbac manac ugam indin mana vac i marago, yige yacbac i aci fuc eci kumic andaic eran kukusim iyen bamino, iyeino. Yigeni Krais Jisasi kim agac eci Kocti namac iyevac kipam bantim banagomi. ¹² Manda anda ecam yigen yo bunan kac iyevac dafisino, mana yo bunami fugevam yo bunami bemi, micnagem kumic anda mano yicnom mandan anana uranaga mana yo buanic manda ayin avakurivec. ¹³ Yigen yigan yiyankac kumic anda mano iyevac dafisi kumic anda uwarafo. Yigeni fukauna matiginke ma ukukagena fa bau kacnac i ugami, micnugemifo yigen yindun nac Koctin amicdegac antecgam avucavac uwaragi. ¹⁴ Kumic anada mano yigen yinduntac iyenoc urem yigenic bantac iyen davisintem. Nevaraino, yigeni mage loic dafisintaga banaino, Koctinic agun anecne gimi bamino. ¹⁵ Loic dafisintim iyen becyaramumpe, afo ingkenigac ontecyarafu? Mage Koctina agun anecne gimi becyaramumpe, micnugac yami amankac i kumic andauc uwarantec yamumpe? Iyevac manaino. ¹⁶ Yigeni iyen indigamino, yigena mana bainta ma yirac amicde ma bema avakurege, afo benic yogam baintac i inagomino. Fugaugane yigena kumic andaic yogam baintac ma ege, mini anda mano yigemi yiruman fugintem. Afo yigena Koctin avaya indirec ma avakurecge yigeni antegam ininacbasic inagomi. ¹⁷ Fugave, feni yigeni kumuc andaic yogam bainta bagegomino, afo icnami Kocti yivicmam bey avaya kim dac i mini bayani fuga sirec avakuromino. Mini vam Kocti nan susu sesuano. ¹⁸ Yigeni kumic andaic dumin bainta gacnac i bagegomino, afo Kocti beni yivic demi mandan antegam avucavac gic yogam baintac emino. ¹⁹ Seni begam baya ginke mini avucavac guc ma onec uwaranani secgo, nevaraino yigeyic indiruc i kapanagac i sena sevauna baya yuc i agankarec iyen indamino. Feni yigeni yige yo bunam ecami manda andaic yogam baintac ugagem, afo yigeni anom manda anda uwaragegomino. Afo mage ecanac i yigen yo bunami antegam avucavac gic yogam baintac i, micnurec i Koctinic anasi bantac eci antekam ininacbasic inagom. ²⁰ Yigena kumic andaic yogam bainta ma bege, antegam avucavac gic yogam bainta iye banagomno. ²¹ Afo ne avoguc anecne maregafe mini avucavac gucma fena uwaragegom, mini avucavac guc kacmana mage yiyorimi maramino. Mini avucavac kuc mano banta aruman fugemino. ²² Micnugami Kocti yigemi aci kumic andaic kukusingke yivigemino, afo micnuremi yigemi mandan beyic yogam baintac emi. Micnuranac i bengkinke avoguc anecne maranagomino. Mini ayacini iye kipan aumi maranagomino. ²³ Kumic anda ma beyic yogam baintauc ma meyam yimevami fugin nanaino. Afo Kocti ma fayugam yimevam meyani, iyevac kipan aum fanana ban aum. Mini aum ma marasuana i Krais Jisasi mayausi Iyeno ma yogam maran fo.