¹ Koctin ogankac ma yeunamac ma sonac mam antegauc ane, mini i mayauna Koctin kim sindun dec ma benan indigarac in avucavac foni. Afo micnugami mayausic Iyeno Jisas Kraisi yeunamac Koctin kac mandan mana yirakac yinkemi. ² Mayauna sindun bengkim dec ma benan indigarac in avucavac foni Krais ani disinganac yami Koctinic agun anecne kim undec yami bantecyamu. Afo Kocti siviganovani dafisasuanami sivicdac yami benamac Inarum magusac avoguc kac umbantec yamu, mini avucavac mano mayauni amusin anecne simintem. ³ Minivanana simoy iye osuano, umana mayausac bac yinani nandac bagac simoyosuano, navaraino umaruc mano mayau ma Koctin kim ugorasuana avucavac mandan erar usingkantem. ⁴ Umantima ugukaman erar ege afo umaruc ma yinanine amagac mana yomandan fasac dantecyamu, mini avoguc avucavac foni mayauni mandan erar usingkanac i Koctin kac dafisanami ovegem sivigantem. ⁵ Koctinic ofaim kac ma dafisasuanave, faya davisec yaraune, iye ino. Nevaraino aci Kocti beyic Ayo Inta mayausim dukemino, beni banta avabac in avucavac mayau sirakac mandan anonic urem dantemino. ⁶ Mini yamuckima mayau seyarana sofaonuna eran na iye dukausuanami, Kocti mana nuram ugacdemi Kraisim dam kum fuc emi mayausic mandan anda kingke ovegem sivigemi. ⁷ Fugaugane amangkac manacbayi antecgam bainta vare sirem iyen fugintem. Afo igkecnivafi inane amangkac i mana bayi be yarac mandan erar urukemi avoguc banta bam fugintem. ⁸ Fanana yeunamac kumic anda uwarasuanami Kraisi yofairam mayausic kumic anda kac kum pugemi. Mini avucavac foni Kocti mayau nana ayigarac evam avacbac i yotivigem. ⁹ Anon anecne ugane, Kraisi ma kum fucima benic nare ma mayausic kumic anda ma sesecim foni Koctinic aran anecne kumic andau uwaran inni acbasi gac ma dananim arani yesankantec yamu. ¹⁰ Yeunamac fa Koctinic namugoc ugasuanami, Koctin aga Kraisi kum fuc emi mini namugo avucavac yomandan fasac demi yeunamac mandan Koctin namac mana aracka demi. Afo Kocti namac ma mana yiracka basuanave omarec yam indesuano, Krasinic ban toni Kocti mayau owegem sivigemi. ¹¹ Mana avucavac mana baino, mayausi Iyeno Jisas Kraisi, yeunamac mandan Koctin kac mana arac dacyami mage Koctinan simusin anecne marec yamupe. ¹² Indigec yamumpe, mana bainta mano kumic anda uwandami, mini kumic anda uwaran foni manda anda mana magagac facbaremino. Afo mini manda anda mano fugini marenyemi. Afo fugin nano masicden inin bainta kinic emi, nevaraino masicden inin bainta mano kumic anda uwarenone. ¹³ Lo iye facbarugami manda anda mini yamuc kimi bani bagem. Afo lo ma iye bagene, Kocti mana mana kumic anda ma anasi banta ma uwaran nani omaren iye indirarimmi. ¹⁴ Afo Adamin kake kugandem Mosesin kac ma yigami, fugin nano masicden inin acbasi mandan magapac i devami. Manaca inin bainta Adami ma baya aruren iye indin anda gacnac gac uware yaune, iyeino. Afo fugin nano micnugam inin baintauc bac i mandan magapac demino. Adami icnaim ma yinanim bainta kanac i ugagem. ¹⁵ Afo Adaminic kumi anda vaga Koctinic agun anecne manaigac ugagenaino, iyeino. Manac bayinic kumic anda mano fugini umacdeugac facbaremi. Anonic ugam ma enimi, Kocti beyic agun necne fona manac bayim, Jisas Kraisim ma mayau simenim. Benic agunn anecne foni Kocti mayauni mandan antegan inin abasic em. ¹⁶ Micnugami, Koctinic amin avucavac bac mana bainta nic kumic anda mano mayausac i manacugam avucavac gac facbarenaino, iyeino. Mana baintanic kumic anda gac i Kocti masicden inin acbasi koc yimic dem macni siyingkem, umacdem mano anon umantimi banakomino. Afo Koctinic amin avucavac ge manic mugemino, anasi banta ma fa amucna kumic anda uwarami Kocti avacbac uyinkaremi yenani antegam inin bainta ve semin. ¹⁷ Mana bainta mano a arurem baya iye indimi mini baintanic kumic anda gac i fugin nano mana magagac iyenoc emi masicdem inin bainta mandan magaginic emi. Micnugami iyefi Koctinic agun anecne ma maraniyinani Kocti yenani anteckan ininbaintave sintemi, yeni iye kipam yaun mandeni iyeno intenone, mini meyami mana bainta mano ma manden yocdan kac i. Mini bainta i Jisas Kraisi i. ¹⁸ Micnugami mana bainta mano Koctinic age baya ugadarami mini kumic anda kac i Kocti umacdem inin acbasi koc yimintem. Micnugam mano mana bainta mano antekam avucavac uwandami, Kocti mini avoguc avucavac kan omarem indiremi mayau masic de nani antekam inin acbasi ve semi. ¹⁹ Mana bainta mano a arurem baya iye indimi mini avucavac mano masicdem inin acbasi mandan kumic anda uwaran inin acbasi emi. Micnugemifo mana bainta mano baya indirem baya avakundami mini avucavac kac i masicdem inin acbasi antekam inin acbasic intenone. ²⁰ Age baya ma anasi banta mandeni, mini age baya iye avagurenone. Mini avucavac foni anasi bantayic kumic anda anonic ugami emino. Micni ma omi Koctinic agun anecne yenkac bac i maro anonic ugami emi. ²¹ Mana avucavac facbrin foni kumic anda mano fukini mandan iyenac em. Micnugemifoi mageve Koctinic agun anecne anonic ugemi, mayausic Iyeno Jisas Kraisinic yogam po Kocti mayau agun anecne usingaremi antegam inin acbasive sisinkanac yami iye kipam aum, banana aum marantecyam.