¹ Abrahami beni mayau kacnac ugemi, beni mana magagac mayau sinac-u bemi. Micnugemifo, benani navec sentecyarafu ? ² Afo fuga siremma Abrahami antekam avucavac ma uwandanam ma mini avucavac manoma bemma mandan antekam baintac ene, afo amagkac bey avic maren urintemifo Koctin ogankac mini avucavac fo bemi mandan antekam baintac iyen intem. ³ Nevec Koctin avaya kim sigenafi? "Abrahami Koctin kimi indigarac evami Kocti benani antegarac ugam bainta ven semi." ⁴ Banta ma yogam yocdem meyam marevane, mini andanda fa maran avucavac ga ino. Iyeino. Yogam yocde ma maragkac ino. ⁵ Afo iyefi bena yogam iye marem ma Koctinan beyanduntinke indigarac ema Kocti nana kumi anda uware yoyic kumic i yomandan acnintemino sire indigarac inami Kocti enani antekam bainta ve sintem. ⁶ Deviti vaci macni semi, iyeuyafi Koctin ogankac ma anteckauni avoguc avucavac uware yafo iyec uware yafo yeni avoguc kac beni yimoyin tenone. ⁷ Deviti macni vac i semi, yimoyin tenone iyeyaufi Kocti ma yenyic manda anda eca yigkarem ma yenyic kumic anda ma yomandan fasac dananim baintauc. ⁸ Afo iyen inin bainta nic kumic anda ma Kocti yomandan fasac ma dananive yeni avoguc kac beni yimoyin tenone." ⁹ Yo akagam baintauc manac avoguc kac beyac yimoyin teyafo, yo iye akagam baintauc bagafi? Bani macni secyamumpe, "Arahami Koctinan omarem indigarac emma bem avagurin avucavac foni Kocti benani antegam bainta ve semi." ¹⁰ Abrahami nebarigac uganac i Kocti benani antekam banteve senafi? Abrahami be yo akecyaru kanafi, iye agecyarukam? Be yo iye akecyarukami Kocti benani antegam bainta ve semi. ¹¹ Abrahami o iye akarukemi Koctin kac andun dunkuremi Kocti nan indigarec imi Kocti benani antegam bainta ve semi. Micnugami Abrahami masicde yo iye akarukena Koctin kimma yindun dunkure na Kocti nan indigarac hau yifom bemi. Afo mini avucavac foni Kocti yenani antekan ininacbasi uge sintem. ¹² Abrahami manac a yo iye akagau yifo vac i bemi, mini i fana yo akarugau yaraino. Iyeino, yo akarena mayau sinacu Arahaminic avucavac ma avakun dena Koctin kac yindun dunkure na indigarac im,mini i Arahami ma o iye akaruke ma uwaram avucavac ino. ¹³ Feyugami Kocti Abrahamim bac ben agingkunuc umacdem mana maga yimirani semi. Afo Abrahami lo avakurin foya Kocti minic sena ino. Iyeino, Koctin ma anteckam avucavac fona ugorenim fo. ¹⁴ Afo iyen ininacbasiu gacfi lo avakurau nana masicde andandauc lo manoma mandan yimene, afo Koctin nan ugore omare inidigarac in avucavac i fayar anecne mintem. Kocti ma siru kam baya vac i maro oyogantem. ¹⁵ Lo ma bananna banta anasi ma iye avakuromi umami yimemi. Afo lo ma iye banane, banta anasi lo ugacdenone iye sentecyamu. ¹⁶ Arahami Kocti nan indigaracin avucavac foni Kocti Abrahami bac ben anavasim mana baya yiyimemi beyic agun anecne kim, moc mini andadauc i lo ma avakurau yinda manavaino. Iyeino. Masicden inin bainta Abrahami kacnac ma Kocti nan indigarac auyacbac i mini andandauc marantenone. Abrahami beni umacde mayau sinacu bemino, ¹⁷ Koctinic yo kimma sigangac i sigem, "Seni emi mandan masicden ininacbasiuc yifo ecumpe." Abrahami Koctin ogankac i bagem beni beyandum Koctin kac dungkuru kagemmi, mini i oyam yaum iyeuyafo fukau yimicdem, iyevam andandauc yevegem mandan devam Kocti. ¹⁸ Masicden anecne ma Kocti uwararan sirukage nimi, Abrahami mini vam erarurem omarem indigrac emi Koctin kac davisevami. Mini avucavac foni beni amucna innin baintauc yifoc emi, Kocti ma sirukagenin gagic emi. En anavasiuni amucnac eni umacden mana maga uwikantenone, sirem Kocti samemino. ¹⁹ Afo mini yamuc i Abrahami mana handreti orandec ukagem. Micnugami beyaram omarerm indemi semi, seni amagkac erarurec an iye magantec umpen semi. Ben anac Sera vac ayogum kagem amagkac am magaric iyen ugagem. Micnugemifo Abrahami Koctin kim omarem indigarac em ugorin avucavac i erar ugami ugagem. ²⁰ Kocti mini andandauc uwararan sirukami, Abrahami mini vam kar indiric iye em Koctin kim indigarac urem ugorin avucavac iyen ecem. Iyeino, Koctin kim indigarac urem ugorin avucavac mano bemi mandan erar uangkami Koctin avic mandan yanic emi. ²¹ Afo Abrahami beni omarem indigagem mino, Kocti ma sirugagenim baya i beni uwararic mana intem. ²² Micnugami Kocti mini avucavac guc onemi Abrahami nan antekarac ugam bainta ve semino. ²³ Mana baya i Koctinic yo kimi agantemi, Kocti benana antekam bainta vema sirukane, Abrahamin nandem manavara sirugena ino. Iyeino. ²⁴ Yeunamac kandem bagani sirukemi. Yeunamac bacma Kocti nandecmac indigarac urecma ugorege, afo Kocti Jisasi mayausic iyeno fukintinke mandan ukukemi. ²⁵ Bemi avicmam namugo-uc yiyagkim denone mayausic kumic andagac fuginovam, micnurem mayausic kumic anda yomadam fasac daram. Afo Kocti Jisasim fugintinge mandan ukugaram mayaunan antegam ininacbasive siran.