¹ Yigeni iyec indirukega fono, sifactiva unano (nevararino, seni lo gin indin dukeyon inimbaintauci siyimego), lo banta gac dafitantemino bena ayum fa banane? ² Afo banta mantan inini lo agantimi bemino ben avafu fana ayum banane, afo ben avafu fuginami, bay ininabagic ugan lo ginke utufemino. ³ Afo, ben avafu ayum fana banama ena bainta namac sayen ovanami, benani monkoc ininen sintenone. Afo ben avafu fuginami, beni lo ginke utufemino, ena bainta namac sayen ovanani monkoc inine iyen sintenone. ⁴ Micnugemifo, sen sifactiva unano, yige yacbac lo gimi Kraisin o gimi dunkin yasac fukagegomino. Mana micnina Micninanimpo yige yacbac benkac agackago vanino, bena fugintinke ukukageninkage, micnonunafoni yigeunamac Koctin kin avoguc agan irantecumpe. ⁵ Afo yigeunamac mana magaic anda gim baunami, manda andaic ayiruc lo gimi ukukagemi, yigeunamac kim fugiric agan iranovani yogevamino. ⁶ Afo yigeunamac mage lo ginke utuci kecumpe. Yigeunamac lo gimi fakaman daci fukagecumpe. Micnugam poni amankac loic feyan anda fasapac deci, Ayo Intaci oyan anda gim yogantecumpe. ⁷ Nevec yigeunamac sentegafu? Lo i manda andac benafino? Amankac iye micnugemino. Lo iye bageninac, seni amankac manda anda iyen onararunaino. Nevaraino, seni ena inda anecneuc mararan iyen indirarunaino, afo lo semi, "Ena inda anecneuc mararan iyevac indeno," sirukam ponino. ⁸ Afo Mosesinic logimi ay uvicdemi macdem manda andaic ono vana siyenimi afotagic usinkemino. Nevaraino, lo iye vanami, manda anda fukemino. ⁹ Bani lo iyevac seni ayumi bagecumpe, afo Mosesinic lo yeraimi, manda anda yevegen aum maraci, afo seni fugecumpe. ¹⁰ Mosesinic lo fa van maren yemino sunami, baecdemi fugini semi mare simemino. ¹¹ Nevaraino, Mosesinic lo fo ay uvic inkaci manda anda semi makasemino. Mosesinic lo gimi semi siruman fugemino. ¹² Afo lo holi ic ugamino, Mosesinic lovac holi ic uem, antec kara uimi, afo avogugici ugemino. ¹³ Afo avoguc bam poyac, fugir ampan sinkenafino? Amankac iye ino. Afo manda anda ve, beni amankac avoguc anda gim manda anda ino siren yotigarare semifo, semi fugono vani ay ugic sinkemino. Mana mini i Mosesinic lo gim benkagic uinami, manda anda anon uvikaric inami amankac yandaric bac iyen intemino. ¹⁴ Nevaraino, yigeunamac indigecumpe lo i Ayo Inta gimi bemino, afo seni mana magagac anda gimi becumpe. Semi ayackaci fayan yogan baintaic manda anda agantimi dumuman demino. ¹⁵ Afo nec uvaregafu, seni anufarec indintim iyen marecumpeo. Afo nefi sena uvararan indeguna iyen uvarecumpe, nefi sema sifogenim, uvarecumpe. ¹⁶ Afo seni nefi iye uvarare seguna uvareci, lo namac mana indintaci becumpe, lo i avoguci bemino. ¹⁷ Afo mage uvareguna seya uvaregaune, manda anda senkim benin uvaremino. ¹⁸ Afo senkim benin indegunai, iye antekan anecneuci senkim bemino. Avogu gan siyenimi senkimi bemino, afo seni amankac iyen uvarantecumpe. ¹⁹ Avoguc uvarare seguna iyen uvarecumpe, manda anda iye uvarare sunan uvarecumpe. ²⁰ Afo sena iye uvarare suna uvareci seya uvaregaune, afo senkim manda anda benin uvaremino. ²¹ Seni onaunami, anon indin senkim benimi, avoguc uvararani siyemino, afo mage manda anda fuga sirem senkimi bemino. ²² Afo Koctinic lo gimi seni anon simusin anecne sindur inta ginke marecumpe. ²³ Afo ena andan sen sogim benimi onecumpe. Beni oyan anda sentic indintim ban namaci aruemino. Manda anda senkim benim poni fakarem dumuman dukemino. ²⁴ Seni iye antekam bainta becumpe! Iyec semi fugin buginke utuc sinkantenafino? ²⁵ Koctimi, Jisas Kraisi mayausic Iyenon kimi susu siankecumpe! Afo Koctinic lo seni indintinken avakurecumpe. Afo se sogimi manda anda avakurecumpe.