¹ Afo Jisasi yankagem bemi, beni mana onemi, bey anon arac kinke ogam futinkam bainta onemi. ² Benic disaiporiuc bemi indaeno, "Tisa o, iyeci manda anda uvandanaci mana bainta ben anon arac kin ogam futinkanac magenafino, mana baintafino haca ben ano afofino?" ³ Jisasi yemi yevegemi siyimemi, "Mana bainta vac ben anonuc ben afonuc ga manda anda iyen uvarenone, iyeino, minifoni ben kac Kotinic yogaruc amankac afotagic intemino. ⁴ Yigeunamac bena sisinkac yunic yogarugac marano kagageninkage, ayufun kanaci amankac iyen yoganagomino. ⁵ Sena mana magagac banunagaci, seni mana magaic omi becumpe." ⁶ Icnaemi Jisasi mini bayauc sagen demi, beni magagac agano kutiremi bey agano fo yoy uvandemi, ben ogan kac agagemi. ⁷ Beni mini bainta samemi, "Siloami non avarun kim maro sesecono" (mini baecdanami "Sankemi"). Afo mini bainta yereren oraem maro sesec uremi ovegen onemi yemi. ⁸ Icnaemi ben acnagac ban inimbaintauc namac bema bana onan inantagenim bainta vani yeni sevano, "Mana mini baintaci kumanten inantevafino?"" Manaca seno, "Mini benino." Eno seni, "Iyeino, beganac ugam baintaino." Afo beni semi, "Mana senumpe." ¹⁰ Yeni bemi sameno, "Inken asapagac en ogan diyenafino?" ¹¹ Beni yevegen yemi siyimemi, "Mana bainta benani Jisasine sire avic dam bainta yoy uvandemi sen sogan kac agacdemi semi sisinkemi semi, 'Silaomi non avarun kim maro sesecono.' Micni siraci seni maro seseureci sogan onecumpe." ¹² Yeni bemi indaeno, "Beni nafagac benafino?" Beni yevegen yemi siyimemi, " Seni iyen onagecumpe." ¹³ Yeni ogam futinkagenim bainta avigen Faririsiuc vapaci beno. ¹⁴ Mini nurami Sabati nurami bami Jisasi yoy uvandemi ogan diankemi. ¹⁵ Icnaemi Farisiuc bemi yeve ge indaeno inkenic urenaci beni onenafino. Beni yemi siyimemi, "Beni yoni sogan kac acdaci, seseureci, mage onecumpe." ¹⁶ Manaca Fqrisiuc seno, "Mana bainta Kotimpateva yigenaino, nevarai beni Sabati gac iyen dafismino." Enon seni, "Inkenic urenaci manda anda uvarevanani beni micnugan avucavac uvarantenafino?" Afo ye yirani daimeno. ¹⁷ Afo yeni ogam futinkagenim bainta yevege indaeno, "Eni nevec benani sefono, beni emi ogan diankemino?" Mini ogam futinkagenim bainta semi, "Beni profeti bemino." ¹⁸ Afo Yudauc ogam futinkagen onam bainta vani fa birivic iye ini bageni, yeni ben ano afomi yareno. ¹⁹ Yeni ben ano afomi indaeno, "Mana en agagfino ena se ogam futinkami ben ano magemino? Beni inkenic urenaci mage onenafino?" ²⁰ Afo ben afo yemi yevege siyimeno, "Yenamac onagecumpe man bende sigacino, beni ogam futinkami macdukamino. ²¹ Inkenic urenaci mage beni onenafi, bende iyen ingecumpe, afo iyec bami ogan diankenafi bende iyen onagecumpe. Ben indaurec indego, beni bantaici ugemino. Beni beyaran siyimintemino." ²² Ben ano afo mini bayauc semi, nevarai, yeni Yudauc yigani fegeno. Nevaraino Yudauc bani sireni mana yirakaci deno iyefi Jisasinana sena, beni Kraisi ino sinani, bemi mam mac kinke sankamani mapac dami, mam bac iye sini mapaci bantemi. ²³ Mini foni, ben ano afo seno, "Beni bantaic mugemino, ben indaogo." ²⁴ Afo ena yacbaci ogam futinkagenim bainta ararman deni, bemi indaureni seno, "Eni Kotin ogan kac fuga seno. Yenamac bemi onagecumpe beni manda andaic eva ino." ²⁵ Mana anecne manan seni bemi indigecumpe, semi sogam fitinkagemino, afo mage seni amankaci onecumpe." ²⁶ Afo yeni bemi sameno, "Inkenigac emi uankenafino? Inkenigac urenaci en ogan diankenafino?" ²⁷ Beni yemi yevgemi siyimemi, "Afo seni bani yigemi siyimecumpe, afo yigeni iyen indemino. Yigeni benic disaipori ic iraragafono?" ²⁸ Yeni ben asicdeni sameno, "Eni benic disaipori banamino, afo yenamac Mosasinic disapori becyamumpe. ²⁹ Yenamac indigecumpe Koti Mosasin namaci asemino, afo yenamac iyen indigecyamumpe, manai nafteno benafino." ³⁰ Mini bainta yemi yevegen siyimemi, "Manai iyen antegemino, yigeni bemi iye onageci nafateno benafi, micnugamifo beni semi sogan disenkemino. ³¹ Yenamac indigecumpe Koti manda andaic an inimbaintauc yivaya iyen indemino, afo iyefi Kotin kac man siankema benic ayin avakurevananim, ben avayan indintemino. ³² Mana maga ampamin kake ogam futinkam macdukam bainta ogan diankarukam baya vac iyen indigecumpe. ³³ Mana bainta Kotimpate iye yigemi beni mana anecne vac iyen uvarararimi." ³⁴ Yeni bemi yevegeni sameno, "Eni manda andauc kin ampamono, eni mage yenamac mam baya sisimirarafono?" Yeni micni sireni bemi difitamani mapac aceno. ³⁵ Jisasi indini bemi mam kinke difitani mapac acneno. Bemi onaremi samemi, "Eni Banta Agac kim birivic efono?" Beni yevegemi samemi, "Iyeno o, beni iyec benafino, seni amankac ben kim birivic ontecumpe?" ³⁷ Jisasi bemi samemi, "Bemi onanami, beni enamac a semino." ³⁸ Mini bainta semi, "Iyeno o, seni emi birivic ecumpe," beni micni siremi ben kac man siankemi. ³⁹ Jisasi semi, seni yunai, mana magagac kena inimbaintauc dainyinkarani yecumpe, micnuranani yoyan iye neyou, onantenone, afo yogan oneyouni yogam futimintemino. ⁴⁰ Manaca Farisiuc benamac bageni mini baya indireni, bemi indaeno, "Yenamac bac sogam futinkenafino?" ⁴¹ Jisasi yemi siyimemi, "Yigeni yogam futinkageninaci, yigen kim manda andauc iyem bararimi, afo yigeni seci, 'Yenamac onegunami, yenamac kim manda andauc fani bemino."