¹ Jisasi Olivi Anugaci uremi. ² Banurampaci beni mam mac kin ovegen yeraini, macden inimbaintauc yeraomi, beni kumandugemi sugu yimemi. ³ Lo gin tisaic ugam baintauc namac Farisiuc mana banta mandukan inini avige yeno beni ena bainta namaci monkoc evani onareni fakeno. Bemi acbanac kimi mare ukuka ankeno. ⁴ Yeni Jisasin sameno, "Tisa o, mana inin ena bainta namaci monkoc evani fakeno. ⁵ Afo Mosasinic lo gimi yenamac sisimemi, mini avucavac evananin inimbaintauc onacbac yirogo vani sigemino, afo eni nevec benani sintefono?" ⁶ Yeni micni sirana bena sinanin baya indire mini fo ben koc amirani bam buyeno. Afo Jisasi makamemi magagac ofac poni saremi. ⁷ Bemi indaenana bami, beni ukukaemi yemi siyimemi, "Maya yigen kinke manda anda vac iye uvarevanani, ecanaci benare mana onacban mana inin agekac karucdano." ⁸ Afo beni yevegem makamemi, magagac ofac poni saremi. ⁹ Afo yeni micni sira indireni mapac mana mana acdueni yerere beno, anom baintauc kake fumarauc kac kundaimi. Jisasim manan minigac yere ankeno, mini inin acbanac kin namaci. ¹⁰ Jisasi ukukaemi mini inin samemi, "Anasi o, nafagac en koc amageyom baintauc beya fono?" Maya vac emi koc iyec amenafino?" ¹¹ Beni semi, "Iyeno o, mana bainta vac iye bemino." Jisasi bemi samemi, "Seyacbac emi koc iyen amentecumpe. Orae ena yacbac manda andaic iye ono." ¹² Afo Jisasi yemi yevegemi banta anasi siyimemi, semi, "Seni mana magagac kena omi becumpe, beni iyefi sen sivakuremi beni ayufun kin iye bintemino, iyeino, ben kim ayum fanana kevan omi bantemino." ¹³ Farisiuc bemi sameno, "Eni eyaranana sanami, en avaya fuga iyen sigemino." ¹⁴ Jisasi yemi yevegen siyimemi, "Sena seyarana seguna bayauc, seni fuga secumpe. Seni indigecumpe seni nafatec yevegaci, nafagac bontegafu, afo yigeni iyen indigamino seni nafatec yevegaci nafagac bontegafu. ¹⁵ Yigeni bantaic avucava kaci daiyinkamino, afo seni yunai banta dainyinkarara yegaune. ¹⁶ Afo sena banta dain ankanami fugan sentecumpe, nevarai seyakac iyem becumpe, iyeino, seni sen Tifo sisikac yuno namaci becumpe. ¹⁷ Eyo, yigen yic lo gimi santemino, kantan bainta ganda manaic ugam baya seni, fuga sintenone. ¹⁸ Seni seyarani siyimecumpe, afo sen Tifo sema sisinkeni beni senani siyimintemino." ¹⁹ Yeni bemi indaeno, "En afo nafagac benafino?" Jisasi yemi siyimemi, "Yigeni semi iye sonageci sen Tifom bac iyen onagamino, yigeni sema sonageci, sen Tifom baci onaganagomino." ²⁰ Beni mini bayauc mam magic monoc dan rumu gimi siyimevami, bemi iyen fakeno nevarai bena fuginanin acna iyen yigami. ²¹ Afo beni yevegen siyimemi, "Seni yerereci bontecumpe, semi sifakac nogeci yigeni yigeyic manda anda gimi fuginagomino. Sena beguna fac iyen yinagomino." ²² Yudauc seno, "Benafo benar aruman fugiraraci senafino? Micni raraci beni senaci, " Sena bonunafac iyen yinagomino'?" ²³ Jisasi yemi siyimemi, "Yigemi mana magagaci macdukenone, afo seni inarumpate yevecumpe. ²⁴ Micnugaci yigemi siyimecumpe yigeni yigeyic manda andauc kimi fuginagomino. Afo yigena senana birivic iye ec, inarumpate iyen yevemino seci, yigeni yigeyic manda andauc kim fuginagomino." ²⁵ Micni sirani yeni bemi indaeno, "Eni iyec befono?" Jisasi yemi siyimemi, "Acnantapac yigemi siyimecumpe. ²⁶ Seni amucna anecneugani sireci yigemi yasi gacnaci dain yinkantecumpe. Micnugemino, sen sisinkac yuno beni fugan sigemino, afo bena sisimin bayauci mana magagakena inimbaintauc siyimecumpe." ²⁷ Bey Afonani siyimevani yeni anufare indi ic iyen eno. ²⁸ Jisasi semi, "Jigeni Banta Agac kun dondan yanic ureci, yigeni semi sonanagomino, seni iyec begafu, afo seni sesic yogan iye mandukecumpe. Ne anecneugafi Sen Tifo siguru simenim, mini anecneugani seni secumpe. ²⁹ Bena sisinkac yuno senamaci bemino, senakac yere iyen sinkarukemino, nevarai seni macden yac ben ayevan anecneuci uvarecumpe." ³⁰ Afo Jisasi mini anecneugan siyimevani amucno ben kim birivic eno. ³¹ Jisasi ben kim birivican Yudauci siyimemi, "Yigeni sen tivayauc erarurec avakurageci, yigeni sentic fuga disaiporiuc ugeci, ³² yigenj fuga avucavagac onanagomino, mini fuga avucavaci yigemi utuc yinkantemino." ³³ Yeni bemi yevege sameno, "Yenamac Abrahemin anavasinuc beci yenamac ena baintaic fayan yogam baintaic bac iyen ugec yamumpe, inkenigac eci eni se, 'Yigemi utuc yinkantemino sefono'?" ³⁴ Jisasi yemi siyimemi, "Fuga, fuga, ugami sirec yigemi siyimentecupe, Umacde iyefi manda andaic evanani beni manda andaic fayan yogam baintaic bemino. ³⁵ Fayan yogam bainta mac kim macyoc iyem bemino, afo ben agaci minigim macyoc bemino. ³⁶ Micnugami ben Agac utuc ankarana fana bei, eni fuga siren utuc ankarana fani banonamino. ³⁷ Seni yigemi indigecumpe yigeni Abrahemin anvasinuc bamino, yigeni semi sirirani sifakamino nevaraino sen tivaya yigen yindutim benic magu iyem bemino. ³⁸ Sena segunai se Sifo namac bec onauna anecneugani secumpe, afo yige yacbac yigen yifo siyiminuci uvarac bamino." ³⁹ Yeni yeveni bemi sameno, "Yenamac sifo Abrahemi bemino." Jisasi yemi siyimemi, "Yigena Abrahemin agafandauc bageci Abrahemi uvaregenin yogaruci uvarararomino. ⁴⁰ Micnugaci, yigeni sen sirirani sifakamino, seni Kotimpate fuga baya indunan siyimecumpe. Abrahemi micni iyen emino. ⁴¹ Yigeni yige yifonic yogaruci uvaramino." Yeni bemi sameno, "Yenamac monkoc avucavac kina mactinkeyaone, yenamac Sifo, Koti beyakaci bemino. ⁴² Jisasi yemi siyimemi, "Afo Koti yigen yifo bageninage, semi sivacbac iraromino, nevarai, seni Kotimpaten yeveci mage managaci becumpe, afo sesic siyintaga yevegaune, beni semi sisinkemino. ⁴³ Nagac egaci sena seguna bayauc yigeni iye indegafono? Mini i nevaraino sena siyimeguna bayauc iye maramino. ⁴⁴ Yigeni yige yifo banano inda beci, yige yifonic ayiruc uvararani yiyemino. Beni acnantapate banta yiruman fugevam bemi beni fuga gin iyen ukukagemino nevarai ben kim fuga avucavac bac iyem bemino. Bena umac semi, beyinda ugami avakuremino, nevarai beni umac sigam bemi, beni umac avucavaguc yifo bemino. ⁴⁵ Micnugaci, seni Kotinani fuga baya siyimegunaci, yigeni birivic iye amino. ⁴⁶ Maya vac semi iyen yotiganonamino, seni mana manda anda vac iyen uvandukecumpe. Seni fuga segunaci, yigeni nagac egaci semi birivic iye egafono? ⁴⁷ Beni iyefi Kotimpateno bemi beni Kotin avayauc indemino, yigeni iyen indamino nevarai yigeni Kotimpate iyem bamino." ⁴⁸ Yudauc bemi yevege sameno, "Yenamac antekam bayan enani seci, beni Samaria bainta bami, manda spiriti ben kimi bemino." ⁴⁹ Jisasi yemi yevegen siyimemi, "Seni manda spiriti iyen dukecumpe, seni se Sifomi avic yanic egunaci, yigeni semi manda sivic damino. ⁵⁰ Seni se sivic yanic iyen ecumpe, maya bemino, beni koc yimintemino. ⁵¹ Fuga, fuga, sireci yigemi siyimecumpe, iyefi sena siyimeguna bayauc indiren uvaremi, beni fugir iyen onantemino. ⁵² Yudauc bemi sameno, "Mage emi aci onecyamumpe eni manda spiritin dukanamino. Abrahemi profetiuc namaci fugenone, afo eni se, 'iyefi sen tivayauc indiren uvaremi beni fugin iyen onantemino.' ⁵³ Eni yenamac sifo Abrahemi namac iyen yankagaganamino, beni fugemino. Profetiuc baci fugenone. Eni eyarani yankagagecumpe indiric iyevac ono." ⁵⁴ Jisasi yemi yevegen siyimemi, "Afo sena se seyarana se sivic yanic onami, sena sivic yanic onuna fayar anecneino. Yigena benana secma yenamasic Koti bemino segon Koti, sen Tifo bemi beni sen tivic yanic emino. ⁵⁵ Yigeni bemi iyen onagamino, afo seni bemi onagecumpe. Afo sena benana iyen onagecumpe seci, seni yigen kacnac eci umac bainta bantecumpe. Micnugaci, seni bemi onageci ben avaya fakarukecumpe. ⁵⁶ Yigen yifo Abrahemi, sena ayum fana banunagac uvaranuna anecneuc onaremi, beni amusimi maremino." ⁵⁷ Yudauc bemi sameno, "Eni 50 orande vac iye yankagage, eni Abrahemin onaruke sanamino?" ⁵⁸ Jisasi yemi siyimemi, "Fuga, fuga ugami sirec yigemi siyimentecumpe, Abrahemi iye ampankaci senare bagecumpe." ⁵⁹ Afo yeni onacbanuc yureni ben arirar omi, beni omanduemi mam mac kinke mapac acdem bemi.