¹ Miniuc yankaimi Jisasi Galili magafaci yeukevami, beni Yudia maga fac iye bintemi, nevarai Yudauc bemi aruman fugirani afakevano. ² Yudau yic iyon maran Mac omac adekaci yemi. ³ Ben afac unami sameno, "Mana magu yerere Yudia magafac bono, micninani enic disaiporiuc bac ena avoguc anecneuc uvareonauc onantenone. ⁴ Maya vac mana anecne opac iyen uvaremino eno vac afotac bema onago vani,Ena mana anecneuc uvarante, amankacino umacdem mana magagac kena inimbaintauc yocyigano." ⁵ Ben afac unamac ben kim birivic iyen eno. ⁶ Micnugami Jisasi yemi siyimemi, "Sentic mini acna iyen yigemino, afo yigen yic acna macden nuram sesac anan ugemino. ⁷ Mana magagac kena inimbaintauc yigemi namugoic iyen uyinkantenonone, afo semi namugoic usinkenone, nevarai seni yenyic manda avucavavaguc gan facbarurec siyimeguna vani semi namugoic usinkenone. ⁸ Yigeyac omac kac urogo, seni mini omac kac iyen urontecumpe, nevarai sentic acna iyen yigemino." ⁹ Icnaemi mini bayauc siyimicdemi, beni yevegemi Galilici bami. ¹⁰ Afo ben afac unam omac pac undaomi, icnaemi beyac bac uremi, afotac iye urini opaci uremi. ¹¹ Yudauc benani omac kin afaka noni, seno, "Nafagac beni benafino?" ¹² Mini inimbaintauc yocbanac kinkac benani amucna bayauci sa nogeno. Manaca seni, "Beni avouc banta bemino." Eno seni, "Iyeino, banta anasi manda asapaci yivigem bevamino." ¹³ Afo yeni Yudauc yigani fegeni benani afotac iyen sevano. ¹⁴ Afo omac yankagen acbanac kagic imi, Jisasi mam mac kin undaemi kuganden tisin emi. ¹⁵ Icnaemi Yudauc yigan devani, seno, Mana bainta inkenic urenaci amucna anecneugan indigenafino? Beni siguru vac iye sigaino." ¹⁶ Jisasi yemi yevegmi siyimemi, Sena tisin eguna sentinda vaino, iyeino, bena sisinkac yunon indaino. ¹⁷ Afo iyefi Kotinic ayin avakurirani, beni mana tisin eguna uga indigano, Kotimpatec yintenafino, sena sesic indintinke senunafino. ¹⁸ Iyefi beyarana siyimevanani, bey avici yanic emino, afo iyefi bema sankaran yeninan siyimevana, beni fuga bainta bemino, ben kim iye anteckan avucavac iyem bemino. ¹⁹ Mosasi yigemi lo yimemino. Micnugaci maya vac yigen kinke lo iye avakuramino. Ne anda varaci semi siriran sifakac nogafono?" ²⁰ Masicde bemi yevege sameno, "Eni manda spiritin dukanamino. Iyec emi ariran afakenafino?" ²¹ Jisasi yemi yevegen siyimemi, "Seni mana yogan mandaunami, mini foni yigemi yigan demino. ²² Mosasi yinda akecyan yigemi yimemino (mini avucavac Mosasim pate va yigenaino, yigeunamac sinafu unam pate yigemino), afo Sabati nurami yigeni banta yinda akecyamino. ²³ Afo Sabati gac yigena banta anda akecyarec Mosasinic lo iye ugacdanteci, nagac egaci sena Sabati gac banta yiyofeguna van yiran anecne semi mantinkegafono? ²⁴ Bantaic onantac iye daimogo, afo ecegaci anteckan avucavac poyaci daimogo." ²⁵ Manaca inimbaintauc Yerusaremi magu ginkeno seno, "Mana miyinac aruman fugiran afakevayafono?" ²⁶ Onago, beni afotaci baya siyime vani yeni mana baya vac bemi iyen siankenone. Yicnom baintauc bemi onageyafo, beni Kraisic benafi? ²⁷ Yenamac bemi onagecumpe, beni nafatenoc benafi. Afo Kraisi yinami, maya vac benani iyen indigantemino beni nafateno benafi. ²⁸ Afo Jisasi bacduman acnuremi tisin emi semi, "Yigeni macde senani indigamino seni nafatec yevegafu. Micnugaci, seni sesic erantac iyen yecumpe, afo semi Kotin sisinkac yevaumpe, avucavac fugan sigemino, yigeni benani iyen indigamino. ²⁹ Seni bemi onageci, benamaci baunami sisinkac yecumpe." ³⁰ Mini baya foni bemi fakare karavusic irani enofo, maya vac ben agec ayan iyen demi, nevarai bena fuginanin acna iyen yigami. ³¹ Micnami, amucna inimbaintauci ben kim birivic eni, seno, "Kraisi icnaen yemi, beni enac ugan avucavguc mana vagac yankagaren uvarantenafi?" ³² Banta anasiuc Jisasi nan sumisami sani Farisiuc indireni, yicnom prisiuc namac Farsiuc Jisasim fakago vani yeyic ofisauc siyinkeno. ³³ Jisasi yemi siyimemi, "Seni yigenamac sito kac fa bageci, icnaemi seni bena sisinkac yuno vapac bontecumpe. ³⁴ Yigeni sifakanagomifo iyen sonanagomi, sena bonuna fac amankac iyen yinagomino." ³⁵ Yudauc ye yirani bayauc sani yeukevano, "Nafagac mana bainta binagac yigeunamac iye onantegafuno? Beni Yudauc Griki magafac ban inimbaintauc namagac ovenaci minifac tisin em bantenaci senafino? ³⁶ Nevaraci mana baya senafi, 'Yigeni sifakanagomifo iyen sonanagomino, sena bonuna fac amankac iyen yinagomino'?" ³⁷ Afo omac kipan nurami, Jisasi ukukaemi bacduremi siyimemi, "Iyeci nonan amer acyan kenafi, ecanaci sena banunafac yeraenaci non nano. ³⁸ Iyefi sen kim birivic inani, man yo gin siganic emi, ayum fa van nom ben arac kinke anon nomi kumintemi." ³⁹ Beni Ayo Inta vani semi, iyeuyafi ben kim birivican inimbaintauci maranteno. Jisasi anon avic iye mandukemi, beni Ayo Inta iyen yimic dukami. ⁴⁰ Manaca inimbaintauc, Jisasi siram bayauc indireni, seno, "Fuga ugamino, manai profet bemino." ⁴¹ Manaca seni, "Manai Kraisi ino." Afo manaca seni, "Kraisi Galili fate yintenafino? ⁴² Man yo gim semi, Kraisi Devitin anavasinuc kinke Betlihemi, Devitinic magu kinken yintemino. ⁴³ Afo Jisasi siran baya vani banta anasi indir uvandeni ye yiran daindain eno. ⁴⁴ Manaca Jisasim fakare enofo, maya vac ben kac ayan iyen demi. ⁴⁵ Icnaemi kamaninic ofisauc ovege yeraomi, prisiuc namac Farisiuc yemi indaeno, "Nagac igaci bemi avigec iye yegafono?" ⁴⁶ Mini ofisauc yemi yeve siyimeno, "Maya vac bena seninic ugam baya iyen sintemino." ⁴⁷ Afo Farisiuc yemi yevege siyimeno, "Yige yacbac benic makasin kinaci yandegafono? ⁴⁸ Dafisiruc bac ben kim birivic eyafono, haca Farisiuc bagafono? ⁴⁹ Afo mana inimbaintauc lo iyen indigenone, yemi siyafunirukenone." ⁵⁰ Nikodimasi (mana Farisi bana Jisasin ye onani) yemi siyimemi, ⁵¹ "Yigeunama sic lo amankagac mana bainta koc amintenafino ben avaya iye indiruke, ne anda uvarenafi? ⁵² Bemi yevege sameno, " Eyacbac Galili fatenoc befono? Kotinic yo gin yandare onano, mana profeti vac Galili fate iyen yigemino." ⁵³ Icnaemi macden inimbaintauc ye yimac kinkac be ye eno.