¹ Mini anecneuc yankagaimi, Jisasi Galili Un non ena ofac, mini fac avic deni Tiberiasi Un momi. ² Amucna inimbaitauci bemi avakure yevano, nevarai, yeni onami enac ugan avuavaguc uvandemi yic inimbaintauci yiyofevami. ³ Jisasi anugac undaemi minigac beyic disaiporiuc namac kumandemi. ⁴ (Afo Pasova, Yudauyic omac, adekaci yemi.) ⁵ Jisasi ogan yanic uren onami amucna inimbaintauc be vankac yami,nbeni Filipi samemi, "Nafagac breti ayac uranaya manauc amankac nanteyafono?" ⁶ (Afo Jisasi mana baya simi, Filipin amamacden onarani beni semi, bena uvarananimi bani indigami.) ⁷ Filipi bemi yevegen samemi, "Tu handreti denari monoc kac breti macde maya maya sitoc bac nanayon amankagic iyen intemino. ⁸ Mana disapori , Endru, Saimon Pita afac, Jisasimi samemi, ⁹ " Mana inta mana yacman breti namac kantan noyac duka managim bemino, afo manauc amankagigac intenafino mana bagugine?" ¹⁰ jisasi yemi siyimemi, "Banta anasiuc siyimina gumandogo." Mini magugac amucna ataya bami. Afo mini inimbaintauc kumandeno, amankac 5,000 amami bano. ¹¹ Afo Jisasi mini breti manden susu siremi, kumantan inimbaintauc yimemi. Beni oganic anan noyac bac emi, yena nanyon amankaci. ¹² Afo bantq qnasiuc yimucdaimi, beni disaiporiuc siyimemi, "Yunan arauc yere ecanuc yogupago, kicnuranaci mana anecne vac iye oyogano." ¹³ Afo yeni mini mana yaman breti gake mini inimbaintauc naran arauc yogupaman dami 12 basgetin uvikemi. ¹⁴ Icnaemi bena enac ugan avucavaguc uvarami banta anasiuc onareni, yeni seno, "Manai fuga siremi profeti mana magagac yevemino." ¹⁵ Afo Jisasi yemi yonani bem fakar adekagic eno, ben avankarana kinic ino vani, beni yere yinkaremi yevegen beyakaci anugac uremi. ¹⁶ Ayinkagic imi beni disaiporiuc un nompac kumeno. ¹⁷ Yen mana boti gin undaeni, un non kim Kapenaumi birano. Mini acna gin ayufun kevami, Jisasi yena vankac iyen yigami. ¹⁸ Eran sisova evami, unomi eran karandoc emi. ¹⁹ Yeni puric beni 5 gake 6 kilomita amami oraeni onami Jisasi unon anac yevami, afo boti adekac yeraini, yeni fegeno. ²⁰ Afo beni siyimemi, "Senumpe! Iye fegago." ²¹ Afo yeni boti gin urino vani bemi avigeno, eseci boti ena ofac magagac yena birare sen kac oraemi. ²² Mini nuran yankagaimi, banta anasic unon ena ofac ukukagageyouni onami ena boti vac minigac iyem vami, mana boti mana minigac bami Jisasi beyic disaporiuc namac minigin iyen umpekami, benic disaiporiuc yeyakaci yerere bugano. ²³ Micnugami, minigac manaca boti Tiberiasi fate minigaci yevami, mini magu adekaci Jisasi susu sirani breti neno. ²⁴ Mini inimbaintauc onan Jisasi beyic disaiporiuc namac minigac iyem bano, mini inimbaintauci mini boti ginkac undaeni Kapenaumi Jisasin afaka beno. ²⁵ Icnaemi unon ena ofac omar onareni, yeni bemi indaeno, "Tisa o, eni nandec managac yefono?" ²⁶ Jisasi yemi yevegen siyimemi, Fuga, fuga ugane, yigeni enac ugan avucavac uvarauna onanara sifakagegonaino, iyeino, yigeni breti naran yimuc kurinani sifakagegomino. ²⁷ Yigeni oyogananin yunanugan iye yogago. Ecegaci iye kipan yaum maranayon yunanu garac yogago. Micnugan yunanuc yigemi Banta Agaci yimintemino, nevarai yigeunamac Sifo Koti bemi anon avic amicdukemino." ²⁸ Afo bemi yevege sameno, "Nagac uregaci yenamac Kotinic yogaruc maranuno?" ²⁹ Jisasi yemi yevegen siyimemi, "Macnimugemi Kotinic yogan. Yigeni bena sankan yeniyin kinac birivic ogo." ³⁰ Afo bemi sameno, "Ne enac ugan avucavagac uvandanac yenamac onaregaci enkim birivic onuno?" Eni nec uvarantefono? ³¹ Yenamac sifo unami afac magafac mana nevanone, macni siremi santemino, 'Beni inarumpatena breti nagovani yimemi."' ³² Afo Jisasi yemi yevegmi siyimemi, "Fuga, fuga ugane, Mosasi inarumpatena breti iyen yimemino, iyeino, sen Tifon inarumpatena fuga breti yigemi yimemino. ³³ Nevarai, Kotinic breti inarumpate kundaemi ayum fa van mana magagac kena inimbaintauc yimemino." ³⁴ Afo beni siyimemi, Iyeno o, mini breti macden yac simeno." ³⁵ Jisasi yemi siyimemi, "Seni ayum fa van breti becumpe, beni iyefi sena banunafac yintemi bemi arandac iyen fugintemino, afo iyefi senkim birivic inani nonan dac iyen ayintemino. ³⁶ Afo yigemi siyimecumpe fuga sirec semi sonarukeci, yigeni birivic iye amino. ³⁷ Umacde iyenafi sen Tifo siminani beni sena baunafac yintemino, afo beni iyefi sena banunafac yinanimi seni fuga sirec avekaman iyen karucdantecumpe. ³⁸ Nevarai seni inarumpate kumbecumpe, sesic siyin iyen uvaratecumpe,iyeino, bena sisinkac yunonic ayini uvarantecumpe. ³⁹ Mana mini sen sisinkayinic ayinino, bena simicdakauni seni mana vac yere iyen ecantecumpe, iyeino, arasapac yinanin nurami seni yemi ukuka yinkantecumpe. ⁴⁰ Nevaraino mini i sen Tifonic ayinino, umacde iyefi ben Agac onarem ben kim birivic emi beni iye kipan aumi marantemino, afo seni arasapac yinanin nurami bemi ukuka ankantecumpe ⁴¹ Icnaemi Yudauc bena seninani amucna baya seno, "Inarumpate kumbauna breti seni becumpe." v 42 Yeni seno, "Manai Yosepin agagafino, ben afonuc ben anonuc yenamac yemi yonagauno? Nagac enac beni senaci, 'Seni inarumpate kumbecumpe, senafino'?" ⁴³ Jisasi yemi yevemi siyimemi, "Yige yiran amucna baya iye sego. ⁴⁴ Maya sena banunafac iyen yintemino, sen Tifo sen sisinkac yuno beni amankaci difitaman sena banuna fac simintemino, afo arasapac yinanin nuraminbemi ukuka ankantecumpe. ⁴⁵ Profetiuc kim santemino, 'Macde Koti siguru yimintemino.' Macde iyefi sen Tifom pate indiren siguru mandanani sempaci yintemino. ⁴⁶ Seni maya vac Kotin iye onarukamino iyen secumpe, beni iyefi Kotimpateno, beni Kotin onarukemino. ⁴⁷ Fuga, fuga ugane, beni iyefi birivic inani beni iye kipan aumi dukemino. ⁴⁸ Seni ayum fa van breti becumpe. ⁴⁹ Yigen yifo unam afac magafac mana nageni, yeni fugenone. ⁵⁰ Mana breti inarumpate kumbemino, micnugami banta manaca naren iyen fugintemino. ⁵¹ Seni ayum fa bauna breti beci, inarumpate kumecumpe. Iyefi mini breti gake manaca naren ayum fananam bantemi. Mini breti sena yimenunai sen so ino mana magagac kena inimbaintauc yinda bemino, yeni nareni ayum fani bantenone." ⁵² Yudauc yiran anecne mandeni ye yiran amucna baya yeni seni, "Mana bainta inkenic urec ben o nano varac senafino?" ⁵³ Afo Jisasi yemi siyimemi, "Fuga, fuga ugane, yigeni Banta Agac o narec, afo beni koran narec, yigeni ayum fanana banagomino. ⁵⁴ Iyefi sen so nenafi, sentic koran nenafi beni ie kipan aumi dukemino, afo bemi arasapac yinanin nurami aoruranami ukukantemi. ⁵⁵ Nevarai sen so i fuga yunami, afo sentic korami fuga nomi. ⁵⁶ Iyefi sen so nenafi, sentic koran nenafi beni sen kim banaci, seni hen kimi bantecu. ⁵⁷ Sen Tifo Ayum fa van semi sisinkaci seni se Sifonic erantaci ayum fa becu, afo iyefi sen nanani, beni sentic erantaci ayum fa bantemi. ⁵⁸ Mini breti inarumpate kumimi, yigen sinafu unan nareni fugeno. Iyefi mana breti nanani fanana ayum bantemi." ⁵⁹ Jisasi mana anecneugan siyimagenimi Kapenaumi mam mac kimi banta anasiuc siguru yimemi siyimagemi. ⁶⁰ Icnaemi amucna disaiporiuc mini bayauc indireni, yeni seno, "Mana bayauc yigeunamac siguru simagenim anon umam bayauc ino, iyec amankac indintenafino? ⁶¹ Nevarai, Jisasi beyic indintimi indini benic disaiporiuc miniugani amucna baya sami, beni siyimemi, " Mana baya yigen yiragac mandaic uyinkenafino?" ⁶² Inkenigac intenafino, yigeni onevan Banta Agac bana bagenimpac ure vanane? ⁶³ Ayo Inta ayumfa van yimemino. Afo o i ayum fa van iyen yimemino. Mini bayauc yigen siyimunauci Ayo Inta ino afo ayum fa gani yigemi yintemino. ⁶⁴ Micnugaci manaca yigeni birivic iyen amino." Nevarai, Jisasi bani indigamino, iyem baintau gaci ben kim birivic iye inaci, iyec bemi avicman namugouc yiyan kin dantenafi. ⁶⁵ Beni semi, "Mini vani yigemi siyimunaino, mana bainta sena banunafac iyen yintemino, afo sen Tifo amankagic uankaranami sena banunafac yintemino." ⁶⁶ Mini yankagaimi, benic amucna disaiporiuc yerereni beno, ena yacbac benamac iye beno. ⁶⁷ Mini acnaemi Jisasi 12 disaiporiuc siyimemi, "Yige yacbac yererec biran yiyenafino?" ⁶⁸ Saimon pita bemi yevegemi samemi, "Iyeno o, ena iye vapa gac yenamac bontegafuno? Eni iye kipan yaum maram baya dukanaci, ⁶⁹ yenamac birivic ureci onauna eni Antkam Bainta Koti beyani ugac dukemino." ⁷⁰ Jisasi yemi siyimemi, "Seni macde yigemi seyani uyacman decumpe, afo maya yigen kinke ban anonic yogam bainta bemino." ⁷¹ Afo beni Yudasi Saimon Iskarioti nani semino, beni 12 disaporiuc kinke kuntanuc uvandemi, Jisasin avicman namugouc yimintemino.