¹ "Fuga ugami sirec yigemi siyimentecumpe, mana bainta sipisipi kugugin ona ginke iye umpegana manaca asapatec umpegemi, beni umon bainta bemino. ² Sipisipi ic ona ginke umpeganim bainta beni sipisipi gac dafitam bainta bemi. ³ Ona gac dafita bainta bemi diankemino. Beyic sipisipiuc yen yivic kac daren yarevani ben amer a indireni mapac acde kumeno. ⁴ Macde mapac acduomi, beni acnaric urem bevani, sipisipiuc ben acnaemi beno, nevarai yeni ben amer a indigeno. ⁵ Yeni ena bainta iyen avakure bintenone, iyeino, yeni ben agani fegantenone nevarai yeni ena bainta amer a iyen indigeno." ⁶ Jisasi mini baegam baya yemi siyimevani, yeni anufare ben avayauc indi ic iyen eno. ⁷ Icnaemi Jisasi yemi yevegen siyimemi, "Fuga ugami sirec yigemi siyimentecumpe, seni sipisipic ona becumpe. ⁸ Bana yem baintauc, sena iye yigauna yem baintauc umon baintauc yenone. beni umom bainta bani, sipisipiuc yen yivaya iyen indenone. ⁹ Seni ona becumpe, iyefi sen kin yefecen umpegemi, beni ayum fani bantemino. Beni mini gin umpecen acduen emi avoguc atayauc afakaren nantemino. ¹⁰ Umon bainta yenimi, beni umoruremi, aruren, anankayintemino. Seni yuna foni yeni iye kipan yaun uvikare marantenone. ¹¹ Seni sipisipiuyic avoguc dafisini becumpe. Sipisipiuyic avoguc dafisin sipisipi ugani fugemino. ¹² Afo monogan yogevam bainta beni sipisipiuyic dafisira benai, sipisipiuc beninda iyem bamino. Beni onami afasan iyan yevami, beni dakaden iyayuimi afasan iyan sipisipiuc yivakundani mana mana uremi yirac manaremi bevami. ¹³ Beni yereremi iyayemi, nevarai beni monogan yogevam bainta bemi, sipisipiu gani iyen indemi. ¹⁴ Seni sipisipiuyic avoguc dafisini baunami, seni sesic sipisipiuc yonagaunani, sentic sipisipiuc yeni semi sonagenone. ¹⁵ Sen Tifo semi sonagaci, seni se Sifon onageci, seni sipisipiu gani fugontecumpe. ¹⁶ Seni ena sipisipiuc baci dukanani, yeni ena kuguginkena benone. Seni yen yivigec marerana mana kugugim beni sen tivaya indintenone, minifoni yeni mana baguginkenaic imi, yenkac mana dafisinana bantemino. ¹⁷ Mini foni sen Tifo semi sivacbac emino. Semi siruman fucdaci yevegec ukukantecumpe. ¹⁸ Maya sen kinkena iyen ye dafintemi, iyeino, sena foni ecanani siruman fugintenone. Seni eran dukauna foni ecana sirurac fuceci, afo seni eran dukauna foni yevegec marantecumpe. Mana baya se Sifom pate marecumpe." ¹⁹ Mini bayauc poni Yudauc yevegeni ye yirani kantan kin daimeno. ²⁰ Amucno seni, "Beni manda spiritin dukemi ocenici emino. Nagac ega i yigeni beni avaya indegafono?" ²¹ Ena baguginke seni, "Mana bayauc manada spiriti dukam bainta va senaino. Manda spiriti amankagac ogam futinkam bainta ogan diankantenafino?" ²² Afo Yerusaremi magugim omac acna yemi. Mini gin anon iyon yin acna yenimi, ²³ Jisasi mam mac kim Solomininic iyon maran undua anaci bemi. ²⁴ Afo Yudauc bemi yeukueni indaeno, "Eni yenamac iyakaci fakarukanaci yenamac amucna indirici ecumpe. Eni Kraisi bante, facbarure yenamac sisimeno." ²⁵ Jisasi yemi yevegen siyimemi, "Yigemi siyimunac birivic iyen omino. Sena se Sifon avic kin yogageguna yogaruc, miniuc poni senani yigemi siyimemino. ²⁶ Miniuc onec baci yigeni birivic iye omino, nevarai yigeni sentic sipisipiuc iyem bamino. ²⁷ Sentic sipisipiuc sen simer indenone. Seni yemi yonagaunani, smi sivakurenone. ²⁸ Seni iye kipa yaumi yimena yeni iye fugintenone. Eno vac sen siyan kinke iyen dafintemino. ²⁹ Sen Tifo, yemi simicdukani, yeni enouc baci yankagageno, afo sen Tifon ayan kinke amankac maya iyen dafintemi. ³⁰ Sen Tifo namac seni maya becumpe." ³¹ Yudauc mini bayauc indireni, yeni onacbanuc yureni ben arirar eno. ³² Jisasi yemi siyimemi, "Seni amucna avoguc yogaruci se Sifo patena yocyigecumpe. Afo mini yogaruc kinke inkecni yogaraci yigemi uman yimevagaci, semi sirirar egafono?" ³³ Yenamac en arira egunai mana avoguc yogan marana kafara ariran egaune, iyeino, eni Kotinan manda baya sana fonino, eni banta banamino, afo eyarani mandan Kotinici anamino." ³⁴ Jisasi yemi yevegen siyimemi, "Yigeni bani indigararomino lo gin santane, 'Seni seci, " Yigeni kotiuci bamino?'" ³⁵ Afo bena yenani kotinuge siren yivic demi, yen kimi Kotin avaya yemino (Kotin avaya minigaci bantemino, ena gim bac baecmar iyen dantenone). ³⁶ Sen Tifo semi uyac demi mana magagac sisinkac yevaunaci yigeni senani seci, 'Eni Kotimi manda baya,' nevara seni seci, seni Kotin Agaci becumpe.' ³⁷ Afo sena se Sifonic yogaruc iye maranaci, sen kin iye birivi ogo. ³⁸ Afo sena mini yogaruc bac maranac yigeni miniugandac birivic bac iye ege, sena mareguna yogaruc kagac birivic ogo, miniuc poni yigeni onareci indin maranagomino sen Tifo sen kimi baci seni ben kimi becumpe." ³⁹ Yeni bemi yevege fakarani enofo, ben yen yiyan kinke yereremi bemi. ⁴⁰ Beni yevegemi yererem bemi Yodani yankagen ac urintapac Yoni acnantapac nom manyinkagenim magugimi oraemi, minigimi bagemi. ⁴¹ Amucna inimbaintauc bena vankac yeraeni, yeni seno, "Fuga siren Yoni enac ugan avucavac bac iyen uvaremino, afo macden anecne mana bainta vana sagenimi fugan sevamino." ⁴² Mini magugim amucna inimbaintauci birivic eno.