¹ Afo mana bainta ben avic Lasarusi aci marevami. Beni Betani magugin keno bemi, Maria namac ben onana Mata ganda namac mana magugin keno bano. ² Maria Iyenon kac avoguc amunkuc evam basafen acdemi, bey anon yo foni ben agantac daoyemi, ben afaci Lasarusi bemi ac marevami. ³ Mini untanano Jisasi yen yimapac yino vani indaeni seni, "Iyeno o, onano, ena benana ayeni aci maremino." ⁴ Jisasi mini vani indiremi, beni siyimemi, "Mini ac marenimi iyen fugintemino, iyeino, minifoni Kotinic eran afotagic inami Kotin Agac avic yanic intemi." ⁵ Afo Mata na ben onana Maria na Lasarusi uyani Jisasi anon avacbaci uyinkevami. ⁶ Lasarusi ac marevanani beni indiremi, Jisasi kantan nuram baci bena vam magugim bami. ⁷ Afo mini yankagaimi, beni disaiporiuc siyimemi, "Yicya Yudia magafac yevegec bono." ⁸ Disaiporiuc bemi sameno, "Tisa o, ma mage ugami Yudauc emi onacban arirani enone, afo eni yevege birani sanamino?" ⁹ Jisasi yemi yevegemi siyimemi, "Mana nurami 12 awa gaci gagem bemino, afo bainta kagac bemi iyen yandintemino, nevarai beni mana magaic on kaci onemi bemino. ¹⁰ Micnugami, bena ayufun kim bemi, beni yandintemino nevarai ben kin on iyen kemino." ¹¹ Beni mini anecneugan siyimagen demi, siyimemi, "Yigeunamac sigono, Lasarusi oni dugemino, afo seni minifac beguna foni seni bemi aoruranami on dugan kinke ukukantemino." ¹² Mini vani disaporiuc bemi sameno, "Iyeno o, bena on dugantemi, beni asofantemino." ¹³ Afo Jisasi beni fukanani siyimevani, yeni yaun dena bareyonani semino indirici eno. ¹⁴ Icnaemi Jisasi afotagic uremi siyimemi, "Lasarusi aci fugemino." ¹⁵ Seni yigenani indireci simoni ecumpe, sena minigac iye bageguna foni yigeni amankac birivic inagomino. Yicya yigeunamac bena vapac bono." ¹⁶ Tomasi, Didimasine sire avic dam bainta, agona disaiporiuc siyimemi, "Yicya yigeunamac bac oraec Jisasi namac fugono." ¹⁷ Jisasi minigac yeraemi, beni onami Lasarusim bani eriyevan nurami masic urami bami. ¹⁸ Betani magu Yerusaremi acdekaci bami, benic iyaci amankac kandac manavac kilomita amami bemi. ¹⁹ Amucna Yudauci Mata nuc Maria nuc yifagan yirac avogugic uyinkarani yeno. ²⁰ Icnaemi Mata indimi Jisasi yevami, ben onaran bemi, Maria naumi kumantem bami. ²¹ Mata Jisasimi samemi, "Iyeno o, Ena managac bageninami, sen tifac iyen fukararimino. ²² Afo mage vac, seni indecumpe eni ne anecne varafi Kotimpac indainami, beni amiric anan intemino." ²³ Jisasi bemi samemi, "En afac yevegemi ukukantemino." ²⁴ Mata bemi samemi, "Seni indecumpe, beni icnaen arasapac yinanin nurami fukanayon inimbainta ukukevami beyandac ukukantemino." ²⁵ Jisasi bemi samemi, "Seni yevege ukukandac ayum fa vanda becumpe, ²⁶ afo iyefi ayum fana bananin kac sen kim birivic agemi, beni iyen fugintemino. Afo eni birivic efono?" ²⁷ Beni Jisasimi samemi, "Eyo Iyeno o, seni birivic ecumpe eni Kraisi banamino, Kotin Agac, beni mana magagac yintemino." ²⁸ Beni mini baya siremi, yereren oraemi bey onanan benakac opac araran yeraimi. Beni samemi, "Tisa managimi yevemi emi aremino." ²⁹ Beni mini baya indiremi, agagen ukukemi bena vapac bemi. ³⁰ Jisasi magu gin iyen yigami, beni Mata ben onama bagenim magu gim fani bami. ³¹ Afo Yudauc, benamac naum beni arac avogugic uankageni onami Maria agagen ukukem mapac acdem bini, yeni ye avakure beno, yeni benani bamasi paci ific darani bemino indirici eno. ³² Maria Jisasi vam magugac yeraemi bemi onaremi, ben agantin yanduemi, bemi samemi, "Iyeno o, ena managac bageninami, sen tifac iyen fukararimino." ³³ Jisasi ben onami benamac yen Yudauc namac ific dami, benamac yen Yudauc baci ific dami, bemi ayo inta gim ben arac umar arimi, beni semi, ³⁴ "Nafagac bemi masic urukegafono?" Yeni sameno, "Iyeno o, yerae onano." ³⁵ Jisasi ific demi. ³⁶ Afo Yudauc benani seno, "Onago beni Lasarusinan anon ayini dukagemino." ³⁷ Manaca seno, "Beni ogam futinkam bainta amankaci ogan diankemino, beni amankaci mana bainta vac ayofaranan iyen fugirarimino." ³⁸ Icnaemi Jisasin yevegen ben arac kin anon umar arimi, beni bamasipac bemi. Mini bamasici on afaci bami, minigac onacbami uyackami. ³⁹ Jisasi semi, "Onacban avekaman fasapac dago." Mata, Lasarusim ben anano, Jisasimi samemi, "Iyeno o, beni fugimi eriyevan nurami yankagemino, afo mage mana acna gim ben o ampimi nemino." ⁴⁰ Jisasi bemi samemi, "Seni emi samecumpe, eni birivic evaci eni Kotinic erani onano." ⁴¹ Afo yeni onacban avekaman fasapac dami, Jisasi inarumpac kagacemi semi, "Sen Tifo o, seni emi susu siankecumpe eni semi mage indanamino. ⁴² Seni indecumpe eni masicden yac semi indanamino, afo mana inimbaintauc sen yeukugauyani indireci macni secumpe, minifo yeyandac onareni senani ben Afon sankan yemino sireni birivic intenone." ⁴³ Beni micni siremi, eraruren bacduman acnuremi semi , "Lasarusi o, fasapac acde kumono." ⁴⁴ Fukagenim bainta fasapac acdemi kumemi, ben agar ayana macdem bunampac davaravefo fa ukugami kumemi. Jisasi yemi siyimemi, "Utuc ankarec ecam bino." ⁴⁵ Afo amucna Yugauc Maria namac yevageni Jisasi uvaran anecne onareni, ben kim birivic eno. ⁴⁶ Afo manaca inimbaintauc Farisiuc vapac oraeni Jisasi uvaranani maro siyimeno. ⁴⁷ Afo yicnom prisiuc namac Farisiuc yaraman kansoro baguyureni seno, "Ne anecneci yigeunamac uvaranuno? Mana bainta enac ugan avucavaguc amucnan uvaremino. ⁴⁸ Yigeunamac ecanam fanana micnem bevanani, macden inimbainta ben kimi birivic evani, Romiuc yeraeni yigeunamasic magu namac maga namac anankayintenone." ⁴⁹ Micni sami, mana bainta yen yicbanac kinke, Kaiafasi, beni mini orande gim yicnom prisi ugemi, yemi siyimemi, "Yigeni mana anecne vac iyen indigamino. ⁵⁰ Yigeni omarec iyen indamino mana bainta amankac macden inimbaintaugan fuginami yigemi avogugic uyinkantemino, afo iye micnimi, macdem maga namaci kipantemino. ⁵¹ Afo mana bayauc senimi, beyic ayintaga senai. Iyeino, beni mini orande gim yicnom prisi bemi, beni profeti baya senimi Jisasi macden inimbainta van fuginami amankagic intemino, ⁵² macden inimbainta vananavaino, iyeino, micnuranami Kotin agafandauc mana mana ugan kinkake managim yeman mana baguic intenone. ⁵³ Afo mini nuran kake kugandeni Jisasin aruman fuginayon ayani afaka beno. ⁵⁴ Afo Jisasi afotac Yudauc yugan anac iyen nogemi, beni ecemi afac maga acdekac bam magagimi Efraimi ge sire avic dan taoni gimi ovami. Beyic disaiporiuc namac mini gimi bami. ⁵⁵ Afo Pasova omac acdekac yini, amucna inimbainta macdem magafate Yerusaremi fac yeyan antecde sesac ugam Pasova yino vani beno. ⁵⁶ Yeni mam mac kin ukukageni, ena namac maro a sire ena mare a sire eni, Jisasinani afakevano, "Yigeni inkenic indiri gac egafono? Beni omac kac yintenafino?" ⁵⁷ Afo yicnom prisiuc namac Farisiuc mana eran baya yimeno, iyefi Jisasinan indin nafagafi banani, yeni agagaec mare siyimiyaci yeni oman fakago.