1 Iyena Pasova Nuran yirar ugami afac mana omandan nuram fa vami, Jisasi Betani fac yemi, mini magugimi Lasarusin fukagenin kinke ukuka ankemi. 2 Minigimi Jisasin yunan yunka ankami, Mata yunanuc dainden yimevami. Bantauc kandanda gac yunan nami Lasarusi beyabaci Jisasi namac kumanten nevami. 3 Afo Maria anom mono kac ayac am basafen ana manaremi Jisasin acnagaci ye kumanduemi ben agantac acankaremi bey anon yo foni daon ankemi. Mini mac kim avoguc unda macdempaci uvikemi. 4 Jisasinic mana disaipori, Yudas Iskarioti, icnaem beni Jisasin avicman namugouc yiminani bemi, beni semi 5 "Mini basafen amankaci 300 kina gac sarin ure, onda va monoguc iye dukan tinimbaintauc yimiric ugamino. 6 Beni micni senimi beni fugava monoga ondauc iye dukam inimbaintau gara indena senaino, beni umon bainta bamino. Beni monoc unan kac dafitemi, nacdefi mini danayon umorirani semino. 7 Jisasi semi, "Ecanam beni mini basafem fakano, sem masic inayon nuran kena sesac uman danam bno. Yigeni iroc an inimbaintauc dukaric anan uganagomino. 8 Afo seni yigen namac iyem bantecumpe." 9 Amucna inimbaintauc indeni minigim bani, yeni yeno, Jisasinan nanava yeyao, iyeino, yeni Lasarusi fukagenin kinke Jisasi ukuka ankarami mini gimi bani, bemac onarani yeno. 10 Yicnom prisiuc, Lasarusim bac aruman fugirani, managimi baguyueni baya uyeno. 11 Nevarai bena fukagen ukukanani amucna Yudauc yerere oraeni Jisasin kim birivic eno. 12 Ena nuran kugac imi, amucna inimbainta Pasova gac man sirani yeno. Yeni indemi Jisasi Yerusaremi magugim yinanini, 13 yeni ánun ayamaru faka manareni Jisasi yinanin asapac oraeni bacdumar anureni, seno, "Hosana! Koti bemi avogugic uankantemino ben avic kim yinanine, Israeriu yic Kimino." 14 Jisasi donkin agac afakarem mandemi, mini naroc kumandemi, micni siren santami avakuremi, 15 "Iye fegano, Saionin aramuno, onano, enic Kimi yemino, donkin agac kaci kumandugemino." 16 Benic disaiporiuc ánantapac profetiuc Jisasinan sandukam maro amankagic ino van, iyen indigano. Afo Jisasin avic yanic ani, yeni mini omare indeno, mana mini anecneugani benani santami, yeni minin avakureni mini anecneuc bemi uvar ankenone. 17 Afo banta anasi minigac ukukage onami beni Lasarusin bamasic kinke araremi, fukagenin kinke ukuka ankanani ena inimbaintauc siyimeno. 18 Mini avucavagaron sireni banta anasi onarani beno, nevarai yeni indemi beni mini avucavac uvaremi. 19 Micnugami Farisiuc ye yirani seno, "Onago, yigeni mana avoguc anecne iyen uvaranagomino, onago, macdem inimbainta bemi avakurenone." 20 Manaca Grikiuc baci Pasova gac banta anasi man siran uron kin ureno. 21 Mini inimbaintauc Filipi bankaci beno, beni Betsaida taoni ginke Galili fateno bami, yeni bemi indaeni, seni, "Dafisiro, o, yenamac Jisasin onaranumpe." 22 Filipi oraemi Endru samimi, Endru Filipi namac oraemi Jisasim maro sameno. 23 Jisasi yemi yevegemi siyimemi, "Banta Agac avic yanic inayon acna aci mage yeraemino. 24 Fuga ugami sirec yigemi siyimego, mana witi agam magagin iye kugufen kundaen iye fugemi, fani beyakac bantemino, afo bena fugemi, amucna agami irantemino. 25 Afo mana bainta bena ayum bananinan anon indiric emi, beni iye kipan aun iyem marantemi, afo bena ayum fana bananinan anon indiric iye emi, beni iye kipan aumi marantemi. 26 Afo mana bainta sentic yogan marantemi, ecanaci sen sivakurino, afo seni nafagac bantegafu, beyandac minifaci banami, sen Tifo ben avic yanic intemino. 27 Mage sen siraci umani siremino, afo seni nevec sentegafu? 'Sen Tifo o, mana acna gin siyayono'. Seni mini andagaic yecumpe 28 Sen Tifo o, ecanan en avic yanic ugano." Afo mana ameni inarumpate yemi, semi, "Seni bani se sivic yanic urukeci, ena yacbaci yanic ontecumpe." 29 Afo banta anasi minigac ukukagageni indireni seni inarun an semi sino. Ena inimbainta seni, "Enyoro benamac a semisino." 30 Jisasi yemi yevegen siyimemi, "Mana amena yenimi sen siyayirara yenaino, iyeino, yigen yiyayirani yemino." 31 Mage mana nurami banta anasi Koti mana magagac kena inimbaintauc yivucyivac koc indiremi dain yinkantemi. Mage mana magagac kena dafisiric erani anankaman acnontecumpe. 32 Sema mana magagake kun dondan yanic uraci, seni macden inimbainta sesapac difitaman dantecumpe." 33 Beni mini siyimenimi inkem fugirigac beni intenafi, mini vani siyimemi. 34 Banta anasi bemi yevege sameno, "Yenamac indunami Kotinic yo gimi semi Kraisi iye fugini ayum fananam bantemino. Inkenic eci eni seci 'Banta Agac kun dondan yanic intenone'? Banta Agac iyec benafino?" 35 Jisasi yemi yevegen siyimemi, "Omi sito kaci yigenamac bantemino. Mini om yigenamac bananin kagaci nogo, minifoni ayufum yigemi davac iye intemino. Iyefi ayufun kin ninani iyen onantemi beni nafagac benafi. 36 Mage yigen namaci mini om bemino, micnuganaci mini on kim birivic eci yigeni mini on agafandaic inagomino." Jisasi mini bayauc siremi ocmanduemi yere yinkaremi bemi. 37 Jisasi enac ugan avucavaguc amucna ugami uvaremifo, yeni ben kim birivic iyen eno 38 minifoni profet Asaianic profeti baya maro amankagic emi, minigimi beni semi, "Iyeno o, yenamac siyimeguna bayauc maya vac iye ugami birivic enone, eni amankac eyic eran po yiyayiran yocyigana one yacbaci?" 39 Afo mini anda vani banta anasi amankac iye birivic eno, nevarai profet Asaia mini vandaci semi, 40 Iyeno yen yogan futindemi, yirac eraru yinkemi. Afo iye micninami ye yogampo onareni, ye yirac kin indin mandac, seni amankaci avogugic uyinkararunai." 41 Asaia micni senimi nevarai benafoni Jisasinic erani onarukemi benani semi. 42 Mini vandac iye indini amucna dafisin baintauc Jisasin kim birivic eni, Farisiu gan iye fegani, micnugani yeyic birivi van siman afotagic iyen eno, yeni Farisiuc umocdu yinkaraya mam mac kin iye umpeganayon agani fegeno. 43 Yeni banta anasi yen yivic yani ogo vani anon yiyirici evami, yeni Koti yen yivic yanic ino van iyen yiyemi. 44 Jisasi bacduman acuremi semi, "Iyem baintafi sen kim birivic emi, beni sen kim mana va birivic intena ino, bena sisinkac yunon kim baci birivic emino, 45 afo iyem baintafi sema sonemi, bena iyefi sisinkac yunon baci onemino. 46 Seni mana magagac on kacnaci yevecumpe, afo iyem baintafi sen kim birivic emi, beni ayufun kim iyem bantemino. 47 Afo iyem baintafi sen tivaya indiren iye fakemi, seni iyem bemi dain ankantecumpe, seni banta dain yinkarara mana magagac yevegaune, iyeino, seni banta anasi yivigarani yevecumpe. 48 Afo iyem baintafi sen acnaen simicdema sen tivaya iye indintemi, beni yasi bemi bemi dain ankantemino. Sena siyimeguna baya foni bemi dain ankantemino arasapac yinanin nuram. 49 Seni sesic indintac baya siyimecumpe, iyeino, sen Tifo sen sisinkac yuno, beni ne bayafi senuna sisimidemi, ne bayafi siyimenuna sisimemino. 50 Seni indigecumpe ben avayai iye kipan yaun yiminino, micnugaci macdem baya segunauci sen tifo sen sisiminic ureci yigemi siyimecumpe.