¹ Pasova man sinayon adekaci yemi. Jisasi indigami bena mana magagake yererem bey Afo vapac binanin acna yemi. Beni mana magagac kena inimbainta van anon ayini dukami, beni yenan ayen yemi arasapac mare kipemi. ² Bani bananom Yudas Isakarioti Saimonin agac, Jisasin avicman namugouc yimino van arac kin dukami. Afo yunan nan acbanac kimi, ³ Jisasi bani indigami ben Afom macden anecne ben ayan kim dukami. Beni Koti vapaten yevemi yeven Koti vapaci bintemi, ⁴ Jisasi yunan nevan yereremi ukukem beyic iyac yageti ayucman demi. Beni tauri mandemi bey agec ukuman yeukemi. ⁵ Beni nom bacyiman sivan kim demi beyic disaiporiuc yigan sesec uyinkaremi bey agec ukurukagenin tauri fo daon yinkemi. ⁶ Beni Saimon Pita vankac yeraimi, Pita bemi samemi, "Iyeno o, eni sen sigaraci sesecu sinkantefono?" ⁷ Jisasi bemi yevegemi samemi, seni ne anecnefi uvareguna eni mage iyen indiganamino, icnaemi eni indin maranonamino." ⁸ Pita bemi samemi, "Eni sen sigan iyen sesec inonamino." Jisasi bemi yevegen samemi, "Sena en agan sesec iye uankanave, eni sentinda iyem banonamino." ⁹ Pita bemi samemi, "Eni siganana iye sesec ono, sen siyam bac sicnom bac sesec ono." ¹⁰ Jisasi bemi samemi, "Iyem baintafi non durukemi, beni no iyen dintemino, ben agananan sesec uankanonamino. Yigeni non durami yigen yofac avogugici ugemino, afo macdena yofac avogugic ugenaino. ¹¹ Jisasi bani indigami bemi iyec avicman namugouc yimintenafi, mini vani beni semi, " Macde va sesecuge avogugic uganaino." ¹² Jisasi beyic disaiporiuc yigan sesecu yinkaman kiparemi, beyic yageti manaremi yevegen kumandemi, semi, "Yigeni mana avucavac uvanyinkaunaic anda indugegafono? ¹³ Yigeni semi sareci, tisa o, seci Iyeno o, seci amino, afo yigeni antekam bayan samino. Seni tisa bei, Iyeno becumpe. ¹⁴ Afo sena Iyeno namac Tisa namac bec, yigen yigan sesec uranaci, oganic uregaci eno yigandac sesecu yinkago. ¹⁵ Seni micnogo vani yocyigecumpe, afo yige yacbac sena yigem micnu yinkaunaigac ogo. ¹⁶ Fuga ugami sireci yigemi siyimentecumpe, "Yogam baintai beni beyic dafisindac iyen yankagagemino, afo baya marem bevam bainta bema sankam bainta vac iyen yankagagemino. ¹⁷ Ena mini anecneuc onagantei, ena mini anecneuc uvarantei eni avoguci maranonamino. ¹⁸ Seni yigem macde va siyimegaune, afo seni iyeuyafi bani uyacman dukauna benone, afo mana mini i man yo santam maro amankagic ino vani secumpe. 'Beni iyefi senamac breti nanani beni sentic namugoic intemi.' ¹⁹ Yigemi mage siyimecumpe, mini anecne iye ampankaci, mini anecne ampaminaci yigeni birivic inagomino, Seni Seyakaci Becumpe. ²⁰ Fuga ugami sireci yigemi siyimecumpe, "Iyem baintafi sena sankanuna avigantemi, beni semi sivigantemino, afo iyem baintafi sema sivigantemi, beni bena sisinkam baci avigemino." ²¹ Jisasi mini baya sirami, benji ayo ina gimi umar aremi. Beni afotagic uremi semi, "Fuga ugami sireci yigemi siyimego ygen kinke mayan semi sivicman namugouc yiyan kin dantemino." ²² Disaiporiuc ben onam ben onan ureni, beni iye naraci senafino sireni amucna indirici eno. ²³ Mana disaipori, Jisasi benana ayeni, beni kandandagac Jisasin kac munkuemi dugami. ²⁴ Saimon Pita ayam po mini disaipori avavec uremi, semi, "Ben indaono beni iye naraci sagenafino." ²⁵ Afo beni Jisasin agekac munkugemi, bemi indaemi, Iyeno o, eni iye naraci sefono?" ²⁶ Afo Jisasi bemi samemi, Seni breti mandec supu non kin dareci bemi amentecumpe. " Beni breti supu non kin daremi beni Yudasimi amemi, Saimon Iskariotin agaci. ²⁷ Afo icnaen Jisasi breti amicdami, bananom ben kin umpecimi Jisasi bemi samemi, "Ena ne anecnefi uvararare sinona, agage uvarano." ²⁸ Afo mana bainta vac kandanda gac kumantageou iyen indigano Jisasi ne anda varaci Jisasi mini baya benani senafi. ²⁹ Manaca indimani, Yudasi monoc unam fakaruka bami, man sinayon omac kac nanayon yuna na anecneuc ayac en yino varac sankenafi, haca, iroc an inimbaintauc anecneuc yimino varaci senafino indirici eno. ³⁰ Yudasi breti mandemi, eseci yererem bemi. Ayufumi bami. ³¹ Yudasi buimi, Jisasi semi, "Mage Banta Agac ano avic mandanami, Koti ben kimi Banta Agac kimi anon avic marantemi. ³² Afo Koti Banta Agac kim avic mandanami, Koti beyacbaci Banta Agac kim avic marantemi, afo beni esec manac yaci avic marantemi. ³³ An intaugo seni sito kac yigenamac fa bantecumpe. Senani sifakanagomino, micni Yudauc seni siyimecumpe, 'Sena begunafac iyen yinagomino." Afo mage yigem baci mini baya siyimecumpe. ³⁴ Mage yigemi oyan lo yimentecumpe, yigeni amankac ena ugaci yivacbac uyinkago, seni micnurec yigen yivacbac egunaic uregaci, yige yacbac ena ugaci yivacbac uyinkago. ³⁵ Mini avucavac uvaranagom poni banta anasi yigemi yonantenone, yigeni sentic disaiporiuci bamino, yigena enau kim yivacbac dukege." ³⁶ Saimon Pita bemi samemi, "Iyeno o, eni nafagac befono?" Jisasi bemi yevegen samemi, "Eni sena begunafac mage iyen sivakure yinonamino, afo icnaemi eni sivakure yinonamino." ³⁷ Pita bemi samemi, "Iyeno o, nagac evagaci seni mage en avakure iye bontegafuno? Seni enani fugontecumpe." ³⁸ Jisasi bemi yevegemi samemi, "Fuga ugami sireci emi samego, kokori iye a sigana, eni kandac manavac yaci senani umerare se, bemi iye onagauno sinonamino.