¹ "Yigeni ecan yigen yirac umaruc iye uvikano. Yigeni Kotin kim birivic egaci, sen kim bagac birivic ogo. ² Sen Tifon amac kimi amucna rumu bemino. Iye bageninaci yigemi siyimiraruna ino, nevarai seni oraeci maro yigen yic magu sesac uman dantecumpe. ³ Afo sena oraec maro sesac uman deci ovaegec ye yiviganac sen namac ovanagomino, micnuranaci sena banunagac, yige yacbaci banagomino. ⁴ Yigeni onagamino sena beguna asapac." ⁵ Tomasi Jisasimi samemi, "Iyeno o, yenamac iyen onagecumpe ena banafac, inkenic uregaci yenamac mini asapac onanuno?" ⁶ Jisasi bemi samemi, "Seni ani becumpe, seni fuga baya becumpe, seni ayum fa van becumpe, mana bainta sen Tifo vapac iyem yintemino, iyeino, sen kin nare yeraen intemino. ⁷ Afo yigena sen sonagageci, sen Tifom baci onagararomino. Afo mage mana gacke yigeni bemi onageci, bemi aci onamino." ⁸ Filipi Jisasimi samemi, "Iyeno o, yenamac Sifon yotigaranami yenama sic siyin amankagic usinkantemino." ⁹ Jisasi bemi samemi, "Filipi o, seni enamac iyakaci bageguna eni semi iyen sonarukanamino? Iyem baintafi sema sonarukemi, beni sen Tifon aci onemino. Inkecnigac eci eni se, 'Yenamac Sifon yotigano'? sefono. ¹⁰ Eni birivic iyec efono seni se Sifon kim baunami, sen Tifo sen kim benine? Macdem bayauc yigen siyimegunai, sesic indintaga siyimegaune, iyeino, sen Tifo sen kim ayum bayi beni beyic yogan maremino. ¹¹ Yigeni sen kim birivic ogo seni se Sifon kim baunami, sen Tifo beni sen kim bemino, haca iye micneci, sena yogeguna yogaruc kac onegaci birivic ogo. ¹² Fuga ugami sireci yigemi siyimecumpe, "Iyem baintafi sen kim birivic emi sena yogeguna yogaruci baci yogantemino, afo beni mana yogaruc baci yankagaren anon yogaruc uvarantemino, nevarai seni se Sifo vapaci becumpe. ¹³ Yigeni ne anecne varafi sen sivic kim indauraci, seni uvandanami minifoni sen Tifo anon avic bey Agac kim marantemino. ¹⁴ Yigeni ne anecne varafi sen sivic kin indauraci, seni uvarantecumpe. ¹⁵ Yigena sen sivacbac usinkanteci, sen tivayauc lo gim bami avakurinagomino, ¹⁶ afo seni se Sifo vapac inantenami, beni ena Avacbac yigen yiminami, yigen namac sipac bantemino. ¹⁷ Beni fuga bayaic Ayo Inta ino. Mana magagac kena inimbaintauc bemi iye maranteno, nevarai bemi amankac iyen onanteno haca indiganteno. Afo yigeni bemi onagamino, nevarai yigen namaci ayum bemi, yigen kimi bantemino. ¹⁸ Yigemi aso intauc kacnac yere iyen yinkantecumpe, seni yige vapac ovaege yentecumpe. ¹⁹ Sito kaci bemino mana magagac kena inimbaintauc iyen sonantenone, afo yigeni sonanagomino. Micnugaci seni fani ayum baunaci, yige yacbac ayum fani banagomino ²⁰ Mini nurami yigeni indin maranagomino seni se Sifon kimi becumpe, afo yigeni sen kim bamino, afo seni yigen kimi becumpe. ²¹ Iyem baintafi sentic lo eraruren fakaruken avakureva, beni semivfuga siremi sivacbac emino, beni iyefi sema sivacbac emi, sen Tifo vaci bemi avacbac uankavanaci se yacbaci avacbac uankareci seni bemi seyaran yocagantecumpe." ²² Yudasi (Iskariotin nara se) Jisasimi samemi, "Iyeno o, negac iyaci eni yenamac eyaran yotigareci mana magagac kena inimbaintauc iye yocyigantefono?" ²³ Jisasi bemi yevegemi samemi, Iyem baintafi sema sivacbac emi, beni sen tivaya avakurintemino. Sen Tifo bemi avacbac uankevanaci, bende benamac yevantecumpe. ²⁴ Iyem baintafi sema sivacbac iye emi, beni sen tivayauc iyen avakurintemino. Mana bayauc yigena indami, sentinda va ino, iyeino, sen Tifo sen sisinkac yunon inda ino. ²⁵ Seni yigen namac managac fa beci, mana anecneugani yigemi siyimecumpe. ²⁶ Micnugaci, Ayo Inta yigen Yiyayini yigen eran yiminani sen Tifo sen sivic kimi sankanami yintemino. Beni macden anecneuci yigemi siguru yimintemino. Afo beni yigen yic indin ukukayinkaranaci macdem bayauc yigen yimuna yevegen indin yimintemino. ²⁷ Seni yirac nanayini yigen namaci decumpe. Seni yigemi sesic yirac nanayini yimecumpe. Seni mana magagac kena inimbaintauc yiman yimiriga egaune. Yige yirac kin ecanaci umandac iye yirinac begaci, iye vaci fegago. ²⁸ Yigeni indaci seni mana baya yigemi siyimecumpe, 'Seni yerereci bontecumpe, afo seni yige vapac ovegec yentecumpe.' Yigeni sema avacbac usinkeci, yigeni amankaci yimusim maranagomino, nevarai sen Tifo vapaci seni bontecumpe, sen Tifo beni sem baci yankagagemino. ²⁹ Mage yigemi siyimecumpe, mini anecne iye ampankaci, afo mini anecne ampaminaci, yigeni birivic inagomino. ³⁰ Seni amucna baya yigen namac iyen sentecumpe, nevarai mana magagac kena dafisin aci yemino. Beni amankac semi iyen davac intemino, ³¹ afo mana magagac kena inimbaintauc yeni indintenone, seni se Sifomi sivacbac uankecumpe, seni sen Tifo sisiminici ecumpe. Yicya managake ukukec bono."