¹ "Seni fuga waini yani becumpe, afo sen Tifo waini anayo afo bemino. ² Sen kim ben agan iye irevan ayamaruc beni akecyaremi karucdemino, afo beni agan irevan ayamaruc afisaman avogugic uman demino, micnuranami amucna agan irantemi. ³ Yigen bani avogugic ugamino sena siyimuna baya foni. ⁴ Yigeni sen kim bagaci, seni yigen kim bano. Waini yay ayaman anonko gim iye agac kemi agan iyen irantemino, micni manan ugemino, yige yacbac sen kin agackeci amucna agan iranagomino. ⁵ Seni waini yani becumpe, yigeni ayamaruci bamino. Iyem baintafi sen kin agaganac ben kin agac kanami benivamucna agami irantemino, nevarai, ena sen kin iye bantei mana anecne iyen uvaranonamino. ⁶ Afo mana bainta sen kin iye banami, ayaman kacnaci akecyare karudami acyan kainani, minibayamaru yureni iga gin karucdami, iga gaman kagic antemino. ⁷ Afo ena sen kin bananama, sen tivaya en kim bana, ne anecne varafi ema ayeninani inda vac ono, emi uvar ankantemino. ⁸ Mini avucavac poni sen Tifo anon avic maranaci, yigeni amucna agan iranagom poni seni yigemi yonamani sentic disaiporiuci bami. ⁹ Sen Tifo sen tivacbac usinkanic ureci yigem bac yivacbac uyinkecumpe. Yigeni sen tivacbac kinac bago ¹⁰ Afo yigena sentic lo avakureci, yigeni sen tivacbac kimi bamino, afo seni micnureci se Sifonic lo avakureci, ben avacbac kimi becumpe. ¹¹ Seni mini bayauc yigen siyimuna foni sen simusin yigen kim banami mini foni yigen kin yigen yimusin uvikantemino. ¹² Mana senti lo ino, sena yigen yivacbac uyinkegunaic uregac enaugac yivacbac uyinkago. ¹³ Mana bainta anon avacbac mana vac yankagen iyen dukemino, bena bey agona vana amankac fuginanimi. ¹⁴ Yigeni sena siyimenuna anecneuc uvaranteci yigeni sen sigono banagomino. ¹⁵ Yigenani sentic yogam baintauge sirec iyen sentecumpe, navarai yogam bainta benic dafisin ne anecnefi uvarenimi iyen onagemino. Yigenani sen sigono ugen secumpe, nevarai maden anecneuc se Sifom pate indunauc yigemi siyimecumpe. ¹⁶ Yigeni semi iyen ugac dukamino, iyeino, seni yigemi ugac dukecumpe yigeni amankac oraeci agan irago vani seni siyinkecumpe, yigena yocdanagon agami fani bantemino. Micnugemifo, yigena sen Tifom pac ne anecne varafi sen sivic kin indainami, beni emi amintemino. ¹⁷ Mini anecneugani yigemi siyimecumpe, yigeni ena inimbaintuga yivacbac uyinkago. ¹⁸ Afo magagc kena inimbaintauc yigema namugoic uyinkevage, yigeni omaregac indego, yeni bani senaren namuoic usinkareni, yigemi namugoic uyenkenone. ¹⁹ Afo yigena magagac kena inimbaintauc bani, magagac kena inimbaintauc yigemi yeyindaic ureni yigemi yivacbac uyinke vaci yen yivucyivaguc uvaranagomino. Afo yigeni magagac kena inimbaintauc iyem bamino, micnugaci seni yigemi ugac deci yigemi mana magagac ke fasapac acduini, mini anda foni yigemi namugoic uyinkantenone. ²⁰ Yigeni omaregac indego sena yigen siyimuna baya, 'Yogam bainta beyic dafisindac iyen yankagagemino.' Afo sema mandaic usinkeni, yeni yigem baci mandaic uyinkatenone, afo yena sen tivaya indeni, yigen yivaya vaci indintenone. ²¹ Yeni sen sivic gani macden anecneuc yigemi uvanyinkantenone, nevarai yeni bena sisinkac yunomi iye indigenone. ²² Afo sena iye yeraec iye siyimicdukagegunani, yeni manda anda iyen uvandukararomino, afo mage yeni yeyic manda anda ayofanayon ani iyem bemino. ²³ Afo iyem baintafi sema namugoic usinkemi, sen Tifom baci namugoic uankantemino. ²⁴ Afo seni yogaruc eno anic urec yen yicbanac kim iye uvandukagegunani, yeni manda anda vac iyen dukararomi, afo yeni bendekara, sen nama sen Tifon namaci namugoic usinkenone. ²⁵ Afo mana avucavac ampamenimi bani yeyic lo gin sandukageyomi mage afotagic ugemino. 'Yeni mana umandac iye vankake semi fayande ugami namugoic usinkenone.' ²⁶ Afo seni yigen yiyayini sankanami sen Tifom pate yige banagompac yintemino, beni, Fuga Bayaic Ayo Inta ino. Beni sen Tifom pate yeraemi sentic yogarani siyimintemino. ²⁷ Yige yacbagaci ena inimbaintauc siyiminagomino, nevarai yigeni sen namac anantapate bagegomino.