¹ "Mana bayauc siyimuna foni yigeni birivi gin iye yan dinagomino. ² Yigemi mam mac kinkake siyinkamani mapac daci man iyen sinagomi. Fuga ugamino, Mana acna acdekaci yevemino, banta yiram baintauc yigen yirureni yeni indiman Kotimi avoguc yogaric uankecumpe indirici intenone. ³ Yeni mini avucavaguc yigemi uvanyinkantenone, nevarai yeni sen Tifon iyen onageni, sem bac iyen sonagenone. ⁴ Seni mini anecneugani yigemi siyimecumpe, micni siranam bageninamaaài mini acna yinaci yigeni sena siyimuna anecneugani omare indinagomi. Seni mini anecneugani acnantapac iyen siyimecumpe, nevarai seni yigen namac bagecumpe. ⁵ Afo mage bena sisinkac yuno vapaci seni bontecumpe, micnugaci yigen kinke maya vac semi iyen indaomino, 'Nafagac eni befono?' ⁶ Afo mini anecneugana siyimuna foni yigen yirac kim yigun anecne uvikagemino. ⁷ Afo seni fuga ugami sireci yigemi siyimecumpe, seni yigen yic avogugani bontecumpe. Nevarai sena iye bonami, yigen Yiyayin Bainta iyen yintemino, afo seni oraeci bemi sankanami yige vapac yintemino. ⁸ Afo bena yeraemi, yigen Yiyayin Bainta afotagic uremi magagac kena inimbaintauc manda andauga, anteckan avucavaguga, Kotinic ko gan yocyigantemi. ⁹ Beni manda andauc afotag yocyigantemi, nevarai yeni sen kin iyen birivic eno. ¹⁰ Beni afotagic uremi antekan avucavaguc yocyigantemi, nevarai seni se Sifo vapaci bontecumpe, afo yigeni semi iyen sonanagomino. ¹¹ Beni afotagi uremi Kotinic ko gan yocyigantemino, nevarai mana magagac kena dafisin koc kaci mage ukukagemino ¹² Seni amucna anecneugani yigemi siyimentecumpe, afo yigeni benic anda van mage iyen indinagomino. ¹³ Afo, Fuga Bayaic Ayo Inta yintemi, beni macden fuga avucavaguc kim ayuvic yinkantemino, nevarai beni beyarani iyen siyimintemino. Afo beni ne anecne varafi indinanimi siyimintemino, beni yinanin anecneugani yigemi siyimintemino. ¹⁴ Beni sen sivic yanic intemino, nevarai ne anecneugafi yigen siyimecma uvarageguna anecneugani beni siyimintemino. ¹⁵ Macden anecneuc sen Tifo dukami, sentinda bemino. Micnugami, Ayo Inta macden inimbainta siyimintemino sen tivayauga, namac sentic yogaruc namac fugan sigemino. ¹⁶ Sitoc acna gimi yigeni semi iye sonanagomino, afo icnaen sito kac bageci yigeni semi sonanagomino." ¹⁷ Afo manaca disaiporiuc ye yiran a sireni, seno, "Nevarac beni yigeunamac sisimenaci, sem, 'Sitoc acnagaci semi iye sonanagomino, afo icnaen sitoc acnagaci bageci semi sonanagomino, 'Nevarai seni se Sifo vapaci bontecumpe'?" ¹⁸ Micnugani yeni seno, 'Sitoc acnagaci'? Yenamac iye indigecumpe beni ugaraci beni senatino." ¹⁹ Jisasi yonani ben indairar ami yemi siyimemi, "Yigeni mana anecneugaraci yige yiran indaoc no gafono, nevarafi sena segunai, 'Sitoc acnagaci semi iye sonanagomi, afo sitoc acnagaci bageci semi sonanagomino'? ²⁰ Fuga ugami, sireci yigemi siyimego, yigeni amucna bayauci sirec ific dec banagomino, micne vani magagac kena inimbaintauc yimusimi kimi banteno. Yigeni anon yigun anecne gimi banagomifo, afo icnaemi yigen yigun anecne baemani, yimusinici intemino. ²¹ Anasi am magarani anon agun anecne gimi bantemi nevarai am magar acna yevamino. Afo icnaen am macdemi anavisic maragenin yankagainami, beni amusin kimi bantemino, nevarai beni banta mana magagac ampaminani amusim maremino. ²² Micnugaci, yigeni mage yigun anecne gimi bamino, afo sena yigen yevegec ye yonanami yigen yirac kim yimusin anecne uvikanami, amankac maya vac yigen yimusim mandan fasapac iyen dantemi. ²³ Mini nuran yinaci yigeni mana anecne van semi iyen indainagomino. Fuga ugami sirec yigemi siyimego, yigeni sen Tifo vapac sen sivic kim macden anecneugan indaimi, yigemi yimiric anan intemino. ²⁴ Bana yenin kake semi mana anecne vandac sen sivic kin iyen indaurukamino. Yigeni indauregac marago, minifoni yigen yimusimi uviken amankagic uyinkantemino. ²⁵ "Seni macden anecneugan yigen siyimunai, baegam baya ginke manan siyimagecumpe, afo icnaemi mini nuran yemino, baegam baya ginke iyen siyimentecumpe, iyeino, seni se Sifonan siyimenunai, antecdeci yigemi siyimentecumpe. ²⁶ Mini nurami yigeni sen sivic kin indaurac seni macni sirec yigemi iyen siyimentecumpe, seni se Sifo vapac sogam mukurec yigenan indau yinkantecumpe iyen sentecumpe, ²⁷ nevarai yigen Yifo yigemi avacbac uyinkemino, nevarai, yigeni semi yivacbac usinkareci yigeni senani Koti vapate yevemino sireci birivic amino. ²⁸ Seni se Sifo vapate mana magagac yevecumpe. Afo seni mana maga yerereci seni se Sifo vapaci bontecumpe." ²⁹ Benic disaiporiuc seno, "Onano, eni anteci re yenamc sisimanamino, baegam baya ginke iyen sanamino. ³⁰ Yenamac mage onecumpe eni macden anecneuc onaganamino, emi mana bainta vac amankac iyen indaintemino, Mini anda foni yenamac en kim birivic ecumpe, eni Koti vapaten yevanamino." ³¹ Jisasi yemi yevegen siyimemi, "Yigeni magec birivic egafono? ³² Onagao, mana acna aci yemino, eyo, fuga siremi yemino, yigeni yererec mana mana inagomino, umacde yige yimac kinkaci oraeci, senakaci yere sinkanagomino. Micninagomifo seya kac iyem bantecumpe, sen Tifo senamaci bemino. ³³ Seni mana bayauc yigemi siyimunai, yigeni sen kimi nanayin maranagomino. Mana magagac yigeni umaruc dukamino, afo yigeni eraruregac bago, seni mana magaic erani arumani davac urukecumpe."