¹ Mana bainta bami, ben avic Nikodimasi bami, beni Farisi bemi Yudauc yicnom bainta bami. ² Mini bainta ayufumi Jisasi vapac yeraemi, bemi samemi, "Rabai o, yenamac indigecumpe eni tisa be, Kotimpaten yenamino, nevaraino yenamac emi onauna ena enac ugan avucavaguci uvaranamino, maya ena uvarana anecneuc iyen uvarantemino, afo Koti benamac banami, beni amankaci." ³ Jisasi bemi yevegen samemi, "Fuga, fuga ugamino, maya amankac oyanic iye ugemi, beni inarum magu iyen onantemino." ⁴ Nikodimasi bemi samemi, "Inkenic urenaci banta yevegem ben ano magantenafino bena ayogun kaganane? Beni bey anon arakin yevegen ena yacbac undainan bemi amankac yevegen iye magantemino, beni amankagafino?" ⁵ Afo Jisasi bemi samemi, "Fuga, fuga ugane, banta non kim bac Ayo Inta gim bac yevegen oyanic iye emi, beni Kotinic inarum magu gin iyen urintemi. ⁶ Ne anecnefi o ampandanami, o bemino, afo ne anecnefi Ayo Inta ampandanami Ayo Inta bemino. ⁷ Eni anduc iye dono mini vana ema macni sirec samena, 'Yigeni yevege gaci oyanic ogo.' ⁸ Sisova bena birar ayimpaci bemino, eni sisova a sevana indinonamino, afo nafatec yeraenaci nafagac benafi eni iyen onanonamino. Micni manan intemino, iyefi Ayo Inta gin oyanic inami." ⁹ Nikodimasi bemi yevegemi samemi, "Inkenigac urem mini anecne ampamintenafino?" ¹⁰ Jisasi bemi yevegemi samemi, "Eni Israeri yic tisa banamino, afo eni nagac eci sena seguna anecneuc eni anufare indi ic iye efono? ¹¹ Fuga, fuga ugami sirec emi samentecumpe, yenamac indigauna anecneugani siyimecumpe, afo yenanamac onarukauna anecneugani siyimecumpe. Micnugaya eni yenamac sameguna iye maranamino. ¹² Seni magagac kena anecneugana siyimanac iye birivic inteci, inkenic uregaci inarumpatena anecneugan samenac birivic integafono? ¹³ Maya vac inarumpac iyen umbemino, afo maya inarumpate kumiyi mana ino, beni Banta Agac ino. ¹⁴ Mosasi afac magafac meman kun dondan yanic eninic ureni Banta Agac bac kun dondan yanic intenone, ¹⁵ minifoni iyen inimbaintafi ben kim birivic inani iye kipan aum marantemino. ¹⁶ Koti mana magagac kena inimbaintau gani anon ayiric emi, mini foni bey Agac mana inta mana dukemifo, beni yimemi, afo iyefi ben kim birivic inani iyen oyogantemi, iyeino, beni iye kipan aumi marantemi. ¹⁷ Koti mana magagac kena inimbaintauc koc yimino vara sankana yenai, iyeino, beni yen yivigano vani sankami yemi. ¹⁸ Banta Kotin Agac kim birivic inani iyen oyogantemi, afo banta birivic iye inani, beni oyokemi, nevarai, beni Kotinic mana inta Agac avic kim birivic iyen emi. ¹⁹ Afo mana kogic anda macnimugemi. Mini omi mana magagac yemino. Afo banta anasi ayufun anda vani yiyemino, mini o nan iyen yiyemino, nevarai, yen yivucyivac mandaici ugami. ²⁰ Macden inimbaintauc manda andauci uvarenone, yeni onan iyen yiyevani on kac iyen yenone, nevarai yenyic manda andauc afotagic inanin agani yeni fegenone. ²¹ Afo, fuga avucavac uvaran inimbaintauc, yeni on kac yenone, ena inimbaintauc yemi yonareni yenani omare indinteno, yeni Kotin ayini avakurenone." ²² Mini yankagaimi, Jisasi beyic disaiporiuc namac Yudia magafac beno. Beni yenamac bemi banta anasi nom manyinkevami. ²³ Afo Yoni vaci Ainoni magugimi Salini magu adekaci banta anasi nom manyinkevami, nevarai mini amampac amucna nomi bami. banta anasi be vankac yeraeni nom marevano. ²⁴ Nevarai mini yamuc Yoni karavusic iyen ovami. ²⁵ Icnaemi Yoninic disaiporiuc namac mana Yuda bainta namac ye youc sesec ure avogugic ugar anda vani baya foni yirueno. ²⁶ Yeni Yoni vapac oraeni bemi sameno, "Tisa o, enamac Yodani nom mecyan ofac bagenim bainta, eni benana yenamac sisimeno, beni banta anasi nom manyinkevani bena vapaci macden inimbaintauc benone. ²⁷ Yoni bemi yevegen samemi, banta mana anecne iye marantemino inarumpatena Koti ben iye aminane. ²⁸ Ne bayafi yigema siyimuna yigenafoni indigamino, seni macni sireci siyimecumpe, "Seni Kraisi va begaune,' iyeino, beni iye yigami senaren sisin kac yecumpe.' ²⁹ Anasi iyefi banta maranani benanam mini bainta anac bantemino. Afo ben aganda ukukagemi banta anasi marananin amer indemi anon amusimi marem bemino banta anasi marananin amer indemi. Mini foni sen sirac kim simusin uvikemino. ³⁰ Ben avic yanic inanaci, sen tivic kumino. ³¹ Iyefi banta inarumpate yevanani beni macdem bainta yankagagemino. Iyem bantafi magagakeno bemi, beni magagackeno bemino. Micnugami beni magagakena anecneugani semino. Afo iyefi banta inarumpate yevanani, beni macdem bainta yankagagemino. ³² Beni indiren onarukan anecneugani facbaremi siyimemino, afo bainta vac bena siyimin bayauc iyem birivic enone. ³³ Afo iyem baintafi mini baya gim birivic emi beni Kotinani fuga sigemino simani erar intemino ³⁴ Micnugami mini bainta Koti sankan yiganani, beni Kotinic baya siyimintemino. Nevarai Koti bemi Ayo Inta amimi, ben kin uvikagemi. ³⁵ Ben Afo bey Agac anon ayiric uremi macden anecne ben ayan kimi dam bemi. ³⁶ Banta Kotin Agac kim birivic inani, beni iye kipan aumi marantemi, afo ben Agac avaya arinani, beni iye kipan aun iye marantemi, Kotin aran anecne ben kim bantemi."