¹ Jisasi Yonim bac yankagaremi amucna inimbaintauc disaipori ic uyinkaremi nom manyinkevami. Mini van beni indimi Farisiuc mini anecneuc uvarevanani indeno, ² (Jisasi benafo non iyem manyinkevami, benic disaiporiuci manyinkevano), ³ beni Yudia magafac yereremi Galili magafaci bemi. ⁴ Beni Samaria magu ginkac oraem binami amankagic intemi. ⁵ Beni Samariaic mana taoni Sikari oraemi, mini maga adekaci Yegopi bey agac Yosepin amicdukami. ⁶ Yegopinic nom masic minigaci bemi. Jisasi iyakac yagenimi afogami, mini nom masic adekaci ye kumandemi. Igona amuni 12 kiroki amami bami. ⁷ Mana Samaria inini non yafirani yeraimi, Jisasi bemi indaemi, "Non yactiminac nano." ⁸ Benic disaiporiuc yunanuc ayac irani taonifaci bugano. ⁹ Afo mini Samaria inin bemi samemi, "Nagac eci eni Yuda bainta, semi Samaria inini non amena naran indaefono?" Yudauc namac Samariauc mana avucavac kin iyem benone. ¹⁰ Jisasi bemi samemi, "Eni Kotinic avoguc anecne yimevanan indukagefi afo iyec emi indaenaci, 'Non yactiminac nano,' senafi, eni amankaci bemi indainami, beni emi ayum fa van nomi amirarimino." ¹¹ Mini inin bemi samemi, "Iyeno o, eni bageti iyen dukanami, mom masici macmen ugami kumbemino? Eni nafagac ayum fa van nomi dukefono? ¹² Eni mayau sifon Yegopim baci yankagagecumpe indirici anamino, beni mana nom masic yenamac simicdemi, beni bey agafandauc namac benic safurauc namac mini ginke nevanone?" ¹³ Jisasi bemi yevegen samemi, "Maside iyefi mana nom masic kinke narami yevegen yiyem manam bantemino, ¹⁴ afo iyefi sena amenuna non naranami ena yacbac yevegen iyen ayintemino. Afo, sena amenuna nomi ben kinke nom masic kacnac ugemi, ben kinke kumem mana bemi, iye kipan aum bemi amintemino." ¹⁵ Mini inim bemi samemi, "Iyeno o, mini non simeno, siminac naranan iye siyinac ovaege managac non yafiran iye yeno." ¹⁶ Jisasi bemi samemi, "Ey avafun o avicmanare managac yeno." ¹⁷ Mini inin bemi yevegen samemi, "Seni banta iyen dukecumpe." Jisasi bemi yevegen samemi, "Eni antecire senamino, 'Seni banta iyen dukecumpe,' ¹⁸ nevarai, eni mana yacman bainta dukageonami, afo mage benamac bana bainta en avafuva benaino. Ena senai, fugan senamino." ¹⁹ Mini inin bemi samemi, Iyeno o, seni mage indecumpe, eni profeti banamino. ²⁰ Mayau sifo unam mana anugaci man sevanone, Afo yigeni seci Yerusaremi magugimi banta anasiuc man sintenone. Iyeci fuga senafi?" ²¹ Jisasi bemi samemi, "Anasio, sena senuna gim birivic ono, mana nuran yintemino, mana anugac bac Yerusaremi magu gim bac yigeunamac sifon kac man iye sinagomino. ²² Yigeni iye indigan anecne gaci man samino. Yenamac indigauna anecneu kaci man secyamumpe, nevarai yevegen yivigar anda Yudauc paten yigemino. ²³ Micnugami, mana nuran yemino, mini nuram aci mage managaci yevemino, fuga man san inimbaintauc mayau sifon kac Ayo Inta gim bac fuga anda gim baci man siankantenone, micnugan inimbaintauc benkac man sego vani mayau Sifo afakemino. ²⁴ Koti Ayo Inta bemino, afo banta anasi bem man siankarani ayo inta gim bac fuga anda gim bagac man siankago." ²⁵ Mini inin bemi samemi, Seni indirukecumpe Mesaia yinaninani (benani Kraisine senone). Bena yemi, macden anecneuc anufaremi baeden yenamac sisimintemino." ²⁶ Jisasi bemi samemi, mana mini seni beci, mage enamac a secumpe." ²⁷ Afo mini acna gaci benic disaporiuc yeraeno. Yeni amucna indiric eni negac enaci anasi namac a senafino, maya vac iyen indaemi, "Nevarai eni afakefono?" haca "Nagac eci eni benamac a sefono?" ²⁸ Afo mini inin beyic non Kura minigac yere remi yevegen taonifac oraemi, banta anasi siyimemi, ²⁹ "Yego, mana bainta sena macden anecne uvaragegunau gani sisimemino. Sena indunami mini bainta i Kraisic bantenafino?" ³⁰ Yeni taoni yerereni bena vankac yeraeno. ³¹ Mini acna gimi, benic disaiporiuc bemi avankeno, "Tisa o, yunan nano." ³² Beni yemi siyimemi, "Seni yunan nanuna dukauna, yigeni iyen indigamino. ³³ Afo disaporiuc ye yirani amucna baya seno, "Maya nananinuc mare amicdukeyafono?" ³⁴ Jisasi bemi siyimemi, "Sentic yunami bena sisinkac yunonic ayir avakundec benic yogan mandani maro kipantecumpe. ³⁵ Yigeni iyevac sego, 'Yunan unafinayon acna er iye van igona fa bemino.' Seni yigemi siyimecumpe, yugam macman yanic urec anayouc onago, mini yunanuc bani afugagemino unafogo vani. ³⁶ Iyeuyafi unafinayouni ayac mandeni aganuc baguyinayomi, iye kipan yaumi marantenone, minifoni iyefi yoganani vac iyefi unafinani vac managimi yimusim marantenone. ³⁷ Micnugami mana baya fugan sigemino, 'Maya yocdami, eno unafemi.' ³⁸ Yige iye yocdan unafogo vani siyinkecumpe. Eno yocdan kimi, yigeni yena eran yogaric urami omar unafamino. ³⁹ Mini inin siyimin baya indireni amucna Samaria inimbaintauci birivic eno, "Macden anecneuc sena uvaragegunauci beni sisimemino." ⁴⁰ Micnurani Samaria inimbaitauc bena vankac yeraeni, beni yenamac bano vani indaurami, yenamac kantan nurami bagemi. ⁴¹ Amucna inimbaintauci ben avaya indireni birivic eno. ⁴² Yeni mini inini sameno, "En avaya va yenamac indirec birivic egaune, iyeino, yenamac senafoni ben avaya indireci onaunami, mana bainta benana mana magagac kena inimbaintauc yevegen yivigantemino." ⁴³ Afo kantan nuran yankagaimi, mini gake Galili faci bemi. ⁴⁴ Jisasi beyarani facbaruren siyimemi, mana profeti beyic magugin avic iyen dukemino. ⁴⁵ Afo Galili magugin yeraini, avogugic ureni bemi avigeno. Yeni onami Yerusaremi magugim Pasova omac kac macden anecneuc uvarevami nevarai, Pasova omac kac ye yacbaci ovageno. ⁴⁶ Afo beni ovegen Kana taoni gim, Galili magafac yeraemi, beni mini magugimi non ugam baecdami waini ic emi. Mana bainta Kapenaumi kinic ofisi gin dafita bemi ben agac ac evami bami. ⁴⁷ Beni indimi Jisasi Yudia fate Galilic yevami, beni oraemi Jisasi kundaena ben agac fugirani evami ayofano vani indaemi. ⁴⁸ Afo Jisasi bemi samemi, "Enac ugan avucavaguc iye onei, eni iye birivic inonamino." ⁴⁹ Kinic ofisa bemi samemi, "Iyeno o, sen tigac iye fukana senamac yinac kumono." ⁵⁰ Jisasi bemi samemi, "Bono. En agac fani ayum bemino." Beni Jisasi siram baya birivic emi, yereremi bemi. ⁵¹ Beni asapac kumevami benic yogam baintauc ye onareni, bemi sameno, "En agac fani ayum bemino." ⁵² Afo yemi inadaemi igona amun negagaci kuganden ayofan marenafino. Bemi yevege sameno, "Nurami wan kirokin ac yere ankemino." ⁵³ Afo ben afo omare indemi mini acnagaci Jisasi bemi samemi, "En agac fani ayum bemino." Mini ampamin onareni, benamac ben amac kim ban inimbaintauc namac birivic eno. ⁵⁴ Manai kantarici emino Jisasi Yudia yereren Galili fac yeven enac ugan avucavac uvarami.