¹ Kandac mana vac nuran yankagaimi, Galili magugimi anasi indani banta gac danteno, Jisasin ano mini gimi bami. ² Mini ginke Jisasi namac benic disaiporiuc namaci yareno. ³ Waini kipaimi Jisasin ano bemi samemi, "Yeni waini iyen dukenone." ⁴ Jisasi bemi samemi, "Anasi o, nevaraci sena baunafac ye fono? Seni mini anecneuc uvaranuna acna iyen yigemino." ⁵ Ben ano beyic yogam baintauci siyimemi, "Bena sinanin anecneuc uvararic anavac ogo." ⁶ Mini gim afac mana omandan onacban kac kura Yudauc ye yivucyiva gic eni mini gin non deni dukami bagemi. Mana onacban kura amankac 120 lita nomi fakantemi. ⁷ Jisasi yemi siyimemi, "Non yacman man kura ginkac uvikago." Afo yeni yacde bacyimani mini kura avantaci maron deno. ⁸ Afo yogam baintauc siyimemi, "Manaca yacde yunan kac dafitam bainta maro amego." Afo yeni yacde mare veno. ⁹ Yunan kac dafisin mini non waini ic ugan naren onemi, beni iyen indigami nafatec mini waini yenafi (yogam baintauc non yafageyuoni indigano). Afo beni anasi marananim bainta ararremi, ¹⁰ bemi samemi, "Umadem baintauc avoguc waini nare yimeni narani, icnaemi erandac iyevan yimenone. Afo eni avoguc waini fakare bage mage mare yenamino." ¹¹ Manai Jisasi acnaric uremi mana avucavac Kanac taoni gim Galili magafac uvaremi, beni beyic iyena avici yocyigarani, benic disaiporiuc ben kim birivic eno. ¹² Afo Jisasi bey anona bey afacunan namacbeyic disaiporiuc namac Kapenaumi faci kundaemi mini gim manaca nurami bagemi. ¹³ Pasova adekac yimi, Jisasi Yerusaremi fac uremi. ¹⁴ Jisasi yonani burimaka va sipisipi va nunuc mam mac kim sarin evano, monoc baegam baintauc baci mini gim kumantano. ¹⁵ Beni naruc mandemi mana yafi uvandemi, macdem baintauc yenyic burimaka va sipisipiuc namaci mam mac kinke yisisac uman mapac demi. Beni monoc baegam baintau yic agam monoguc kufitaman mana mana uremi, yenyic kandandauc arondan demi. ¹⁶ Nunuc sarin am bainta gani semi, "Mana anecneuc mana ginke marec bogo. Sen Tifon amac kin mageti maguic iye ogo." ¹⁷ Benic disaiporiuc Kotinic yo gin santanani omare indeno, macni sigemi, "En amagani anon siyirici emino, micnugaci seni en amac avogugic ugano vani eran yogaric ecumpe. ¹⁸ Afo Yuda dafisiruc mini baya indireni bemi maro indaeno, "Ema Koti yogar amicdukana mana anecneuc uvarevante, eni enac ugan avucavac uvande yenamac yotigano." ¹⁹ Jisasi yemi yevegen siyimemi, "Mana mam mac anakaman acnuraci, kandac mana vac nuran acbana kimi ukukaman dantecumpe." ²⁰ Yuda dafisiruc bemi sameno, "Mana mam mac 46 orande gimi uvandukaya, eni kandac mana vac nuran acbana kinac yevege ukukaman dantefono? ²¹ Micnugami, Jisasi bey o gac mam magani sevami. ²² Beni fukagenin kinke yevegen ukuka ankaranami, benic disaiporiuc mini baya Jisasi sirukagenimi omare indireni, yeni birivic eno ²³ Afo beni Yerusaremi magugimi Pasova omac kac bani, bena enac ugan avucavaguc uvarevani onareni amucno ben avic kimi birivic eno. ²⁴ Afo Jisasi yen kim birivic iyen emi, nevarai yenani bani indigagemi, ²⁵ nevarai bemi maya vac banta vani amanakac iyen saminteno, nevarai beni banta gim bami beni indigemi.