¹ Izesu nagamiku lapeku alio itimo, laoake numula apaloka apa napaloka anitimo. ² Anigalo, avisi ve mako holomalo alimiki Izesuni loka niave. Amina ve helisalagu neta gizale neive. Izesu gilizagimo anigoake nemika limo, "Izegipa neve, gogoliza vizezo nanamule. Lihimaka vanasogimi kuve." ³ Anigalo, gapo lota gako giziaka-a vete keza ini liki miliki niake la-a lamo, "Imane vemo Omasi vaika namive." ⁴ Kigika kagatagu Izesu anigoake nemika limo, "Nanamu mulutiku gili golesa niave? ⁵ Gakola-a nanave litomo lamana onoive, 'Lihima-tini ale ahulo kimikuve litohe,' ito, 'Oteoko vozo litove'? ⁶ Lekeza anigiki gililo vemini gipalamogo lihima vanaso kimiaka zamuza ale neive, ..." Izesu avise neive namika loko loamimo, "Otezo, holomaka ale oko numu kaloka vozo." ⁷ Amina ve oteake numunauka vimo. ⁸ Ve venalite utoi neta anigiake, ininaka lake Omasi agepoka lamo, nanamule imane zamuza ve kemekave. ⁹ Izesu noi-apa ahuloake novike, ve mako aguliza Matyu-ni anigamo. Amina ve takis aliaka-a vetini numuku mitamino noigo. Izesu nemika loko loamino, "Oko nemegetozo." La-a lokago amegetamo. ¹⁰ Izesu Matyu-ini numuku minoko nosa nanogo noigo, Takis aliaka vegi ito lihimalo vegenaki iki izegipala zuhagi miniki mako nosa namo. ¹¹ Mono gotolalo gizapave napate anigiake, otiake Izesuni izegipala zuha nemika liki likememo, "Nana okago tisa tinimo lihimalo vegenaki ito Takis aliaka nia vegi nosa nonave?" ¹² Liki miliki-a gako geleaka nemika limo, "Kivisi vegena nene totalo vi-aka niave ito kivisemi vegena nene totalo visa-amave. ¹³ Lekeza imane gako viki giliki anigalo, 'Neza nene milumago loaka kumuko gelenouve, guguni gizoaka kumu gele namuve.' Nanamule, heheliki-nia vegena kumu amuve o-e lihimalo vegena-lite kigika ali lamana itakumu uve." ¹⁴ Alika nene Izesu noitoka Jon-ini izegipala zuha i-ake nemika liki liamemo, "Nana okago lezagi ito mono gotolalo gizapa vegi nosa moseko numuna nolune, laimoza gei izegipa zuha nemina isa-amave?" ¹⁵ Izesu nemika loko limo, "Vena alinogonoi vemini pati-ku eza-a noigo vegenala zuhate miluma gilitamo nehe? Laimoza eza gamenala atito vena aleaka ve ahulokimi oko vinogoive, alika nene nosa mosiki numuna linigave. ¹⁶ Keke ve makolimo gosoha lavolavo aleoko hulupa lavolavo lo akota-mitanimo neve, nanamule lavolavo poloto napa itimo neve. ¹⁷ Amina minoko ve makolimo waini gosoha nene hulupa waini goku lekemino goive. Laitimo nene waini go nene polotoko golesa no-oko waini latila itimo neve. Laimoza gosoha waini goku nene gosoha waini leki milatamo apiziki gamena hanalo minanigasive. ¹⁸ Amina gako Izesu loko noigo, eza mono gizapave mako o-ake alapusa hizeamimo. Lao-ake Izesuni loamimo, "Neni mohone itinasa isiko helekave, ke-e gigizani agupelo oko molokako otitive." ¹⁹ Izesu oteake amegetako novigo, izegipala zuha amegetamo. ²⁰ Amina apatoka, eza vena mako golani ahuloaka neta gizalimo nene melekeni 12-agu. Izesuni amegesa loka oake agupelo neta nekisa loka alegilimo. ²¹ Nanamule mulunaguka alevoleoko geleneike la-alimo, "Hanua agupelo netato alegele ikatomo nene, nivisi neta asu inogive." ²² Lanoigo Izesu mino vilioko loamimo, "Mohone, gehelele vizemino; nanamule geleseketigi ani omamo zokokane." Amina gamenalo avisi neta ahulotamo. ²³ Eza Izesu mono gizapave mini numuku itimo, noitike anigamo goni huliaka ve ito vegi venaki sogosogo liki minamo. ²⁴ Nemika loko lokimimo, "Mini hoto-iki minalo imane moho koma nene helenamive hanuva akoneive." La-imoza alimi golesa iki giza-zohika lamo. ²⁵ Vegena muki limi hetoka vi asuikago, Izesu iteko agizato naligo moho komo heleneikuti otimo. ²⁶ Lolo-oko moloko igako muki apatoka vo asuimo. ²⁷ Izesu mina apa ahuloake novigo kogomula likave losi tosa amegetasimo. Gopagaliki selelasimo, "Devit-ini Gipalave, miluma gelele tozo!" ²⁸ Izesu numuku iteko novigo, amina ve losi amegetiki niasigo Izesu nemika loko limo, "Zokatimo neve liki gilizagi nasihe?" Anoto alesike nemika lasimo, "O-ho, Napateve." ²⁹ Izesu kogomulalo hitonoike nemika limo, "Gele seketi asito amina neta uto itive," ³⁰ aminalo kogomula koloimo. Alika nene Izesu lokimimo, "Lekeza imane neta kumu vegena like memilizo." ³¹ Laimoza keza viki numuini loko kugupelo utoi neta kumu aveto-iki mihina asimo. ³² Nivisigo kemegesa loka, agepa li-omina ve mako sikalahu golesa aiku minamo, ve vai-ikite alimiki Izesu toka amo. ³³ Eza sikalahu golesa agepa li-i veguti lemeheto noigo gako atelekolimo, vegena muki lite ininaka lake nemika lamo, "Imane Israel apaku gozapa utoigo anigamuha neta uto-ive!" ³⁴ Lai-moza mono gotolalo gizapave napate nemika lamo, "Sikalahu golesatini gizapave napamo zamuza amekago sikalahu golesa kimiseleko nahulave." ³⁵ Izesu taun napanapagi ito numu-apa komakoma ukagi mohona asu imo. Mono numu iku kelemo vati-oko lolale-imo. Omasimini okuluma apakumu mono gako lokemeko mohona noike, ito gopanapa neta gizale vegena kelemo zokamo. ³⁶ Ve vena vai-iki niago anigoake nene, miluma gele kimiaka noive nanamule, gena vauva loko kugupelo neigo miluma napalo giliaka niave. Lama iza ameipo nomima-miniki miniaka niave. ³⁷ Izesu izepgipala zuha la-a loko lokimimo, "Nosa neta vai-oko neimoza, hozave-a vauvaliki niamave. ³⁸ Lao-neize nosa amelahini loka napatemu numuna vauva loko litune, nosa alenupa ita hozave a-isi kimisili timo neve."