¹ Izesu anoza gakokuti gako lokimike, la-aloko limo, ² "Okulumamini kingdom nene, nene minoko neive King makolimo gipala vena alemo aminogo noike nosaneta napa alemo vati-ioma mini oko neve." ³ La-oake hozalo vela kimi selekao vamo keisi vi-iki vegena selelikao mariti nosanetatoka atave loko, la-a moazala vegena amamo. ⁴ King-nenemo goha hozalo vela nokimiseleke la-aloko lokimimo, lekelisi vi-iki sele lokumu vegena la-aliki likimilo, "Anigalo, neisi-nene mareti nosaneta nene mota ale vatiokuve, pulumaka iza apuluke ito gehatomina pulumaka izagi ito haito paito limi nosaneta ale vati okuze amina mariti nosanetato alo." ⁵ La-aliki lamoazala gele ahuliake mako nene mi-iniuka vamo, makola nene moni hozaini loka vamo. ⁶ Vegena luga-ate nene Kingmini hozalo ve-nene kigizato aliake kilimi golesa-iki kepelemo, makola nene kipili helemo kilimi gogoza helemo. ⁷ La-ikao king-nene ezapalo molokago amila kimisekao vake hozalo vela kipili hele vegena kipili helemo la-iake, numuini ito apaini vituiki ali golesa amo. ⁸ La-ikao alika-nene hozalo vela la-aloko lokimimo, 'Marit nosaneta -nene mota ale vati okuve, laonimoazala, selelu vegena amave, nanamu, keza vegena golesa minikave. ⁹ Nenemu-nene lekeza viki gapo napaloti anigata vegena seleliki kilimiki alo imane marit nosanetato. ¹⁰ La-alokao, hozalo velate gapo napalo viake vegena lamanaki ito vegena golesagi vitagaiki kilimi nupa i-ake mariti nosaneta toka kilimiki vamo. Nene mini-ikao mariti apaku vegenalite mini gikiamo. ¹¹ La-okago king nene oake ve-vena alenupa-iki nosaneta nanigi niago anigamo-nene, ve-mako nene maritigu gonalisi iti neta luhamike noigo anigoake. ¹² King-nene amina ve la-aloko loka otamo, "Nigive, gei-isi nene mariti neta luhamanike nana minoko iteko noane?" La-aloko ligo eza gako litimola-a minamimo. ¹³ La-okao King-nenemo hozalo vela lokemekago amina ve agisa agizanilo naga aliake ahulimikao limugusi napagu lemeko vimo, nene apatoka nene ive nama oko miluma napa geleko agepa atala oko minano goive. ¹⁴ Nananu, sele-nene vegena vaito omonoive laonoimoazala, Omasimo-nene vegena luguhako kelemo eto okago niave. ¹⁵ Alika nene, Farisi ve nene alenupa ake gako lihukamo Izesu liti gakokuti naga amitune liki alenupa amo. ¹⁶ La-a liake keizaini izegipa zuhainigi ito Herotini vegena la uti kimisilikao vamo. Viake, Izesuni la-aliki loka itamo, "Tisa, leza gelenoune geisi nene gako lamana mao loaka noane, la-okanike Omasimini mono gako lamana-mao lokemeaka noane. Ito gevenalite iki miliki nia mogona alesa amane ito gevena gona molamane, gei-isi nene muki gevena hamoli mini mogona ale nike kelemo vati-oaka noane. ¹⁷ Gei-isi nene nana minoko gelenape, emane lokato lolemezo? Leisi nene lo amegetinake Sisani takis amesa nehe amemosa neve?" ¹⁸ Izesu kei-isi giliki miliki kagata golesa nigelemo anigoake la-aloko lokimimo, "Lekelisi nanamu soza saza nilave, neni nanamu nogoka vizinigi niave? ¹⁹ Takis hizeaka gehani neni nelepizilo." La-alokago denarius 20t minoko mina gehani alikamo. ²⁰ La-ikao Izesu loka oketamo, "Imane agulizaki ito emane agoka gepa imane gehani lo nemo e-ahini neve?" ²¹ La-aliki liamemo, "Agulizaki ito agoka gepa nene Sisani neve." Izesu nene la-aloko lokimimo, "Sisani neta nene Sisani amilo la-iki Omasimi neta nene Omasi amilo." ²² La-aloko noligo gelemo, inina golesa amo la-iaka ahulimiake vamo. ²³ Amina zupaheko nene, Sadusi ve nene amo keza nene hele vegena otisa-amave liki gilinave Izesu noitoka i-ake Izesuni loka itamo, ²⁴ nemika lamo, "Tisa, Mose-ini lo limo la-a loko lonoive, 'Ve-mako vena ale ake noive, izegipa geto molamoko hele kaoma nene, agunalamo amina gevona vena alemioko uvolahi izegipa geto molano goive. ²⁵ Uvolaho agunala 7-a nene minamo. Gana vemo nene vena alimo izegipa geto molamike hilimo. Laoake venala nene izegipa agunalalo ahulotamo. ²⁶ Agunalamo nene amina vena alimo ito izegipa getamike hilimo. Laokao agunala 3-a amo nene amina vena alimoza amina minoko hilimo. La-imi la-imi vake keza 7-a ve-nene amina minigo amo. ²⁷ Uvolaho agunala muki hili asuikao alika amina vena hilimo. ²⁸ Ve 7-a tini vena-inima minamo maneve, hele vegena otita gamena loka e-ahini venala minatimone? Muki uvolaho agunala 7-ate alemo maneve." ²⁹ La-alikao, Izesu la-aloko lokimimo, "Lekeza gako gili gopa i-ake gako nilave, lekeza Omasi mini gakola-agi, ito alevolela muki gili gopa i-kave. ³⁰ La-onoive hele vegena otita gamena loka, vena aleaka nene mina minogoive, ito vegi venaki kelemo apizeaka nenemini mogona mina minogoive. Nanamu, agelo mamini-iki Okuluma apato minanigave. ³¹ Hele vegena oteaka mogona-a, lekelisi Omasi-mini gakola gatamave, la-alonoive, ³² 'Neisi nene Abraham-ini Omasi-lama nouve, ito Aisak-ini Omasilama nouve, ito Jakob-ini Omasilamagi nouve'? Hele vegenaliti Omasi-ini nouamuve, o-eh, kogo molagi nia vegena-litini Omasi-ini nouve." ³³ La-aloko vegena mono gako lonokimigo, keza inina ake kagata vaiki gelemo. ³⁴ La-okao Farisi-vete gako gelemo Izesu nene Sadusive kegepa zeletoko gako lokao, keza alenupa ake gako lihukamo. ³⁵ Keza holuinigu lo-oto gizapave save-ve farisi-ve makolimo Izesuni mulunagu hezeko loka-otamo, ³⁶ "Tisa, ten-a lo, nene-gu-nene nana lo limo kivile oko napa-neve?" ³⁷ Izesu la-aloko loamimo, "'Geza gigika ito gemeni ito zamuzakagi muki Omasi amezo.' ³⁸ Emane lo nene, muki lo kivilegeko lo napa neve. ³⁹ Aminaloti lo makola-a nene minoko neve, 'Gezakamu geleaka noanimo-ma minoko gevenakumu gelezo.' ⁴⁰ Muki lo-magi ito Profetini gakoma nene imane lo lositato isageneive." ⁴¹ Farisi-ve alenupaiki niago, Izesu loka mako oketake. ⁴² La-aloko lokaimo, "Lekeza Kraistimu-nene nanave liaka niave? Ito e-ahini gipala-neve?" Keza la-aliki lamo, "Devitini gipala neive." ⁴³ Izesu la-aloko loka oketamo, "ito Omasimini sikalahu Devitini-lo mino noitimo-nene nanamu 'Napaneve' lotave ai kumu, ⁴⁴ 'Napanemo la-aloko Napane loko limo, "Oko nigizani namagaloka minozo, la-onako geza lova gala veka gigisa amunauka ahulo keta nogouve?" ⁴⁵ Ito la-aloko Deviti-i 'Napaneve' loko selelo noitimo nene, nana minioko, goha Deitini gipala minatimo neve?" ⁴⁶ La-aloko loka oketamo, ve makolimo oteoko aisi li gakoto gako lamimo ito ve makolimo otekoko loka otamimo amina zupahetoti lokaitamago vo azoagi igo loaitamamo.