¹ Okulumaku kingdom nene wain-mini amelahini maminoko neive eza neteka holugu voko hoza wain minagu alitata vegena kumu vitaga imo. ² Alika nene wain minagu hoza alita vegi gako lihukamo, meina-ini gamena hamo hoza aliki alitakumu, laiake wain miku kimi selekago vamo. ³ Eza voake 9-kilo noigo maketi apatoka hozalove hanuva otinago anigamo. ⁴ Nemika loko lokimimo, 'Lekezagi itiki wain miku hoza alilo, nanaki alitune litahe, neisi meina hizeleketatomo neve.' La-alokago viki hoza alemo. ⁵ Gohaku nene aminamini oko hoza ale ve 12-kilok belo-lo ahe ito 3-kilok unaka ahe kelemo hamolimini oko molamo. ⁶ Eza 5- kilok unaka gamena noago, eza leme heto o-ake vike ve luga-a hanuva niago anigoake. La-aloko lokimimo, 'Nanamu itinasa imane gamenalo hanuva tini otinave?' ⁷ Eza la-aliki liamemo, 'Ve makolite hozagu lilimi milamave.' Laokaze loake, nemika loko lokimimo, 'Lekezagi nene neni wain miku itiki hoza alilo.' ⁸ Laokago unaka gamenahe nene, wain mini amelaho nene gizapave nemika loko loamimo, 'Selelokako hozalo ve muki ikago meina ini kimitane. Apioko keza alika iki hoza ale ve loti voko keza gana api-iki hoza ale ve lo vo asu igo.' ⁹ Hoza ale ve gamenalo amo, e-age 5-kilok unaka api-iki hoza alehe, mukito hamolimini-iki gamena hamoto hoza ale timini mena-a alemo. ¹⁰ Keza gana api-iki aito hoza ale ve-a nene amo, leisi meina napalo alesama nemozala-o liki gelemo, laimoza kezagi hamolimini iki gamena hamoto hoza aletimini meina-a alemo. ¹¹ Keza meina ini mota aliake nene, wain mini amelahini gaha amemo. ¹² Nemika lamo, 'Keza imane hozalo ve nene alika iki hoza alinamo neve, wan aua isiko hoza alinamo neve, laimoza kezagi lezagi hamo limini oko meina hize limikane. Leisi itinasa ho-o alevole oko la gamenegu hoza napalo alekune.' ¹³ Laokago wain mini amelaho mako-ini nemika loko loamimo, 'Nigive-neve, neisi gei neta makoka ale golesa ogeta muve. Geisi-a gamena hamoku hoza aleko meina-a aleaka kumu muluka molo hamo amape? ¹⁴ Geza alitani neta aleoko vozo. Neza gako loko meina hozalo ve e-age alika ahe geza aleniti minioko kimitove. ¹⁵ Olo-o neisi ve napa noamitove neza neta nemu giluto gako lamitomo nehe? Olo-o lekeza mogona lamana loloukumu mulutini mili hamo amave nenikumu, nanamule neza gelenoutoko neta kemeaka nouve?' ¹⁶ Nenemini onoigo ve goi-iki atamo vi alika niago alika ata ve vi goi inigave." ¹⁷ Amina zupahe Izesu Jelusalem uga itiki vamo, izegipa zuha 12-a kelemoko noitike la-aloko limo, ¹⁸ "Anigalo, leza Jelusalem uga iteko novune, Vemini gipala ali-iki hetpris igi ito lo-oto aniga vegi kigizaku milanigave. Goni imiki apili hilinigave, ¹⁹ laiki alimiki viki Juda-ve nia mita molo atini kigizaku milanigave ito laiki keza gako golesa litanigave laiki nene alimiki viki isa gitanigave. Laokago alika nene numuni lo-osive hamole nominoko gohaku oti nogoive." ²⁰ Alika nene, Zebedini gipalatini izoipo Izesuni loka amo izegipalagi. Eza Izesuni halitoka galapusa nohizike neta mako kumu loka otamo. ²¹ Izesu nemika loko loamimo, "Geisi nana neta kumu gelenane?" Eza nemika limo, "Geizi anosa moloketozo neni gipa lo-osi gei kingsom ugu minataize, magala-a gigizani lamagaloka nominago magala-a gigizani sogaloka minative." ²² Izesu nemika loko loamimo, "Geisi anigo-oko geleko onamani neta kumu loka noane. Neisi nanogo nou kap nagamikuti nene lekelisi natamo nehe? Keza nemika lamo, "Natunimo neve." ²³ Keza nemika loko Izesu lokimimo, "Neisi nato kap uguti nene lekeza lelehitoti nanigave. Laimoza neni nigizani namaga loka ito nigizani sogaloka minoaka nene neni hoza nomive, laonoimoza nene-a-nene amenehini neta neve e-agini kimitihe aisi nene ale lelehi onoive." ²⁴ Amina zupahe izegipala zuha 10-ate ligako giliake, uvolahiki agunalagimu muluikuka gaha napalo lamo. ²⁵ Laokago Izesu neisi noutoka isi minimi alo loake la-alimo, "Lekeza mota anigiki gilinave vegena makolitini gizapave ini-ate nene keza gizapa ikimiaka niave, ito gizapave napa kuguliza iteko mina mola-ate kezagi gizapa iki miaka niave. ²⁶ Laimoza imanemini mogona lekeli vogalagu uto amitive, laonoize geisi e-aga vogalatiniguti lekeli ve napa minatove loko geleneitanimo, gana apioko hozalo ve mino-oko nene, ²⁷ ito e-aho lekeli vogala guti ve napa tini minatove loko geleoko nene gana apioko lekeli hazalo ve minoko, ²⁸ amina mini oko nene, ve mini gipala nene eza hozala alinogo amive, laimoza vegena kumu hoza aleko ito eza laif-a keme-oko ale aitoka itikumu ive." ²⁹ Amina gamenahe Jeriko apa ahuliake nivago, vegena vai-ikite amegetamo. ³⁰ Aminaloka nene, kogomula likave lo-osi gapo gaheva loka minasimo. Izesu noave gako nigelesike, lo-osilo nemika liki selelasimo, "Guivahaniteve, Devit-ini gipalave, miluma gele letozo." ³¹ Muki ve venalite lo-osilo gaha kemeke la-alamo ahuli-iki lekegepa apizilizo, laimoza keza lo-osilo kono ale veleto iki la-alasimo, "Guivahaniteve, Devit-ini gipala, miluma gele letozo." ³² Alika nene, Izesu oteake lo-osilo sele lokimike la-alimo, "Lekelisi ve lo-osi nene naneta oleketatove liki gilinasive?" ³³ Keza nemika lasimo, Guivahaniteve, logomula goloutatikumu gelenousive. ³⁴ Nemini okago Izesu miluma napalo geleketamo lo-osilo amina zupahe agizani kogomulalo molamo, nomolago kogomula lo-osilo lita oko golouto kago amegetasimo.