¹ Amana bande boto Yesu u Beterepeme u shini ndja Yuda u matuwu mawara Herode kumu, bini buanya ba upunu u mbete ya meke punu itanga bakutoro u Yerushareme, barorok' ande : ² Ndo kuroro: << Kumu ndjua Bayuda a moto bande ikueyi? Shin'ande tshuamono moto muande u ma pununu mitanga, ndo tshuamiyi ku ntoro.>> ³ A woko kumu Herode, rueyi runu nteme muande muku bandiyi, ndo Yerushareme ndja ikimi ando nde. ⁴ Ya ku kokoyo bakubanganga baba kimi ndo bapundu mikanda nyi baboro, ndo ku bawuru:< ⁵ Ba ku marar'ande:<< u Beterepeme u shini ndja Yuda; shin'ande rende rini ra pundu bande u boro ngandjambe: ⁶ << Ndo wene, Beterepeme, shini ndja Yuda, wakapa ndjua nkenke wu ndenge a mara ma manene ma Yuda, shin'ande Kumu ipupunu u katawa, yand'idjidjishi isarere bate bama.>> ⁷ Ambishi yini Herode ya ku boko bina buanya mbere u bushuama, ndo ya ku shoto yebe busheke ande to itanga nana mooto a npunu mundu, ⁸ ambishi ya kubatomo u Beterepeme, uror'ande: << Yaka nana ndo bu yebe busheke areke ra muana ndjua nkeke; itanga ri mono buinu, bu karu wushosho amiyi, kek'a miyi mi mene ndende u ntoro.>> ⁹ Amana banda woko kumu, bakuwende. Ndo rende, mooto mua mono bande mbete ya meke punu itanga mua weke-wende u bosho bua bande inamana awe mutoro ariki ri raka rini ra wara muana ndjua nkeke, mu ku yembete. ¹⁰ Itanga ra mono bande mooto, baku yoro ando bunyaka bua buiki. ¹¹ Ba ku nini u mburu, ku mono muana ndjua nkeke ba inyanda Mariye, ba kuboro mamongo ndo ku ntoro; ambishi ba kuripiri kombo sha bande, ndo ku nguamba bikete ndja war'abande : woro, karanga aki mire. ¹² Ambishi amanaba ba wibiri u iru ra Ndjamb'ande areke bua kara karuawa u bora Herode, ba kue karuwa u bora bande u mboko ndjeke. ¹³ Anana amana bande wende, muanjero ndjua bora Kumu yande ku monyiyi u bora Yosefe u iru, ndo ku roro :<< Katuwa, wosho muana ndjua nkeke ndo inyande, ya tini ra Egypitu, ndo wara nono inaman'ishosho miyi, shin'ande Herode ishoshoto muana ndjua nkeke bua yande ku nyaka.>> ¹⁴ Butuwu bunu Yosefe ya ku katuwu, ya ku wosho muana ndjua nkeke ndo inyande, bakuetini ra Egyptu. ¹⁵ Ba kushara u nono inamana iwa ra bora Herode, shin'ande rutoto rua bora Kumu rua toto yande ubora Ngandjambe ande : << Nda ma wuru muan'ame u punu u Egypitu>>. ¹⁶ Anana Herode, amono yand'ande bina buanya ba ku nimbi, ya ku woko kabua sha buiki, ndo ya ku reye ru toto ande bi djaka bana bi barungu ba bakimi bana biyi ando mashewe utapa mapende ndo we rata ra shini bana bawara u Beterepeme ndo itenye rande ra shini ra rikimi, uraba itanga ra wokoya rushanga ubora bina buanya. ¹⁷ Keke anana rueye rua toto Ngandjambe Yeremiye kuyemen'ande: ¹⁸ << Ba ku woko djobo u Rama, birere ndo ntanda mua buiki; Rashere anereke bana bande, ndo a berek'ande reke ba nkitisi nteme ishin'ande bakapa bi.>> ¹⁹ Herode amana ya wa, mono, muanjero ndjua bora Kumu ya kumonyiyi wu iru bora Yosefe, u Egypitu, ²⁰ ndo kuroro: << Katuwa, wosho muana ndjua nkeke ba inyanda, ndo yaka u boro bua Isarere, shin'ande bana baraka djaka muana ndjua nkeke ba mana wa.>> ²¹ Yosefe ya ku wumuwu, kuwosho muana ndjua nkeke ba inyande, ndo kuende u boro bua Isarere. ²² Keke awoko band'ande Arkerause ya nkiti bu kumu bu'ishande Herode, u yuda ,ya kuwoko butete bu wende; ndo, amaraba nguibiri u iru ra Ndjambe, ya kuende itenye ra shini ra Ngarere, ²³ ndo ya kue shimiki u boro bua nguruku banda Nazareth, runu rua nyemeshe rutoto rua toto ba ngandjambe, run'ande< bi ngunguru muina Nazarete>.