¹ Keke bafarasayi ndo bapundu mikanda ba u punu u Yerushaleme ba wiyi gama a bora Yesu, ndo ku roro band'ande: ² Ishini iyeye baweke bawo ba nyaka kerere dja ba wotara? Ishini ka ba ntsheke woko djara itanga ra nyiki ba bidjere dja banda. ³ Ya ku ba barara: Ndo buina ki ishini iyeye a nyakaka buinu ibenge ra bora Ndjambe u nyakasha kerere a yini? ⁴ Ishini Ndjambe a ror'ande : U yeke isho ba nyowo rutono; keke yono ikok'ishanda bube mbek'inyanda, yiyi djua reye u iwa. ⁵ Kek'ake buini, bua noko: Yono iroro ishanda mbe inyand'ande: "Rini ra naka miyi yeke u washe riyi ikete ri ye Ndjambe namba," ⁶ moto yono a noko ngoshe she sheyeke ishanda mbe inyanda rutono. Irakake bua nteyeke ru toto rua bora Ndjambe nganga a rundu u nyakashe kerere a yini. ⁷ Bina masha ma pende, Yeshaya a ma shuwu a toto yande busheke ariki rini, itanga aroro yand'ande: ⁸ Bate bana ngowo, ba ntonoshoko ku mayobo ma numbu, kek'ake miteme nya banda nyiyi tamb'ando mi. ⁹ Ma toro ma ntoroko banda miyi ngona-ngono, ishini mayishi ma nyishiki banda miyi mabenge ma bate. ¹⁰ A wuru ya yoro ndo ya ku ri roro: "Wokanana ndo shimbira nana. ¹¹ Kuap'ande rini ra niniki u numbu ri ra ngonoko moto; kek'ake rindi rini ra punuku u numbu, ri ra ngonoko moto." ¹² Keke baweke banda ku karuwu ngama, ndo ba ku nor'ande : "Wake yeb'ande bafarasayi ba nguara ntanda u miteme nya banda u toto sha ngoko bande?" ¹³ Yesu ya ku ba barar'ande: "Nti mua mukimi munu mua bere wono Tata yono indjuama yiyi u riki, bi mupu muputuru. ¹⁴ Bareker'anana: biyi ba boriyi ya mishi ba meke rate ba boroyi ya mishi; mbe moriyi a mishi yiki rate moriyi a mishi, pend'abande beke buaka u kat'ibembe." ¹⁵ Petero, a wosho ya rutoto, ku noro: "Tshu shimbishi nkondo munu." ¹⁶ Ndo Yesu ku roro:" A yasha buinaki, buakapa ba bayemene buini rene shimbire? ¹⁷ Kabua tsheke shimbiri a buini ande ra rikimi ra niniki u numbu ra meke ra kat'ikundu, ambishi bi ri boko u ngumbu? ¹⁸ Kek'ake rini ra punuku u numbu ra mikupunu ku nteme, ndo rindi ra ngonoko moto. ¹⁹ Ishin'ande ku nteme muameke punu manya ma mabe, madjara ma bate, ma woshoro mi bawara shibakana, bushoshombo, buembe, buteme bua bube, ma bangashe ma bate meye, matoworo ma Ndjambe ²⁰ Rende meye ma ngonoko moto, kek'ake wudji u bere woko djare, ka dja meke wono moto bi. ²¹ Yesu a kobuwu yanda u nono, kuende u kata shini dja Tyre ndo dja Sido. ²² Ndo rende, ngata djua Kanana, djua upunu u mbete shi itegne ra shini yini, ku morosho wobo: Poko ntshongo , Kumu, muan'abora Davidi! Muan'ami ndjua bawate indjua monosho ndjoro u bora demo. ²³ Yesu ka toko marara a rueyi bi, ndo baweke banda ku karawa a ngama, ndo ku nombo band'ande: Nkarasha ishin'ande a miki tshu shere rubua a mbishi. ²⁴ Ya ku barar'ande: "Ba tomaki pa ku bapanga ba rimi ba mburu ndja Isarere. ²⁵ Kek'ake ngata yono kuiyi ku boro ma mongo u bosho buande, u ror'ande : Kumu, pondjoro!" ²⁶ Yesu ku barara: Dja kapa busheke u wosho diampa ra baana, ndo ribokosho baana bi ba mbua. ²⁷ Ngate ku marara: Eh, Kumu, kek'ake bana bi ba mbua ba nyiki peshere sha muakaka shini u meshe mi bakumu ba banda. ²⁸ Keke Yesu ku noro : Ngate, maweshere mawu miyi ma manene; ndji ikereme ipu rini ra ngondo wene. Ndo, munu itanga rini, muan'ande djua ngata ku berewu yanda. ²⁹ Yesu ku kobuwu u maraka mana, ndo kuende a kuandja iribi ra Garere. A banda yande u nkondjo ya ku shikimi u nono. ³⁰ Keke yoro ra rinene ku karuwu ngam'ande, rawara ando rindi bate ba weke tikinyi, ba boriyi a mishi, bini bitowo, tshumama, ndo babere beke ba buiki. Baku bashiki u para shanda, ndo ya ku ba bereshe; ³¹ ipu rin'ande yoro ra wara ri keme, umono tshumama utoto, bini bitowo u berewu, bane ba weke tikinyi ba ku boko busheke, baboroyi a mishi ba monoko; ndo ra tonosho Ndjambe ndjua Isarere. ³² Yesu, a wuru ya baweke bande, ku roro: "Ndiyi ndo irerere shini yoro rini; ishini rende matuwu ma shata biyi u ngam'ama, ndo ba kapa ndo rini ridja. She nda wondo u ba karasha a djara u bu tete nde ka be shoto bunono a mboko." ³³ Baweke ba ku noro: "Ipu nana ri ruene biti shombo u ndenge bushobo bunu bua womo mampa ndamba buiki mi rene wutushu yoro ra rinene ngo?" ³⁴ Yesu ku ba wur'ande: "Buiya a mampa buiki mbuenye?" Ba ku barara,"shamboro, ndo tshushu tshueke tshua tshukeke." ³⁵ Keke Yesu ku punushu rutoto u shikiyi yoro a shini, ³⁶ Ku wosho mampa shamboro ndo bashu, ndo ambishi a mana yande karasha maranga, ya ku ma peshere ndo ku ma yeke baweke bande, ke baweke ku kapasha yoro. ³⁷ Ba bakimi ba ku dja ndo ba ku wutu, ndo ba kutoro mitete shamboro nya yoro a peshere shini sha shara. ³⁸ Bana badja ba wara barungu binunu binene, u bere bara ba wata ndo baana. ³⁹ A mbishi yini ya ku karasha yoro, ku banda u buate, ndo ya kuende u kata mbete a shini ndja Magadana.