¹ Ba farasayi ndo ba sadisene kuiyi a ngama a Yesu ndo, shini ku nkiki, ba ku nomba u bashundju yendje ra mike punu u riki. ² Yesu ku babar'ande: "Ikokoro, bua noko: "Tshuara a itanga ra risheke, ishini riki riyi baba.' ³ Ndo ngebutuwu, bua noko:"Djara itanga ra ribe, ishini riki riyi baba a muimini.' Bua keyebe ukapara ipu rini ri riki, ndo bua karene ukapara djendje dji ma tanga. ⁴ Kumbu a kabua ndo bundumbu ya nomboko yendje rishana, kuapake yendje reke ri rene banda u iyeke mbe ra bere wara rini ra bora Yona." Ambishi ku ba kobuwu, ndo a wende yanda. ⁵ Baweke bande a shamba bande u muiri mua wono, baku u pimbi u wosho mampa. ⁶ Yesu ku baror'ande : "Bu keb'anana ndo buyarama busheke u luevene ru Bafarasayi ndo ba Sadisene." ⁷ Baweke ba ku wengeye banda-banda, ndo ba roko:" Ndji nde ishini a mere biti wosho mampa." ⁸ Yesu, a ru yebe ya, ku roro: "Ishini yeye amoko buini buanya u buin'amene, bate bi ma weshere ma makeke, ishini a noko buini bua kapa mampa? ⁹ Yara buiyi a buini ubere wara a bushimbiri? Ndo ka bua nkananaka mampa matana mi binunu bitana dja bate ndo mitete buiki mbuenye nya posho buini? ¹⁰ Mbe mampa shamboro mi binunu binene dja bate ndo mitete buiki mbuenye nya posho buini? ¹¹ Mbuenye amereke buini shimbir'ande kuapa rueye rua mampa rua mi bushosho? Ya rondo anana u luevene ru ba Bafarasayi ndo ba Sadisene." ¹² Keke ba ku shimbiri kuapa luevene rua mampa rua roro yande u ya rondo, kek'ake u mayishi mi Bafarasayi ndo Basadisene. ¹³ Yesu a toro ya u kata itenye ra shini ra Sesare ra Filipi, a wuru baweke banda u roro: "U bate nana yiyi Muana moto?" ¹⁴ Baku barar'ande: "Bana banok'ande wiyi Yono Mubatizi; ibeke, Eliyi; ibeke, Yeremiyi, mbe moko ndjua ba ngandjambe." ¹⁵ Buin'aki, ya ku ba wuru, bua noko ndi nane? ¹⁶ Simo Petero ku barara:" Wiyi Kristu, Muana a Ndjambe ndjua monyo." ¹⁷ Yesu, ku karawosho ru toto, ku nor'ande:" Wiyi ndjua nyaka, Simo muana boro a Yone; ishini kuapa rutoko ndo makere dja yi ripire runu, kek'ake djiyi Tata yono indjuama yiyi u riki. ¹⁸ Ndo miyi, ndak'ishosh'ande, wiyi Petero, ndo ki ariki ri manya rini ndi shoshoro Ekelesia indjama, ndo ki makuku mi iraka ri bawa makapa ruere ishamba bi. ¹⁹ Ndi iyeyeke shapa shi Bukumu bua riki: Rua rukimi rukanda wene a shini a mana ruake wara rua kanda u riki, ndo runu rutunu wene a shini a mana, ruake wara rua tunu u riki." ²⁰ Keke ya ku kara bawek'ande areke ba shosho moto nde yande yiyi Kristu. ²¹ U tapa itanga rini Yesu ku shosho baweke band'ande u yembe dja romboko yande wende ra Yerushareme, u mono mitanda nya buiki u boro ba wotara ba bate, u boro bakubanganga ba Ndjambe ndo bapundu mikanda, bara nyaka, ndo yara wumuwu u butuwu bua tshiata. ²² Petero a nnana u mbete ndjeke ndo ku tapa nkanyine, ndo ku roro: "Kumu! Areke dja nyakasha Ndjambe, rueye runu rua karere toko yiwiri bi." ²³ Kek'ake Yesu ku ya barara ndo ku roro Petero: "U mbish'ama, Satana! Wiyi ibuishiri rama; ishini manya mawa makapa manya ma Ndjambe, kek'ake manya ma bate." ²⁴ Keke Yesu kushosho baweke bande : "Mbe moto aweshe u ndaba, yiya bere, iyatotosho nte muanda mua wesheshe, ndo yi ndaba. ²⁵ Ishini yono a ngondo u wondjoro monyo muande yi musho-mushotosho, kek'ake ndjua yi mu shotosho shini miyi, ikaraka mu pete. ²⁶ Ndo mpoto nana mu buishe moto a wosho yanda shin'a mana ndja yikimi, mbe ashotosho monyo muande? Mbe ke mpoto nana mu reye moto u mu barara a monyo muande? ²⁷ Ishin'ande muana a moto yi wiki wiyi u kata rutono ru'ishanda, ando bajero bande; ndo keke ipuputu moto a moto u raba mingunu nyande. ²⁸ Nda ku bushosho u bara-bar'ande: Bate beke u ndenga yini ane bapuwu bi, ba u bere mono Muana moto wiyi u kata bukumu buande."