¹ U itanga rini, Herode, Guvene ndjua Ngarere a woko yande ba bi toto rushanga rua bora Yesu. ² Ya ku shosho bina ngunu muand'ande: "Moto yosho yiyi Yone Mubatise! Yanda a ngumuwu u bawa, ndo irak'rini yiyi a bukumu bu bishana dja nkeremeke u yande." ³ Ishini Herode, ndjua a washe Yone, a nkanda minamba ndo ku ntshiki u buroko shini Herodiase, ngara Filipi, muan'inyande, ⁴ Ishin'ande Yone a noko: Ka dja ntsheke iyeke mboko wene u ngoshe ngo ngar'awu. ⁵ Herode a wesheke u nyaka, kek'ake a tiniki yoro ra woko Yone ngo ngandjambe. ⁶ Ke rushuwu ru iyoro ri mabotoro ma Herode, muana ndjua ba wata ndjua boro Herodiase ya ku mini wu ndenge a bate ba wuru bande, ndo ku nyakasha Herode, ⁷ u ipu nde ya ku naya u ya tshipi u nyeke ra rikimi ri rombo yande. ⁸ U matomono ma bor'inyande, ya ku ror'ande : "Pek'ani ngowo, ntshu mua boro Yone Mubatise a riki ra yawu." ⁹ Kumu ku woko ndjoro sha buiki, shiniki itshipi rini ri ya tshipi yande ndo bana ba wuru yande, ya ku tomo rueyi ande bi nyeke a mundu. ¹⁰ Ya ku tomo ande bi kekere ntshu mua boro Yone u mburu buroko. ¹¹ Ba kushende ntshu muande u kata yawu, ndo ba ku yek'a mundu irenge ra mua ngata, ya kueshesha mund'inyanda. ¹² Baweke ba Yone kuiyi u wosho rutoko ruanda, ndo kue ba ru reye. Ndo ba ku wende we shoshe Yesu. ¹³ U rushangu runu, Yesu ku kobuwu anana u kata buata shini ku wende u pishimi u iraka ra nenge mua yere; ndo yoro, a yebe rindi, ku punu u mara ma manene ndo ba ku naba u mikoro. ¹⁴ Itanga ra punuku ya u buate, ku mono yoro ra ri nene, ndo ku riwoko irere, ndo ya ku bereshe ba bere. ¹⁵ A kere ikokoro, baweke kuiyi ngama nde, ndo kuror'ande: Iraka rini ngowo ri nenge mua yere, ndo itanga ra mana shanba; karasha bate be wende u kata mara ma makeke shini ku ya shombosho bidjere dji dja. ¹⁶ Yesu ya ku ba barara ya nde: Ba kapa a nyingi ndja ba wende bi; "ba yek'anana buin'amene bi kete bi dja." ¹⁷ Kek'ake ba ku noro band'ande: Biti tshuiyi ane pa mun'ando mampa ma tana ndo bashu bapende. ¹⁸ Ndo ya kororo: Yi na sheshe a djindi u wenye ¹⁹ Ya ku shikiyi yoro a shini ariki ra nenge, ku wosho mampa matana ndo bashu bapende, ndo ku totoro mishi u riki, ku karasha maranga. Ambishi, ku peshere mampa ndo ku yeke ba weke ba u kapasha a manda yoro. ²⁰ Ba bakimi ku dji ndo ba kuwutu. Ndo ba ku kokoyo peshere shini sha shara, ku yorosho mitete ishanga mipende. ²¹ Bane ba dji ba wara ruere rua bate bi nunu bi tana, u teye ba wata ndo baana. ²² Mun'anana ambishi yini, ya ku kureshe baweke a bunono u banda ukata buata, ndo bi te wende u bosho buanda u muiri mua wono, itanga rini ra karashaka yande yoro. ²³ Amana yande karasha yoro, ya ku banda u nkondjo shini kue rombo Ndjambe ya mene u pishimi; ndo ikokoro a kere rindi, ya ku wara yand'amene u nono. ²⁴ Buate, bua waraki u ndenge a ndjare, bua wara bu nyu-nyungu a ma pakara ma masha, ishini pungu ya kumuku u pende ya weke buate. ²⁵ U ba koko baneye bi bu tuwu, Yesu ya ku shepere akora banda, ya yi boko para ariki ra masha. ²⁶ Itanga baweke a mono banda ya yi boko para ariki ra mashi, ba ku riti, ndo ba ku roro: "Yara ngeshe," ndo ba ku wabuwu a bu tete. ²⁷ Yesu ya ku ba shosho mun'anan'ande: "War'anana a bundueye! Yi miyi; a reke bua wok'anana butete." ²⁸ Petero ya ku marara: Kumu mbe djar'ande wene, punushu ru tot'ande ndiyi u mbete yini yi wene mi ndi boko para ariki ra masha. ²⁹ Yesu ku nor'ande: "Iya." Petero ya ku punu u buate ndo ya ku boko para ariki ra masha shini kuende u mbete yini ya wara Yesu. ³⁰ Kek'ake a mono yande pungu dja inono ku woko butete. Ngo puara yini ya tapa yande u ya nyimi u masha, ya ku punushu ruab'ande: "Kumu, pondjoro!" ³¹ Mun'anana Yesu ya ku shembere rowo, ku nguata ,ndo ku noro: Moto ndjua maweshere mama keke, ishini iyeye a ntshiki wene nyana? ³² Ndo ba ku banda u kata buate, ndo pungu yi ku rekere u kuishi. ³³ Bana bawara u kata buate, ba ku boroshe Yesu ma mongo ba roro: "Wiyi u bara-bara Muana bora Ndjambe." ³⁴ Amana banda u katasha iribi, ba ku wiyi u kata shini dja Genezarete. ³⁵ Bate bi iraka rini a yebe ba Yesu, ba ku tomo ba wende shanga u mbete shini sha shi kimi sha ngama ngama, ndo ba ku ntsheshe ba bere ba bakimi. ³⁶ Ba ku mondoro ande bikumunu pa shosho ndja mapere mande. Ndo bane ba bakimi ba nkumunu ba ku beruwu.