¹ U itanga rini, Yesu a shambe yanda u mashobo ma ble u rushuwu rua sabata. Baweke bande, bana ba wara a ndjara, ba kutapa u bokoro nyeshe nya ble ndo ba kudja. ² A mono ba farisayi rueyi runu, ba ku ntshosho: "Rende, baweke bawa koyo ba nkereke rueyi runu rua bere ba yeke mboko u ru kere rushuwu rua sabata." ³ Kek'ake Yesu ya ku ba barare: "Ka bua toko bara runu rua kere Davidi, itanga ra woko yande ndjara, yande ndo bana ba war'ando nde; ⁴ ipu ra nini yande u kata mburu a Ndjambe, ndo a dji bande mampa mikini, mana ma bere ba nyeke mboko ndja ya u ndja, ayasha bana ba wara ndo nde, kek'ake ma rondo ba pa ishini banganga-Ndjambe? ⁵ Mbe aki, ka bua toko bara rueyi runu u kata mikendje ande: matuwu ma sabata, ba banganga-Ndjambe ba make djaka ma benge ma sabata kata tempero, u bere wosho buriti bu bube bua bande? ⁶ Kek'ake, ndake bu shosh'ande, djiyi ande yono yiyi ane a ma reke tempero. ⁷ Djare ware ande buake yebe rini ra noko roro: Ndiyi a nyingi ndja tshongo mua buiki, u iraka ra ndamba shi bashutu, ka buara buishi bana bi bere wiyi a rueyi makamba bi. ⁸ Ishin'ande Muana a moto yi Kumu ndjua sabata." ⁹ Yesu ya ku kobuwo u nono, ndo kunini u sinagongo a banda. ¹⁰ U nono moto a ma wara ando iyata ra womo. Ba farisayi ku wuru Yesu: "Ba ma yeke mboko ndja u bereshe moto rushuwu rua sabata?" Dja wara shini ba u npundu. ¹¹ Ya ku ba barar'ande : Nana u ndenge a yini, mbe yara ando panga pa moko ndo yi buaka u ibembe rushuwu rua sabata, yi bere wende u nguata ndo upunushe u none? ¹² Keke moto yiya ando nganga u reke panga! Djiyi dja yek'aki mboko u kere busheke rushuwu rua sabata. ¹³ Keke ya ku roro moto yono: "Shembere iyata rawa." Ya ku rishembere, ndo ri kukaruwa busheke ngo ireke. ¹⁴ Ba farisayi ba kupunu, ndo ku ya kokiyi u boko pungu shi mapu mi nyaka. ¹⁵ Ndo Yesu a ruyebe yande, ya ku kobuwo a nana. Yoro ra rinene ra wiki naba. Ya ku bereshe babere ba bakimi, ¹⁶ ndo yaku bakara buika-buika ande a reke bua shono ande ndiyi nana, ¹⁷ shin'ande runu rua roro ngandjambe Ishaya ru yemene: ¹⁸ Rende muina ngunu muama ndjua shoro miyi. Indjuama ndjua ru wondo yono nteme muame mua nyaka a nde. Ndi shishiki Nyuma a me a riki randa, ndo ishosho mabiri rongo. ¹⁹ Yande ko she nanashe a moto bi, ko iteye ruaba bi, ndo kua moto iwoko rutoto ruanda u misheshe nya mboko. ²⁰ Yi rene she bokoro iboro ra nenge rini ra nunu, ndo irene she nyimi nkoro mua tiyi mua nkaka npunushu ningi, yi ke kere ngono inamana yi shambasha yande rongo bunono. ²¹ Ndo mabiri mishishiki nteme u rukombo ruanda. ²² Keke ba u nasha muina demo a boriyi mishi ndo a beke we toto, ndo ya ku mereshe, u ipu ande kamama ka ku toto ndo ka ku mono. ²³ Yoro ra rikimi ra keme ndo ra ror'ande:" Yono, akapa Muan'abora Davidi? ²⁴ Bafarisayi, a woko bande rueyi runu, kuroro: "Moto yono a mingiki ba demo pa ndo Berzebur, kumu nene ba demo." ²⁵ Ngo Yesu a yebeke yande manya ma banda, ya ku baroro: Bu kumu bua bukimi mbe bu ya kapasha bund-a-bundu bua meke pandjisha, ndo kua boro bua bunene mbe mburu iya kapasha yi mene ya kapa rene kara wara bi. ²⁶ Mbe yar'ande satana abingi satana a ma ya kapara yanda mene; ipu nanaki bukumu buanda bu rene bundu kara war'arue? ²⁷ Ndo mbe djar'ande miyi nda mingiki ba demo ku Berzebur, baweke bini, baka mingi ku nane? Iraka rini yi wara banda mene ba shushu bini. ²⁸ Kek'ake, mbe djar'aki ande ku Nyuma a Ndjambe a mingiki miyi ba demo, bukumu bua Ndjambe bua wiyi kek'angowo u mbete ayini. ²⁹ Mbe, ipu nan'ake moto anguara ruere nini u mburu a moto ndjua nono ndo yi wosho bi kete djande u bere toko kanda bukoto? Ku itanga rini ri rene yande wosho bikete u mbur'ande. ³⁰ Yono ibere wiy'ando me, yiyi nash'ami, ndo yono a meke kokoyo ando me a make pandja. ³¹ Iraka rini ndake bushosh'ande: bube bua bukimi ndo matoworo ma Ndjambe bi ririmbisha amande bate, kek'ake matoworo ma Nyumu ndjua ntsheke bapa marimbishi bi. ³² Moto ndjua nkimi yono yi toto bube ariki ra Muan'a moto, bi ninimbishi a rundu; kek'ake moto ndjua nkimi yono yi toto bube ariki ra Nyumu ndjua ntsheke, ko bishe nimbishi a rundu, mbe ku matuwu ma rini mbe ku matuwu mana ma miki. ³³ Mbe kuapa bu roro ande nte muiyi busheke ndo rundombo rua mundu ru busheke, mbe kuapa bu roro ande nte muiyi bube ndo ru ndombo rua mundu ruiyi bube; ishin'ande ba nyebeke nte ku ndombo. ³⁴ Mboto ndja bandjowo bipere, ipu nana irene buini toto meye ma masheke, ngo yi buini bina kabue? Ishin'ande ku buiki bua meye u nteme iraka numbu mua ntotoko mundu. ³⁵ Moto ndjua ntsheke a mpunushuku bikete ndja bi sheke u nteme mua nusheke, ndo moto ndjua me a mpunushuku bikete dja bibe u nteme mua mube. ³⁶ Ndaka bushosh'ande butuwu bu marumbushu, bate, bi rorondoro shini toto sha ngona-ngono sha shikimi sha punushuku bande. ³⁷ Ishin'ande u mboko ndja toto shawa, bi ishu-ishuwuru, ndo u mboko ndja toto shawa biyi dja yi djaka ma kambu. ³⁸ Keke ba pundu mikanda beke ndo bafarisayi ba kuwosho rutoto, ndo kuroro: "Muyishi tshua nguesheke ku imono u kere yendje rishana." ³⁹ Yaku ba barar'ande: "Kumbu a kabua ndo ndja peme ya nomboko yendje rishana; kuapa a yendje ri bu yeke banda paki ri rini ra bora ngadjambe Yona. ⁴⁰ Ishin'ande, ipu ra wara Yona u ikundu ra shue ndjua nene nyanya mi shata ndo matuwu mashata, ipu ri moko Muan'abora moto yi kere nyanya mishata ndo matuwu mashata u kata shini. ⁴¹ Barungu ba Niniwe bi ka katuwu, wu butu bu marumburu, ando kumbu yini ndo bi yi dja yidjaka makambe. Ishin'ande ba ma barara miteme nya banda u mayishi ma bora Yona; ndo rende, djiyi ani ngowo u reke Yona. ⁴² Kumu ngata ndjua Midi yi ka katuwu butuwu bu marumburu, ando kumbu yini ndo yi yidjaka makambe, ishin'ande a wiyi ku mbete shi ma manasha ma shin'amana shini yande u woko buanya bua Soromo, ndo rende, ndji ane ngowo u reke Soromo. ⁴³ Itanga nyumu ndjua mbindi a mpunuku yande u moto, a meke ku maraka mawomo, u shoto ipu ri kiti, ndo ko she rimono bi. ⁴⁴ Keke yi roro: Ndi ka karuwu u mbur'ame u mbete yini ya npunu miyi; ndo, itanga ritoro yande, yito yi mono bu wana, ba yi wombo ndo ba yi roroyo. ⁴⁵ Yende, ndo yi wosho nyumu sheke ando nde shamboro shini sha neke yande kabua, shinini u kata mburu, shi wata iraka, ndo puara dja ma manasha ndja moto yono yi buaka bube u reke ndja bukoto. Dji wara ipu ri moko shini kumbu yini ndja kabua. ⁴⁶ Ngo Yesu a kaka ya shosho yoro ra bate meye, mono inyande ndo ba binyande, ba wara u bushobo, ba shotoko u tot'ande. ⁴⁷ [Moto ya ku ntshosho: "Rende, nyowo ndo bana ba nyowo kaba u bushobo, ndo ba ntshotoko ku toto awa."] ⁴⁸ Kek'ake Yesu ku barara yono a ntshoshoko: "Nana yi maya, ndo baana ba maya ba nane?" ⁴⁹ Ambishi, a shembere iyata rande ariki ri baweke bande, ya kuroro: "Rende maya ndo baana ba maya. ⁵⁰ Ishin'ande ndjua nkimi a nkereke ruwondo rua bora Tata yone indjuama yiyi u kata riki, yande yono yiyi muan'amaya ndjua barungu, ndo muan'amaya ndjua bawata, ndo maya."