¹ Itanga a mana Yesu u yeke ba weke bande ishanga ando ba pende marongo, ya ku kobuwo u nono, shini ku yishi ndo u toto ikambu ra risheke u mara ma manene mi itenye ra shini yini. ² Yone Mubatisi, a woko yande u mburu buroko bi toto mingunu nya bora Kristu, ya ku ntomosho ndambe baweke bande, ³ shini ku wuru Yesu: "Wiyi yande yono a miki, mbe tshu kara baka yi ndjueke?" ⁴ Yesu ya ku ba barara: "Yakanana bu shosho Yone mana ma ngoko buini ndo mana ma monoko buini: ⁵ Ba boriyi a mishi bake mono, batikinyi bake boko para, bina bara ba yembuwe, bane ba koko mato bake woko, bane bawa bake wumuwu, ndo Rushanga rua rusheke bake yishi a rundu bapoto. ⁶ Bunyaka u bora yono ibere miyi wara iya ri ma buare mande." ⁷ Ngo a weke ba karuwa, Yesu kutapa u shosho yoro ra bate, rueyi rua bora Yone : "Nana a wende buini u mono u nenge mua yere ? Iboro ra nenge ra nyinyiki mungu ? ⁸ Kek'ake, bua we mono nane ? Moto djua aneye mapere ma nganga ndja inono ? Rende, bane ba neyeke mapere ma nganga ndja inono biyi ku ma mburu mi ba kumu. ⁹ Bua we mon'aki nane ? Ngandjambe ? Ngosho, ndake bu shosho, ndo a ma reke ngandjambe. ¹⁰ Ishin'ande yiyi yande yono a punda bande: 'Rende, nda ntomoko nyamboko ame u bosho buawa, shini ku roroyo mbok'awa u bosho buawa.' ¹¹ Ndake bu shosho a bara-bara, u ndenge a bate bana ba boto banda u boro ba wata, kuapa yono ndjua a punu u reke Yone Mubatisi bunene. Dji sheke wara ngosho, yono ndjua reke bukeke u bukumu bua riki yiyi ndjua nene u neke yande. ¹² U tapa itanga ra ngunu mua boro Yone Mubatisi inamana karini, bu kumu bua riki buiyi ku ya yeke a bunono, ndo pa ba nono bake bu wosho. ¹³ Ishin'ande ba ngandjambe ba bakimi ndo Mikendji nya bora Mose ba ma shakara inamana ku Yone; ¹⁴ ndo mbe bua wondo u ntshimbiri, yande yiyi Eliyi yono yara wiyi. ¹⁵ Yono yiyi a mato, yi woko. ¹⁶ A nane yi koriyi miyi nkumbu yine ? Ya puanyaka baana bane ba ntshikimi u ndenge a moshoro, ndo bane, ba wuruku baana bane ibeke, ¹⁷ ba noko: Tshua nguara tshu bu beteshe mishembe, ndo shi bua mini bi! biti kubara ndjembe shi irere, ndo buini shi bua rere bi! ¹⁸ Ishin'ande Yone a ma wiyi, ka djiki mbe kunyo, ndo bate ba noko: Yiya demo. ¹⁹ Muana moto a mawiyi, a nyiki ndo a nyuku, ndo bate ba noko: Rende yiyi nyi bidjere ndo nyo, mbaya ndjua ba putushu ba namba ndo ndjua bate ba meye ma mabe. Kek'ake buanya bua Ndjambe bua moniyo u mingunu nyanda. ²⁰ Keke ya ku tapa u roro mara mana ma manene ma kereme bishana djande buika-buiki u kata manda, shin'ande ka ma toko barara miteme. ²¹ Irerere rawa, Korazine! Irerere rawa, Betesayida! Ishin'ande, mbe bishana djini dja nkereme u ndenge awa dja kereme ku Tyre ndo u kata Sidone, shini ba ma biki u barara miteme tamba yini, u reye ma pundju ndo u ya koro butoko. ²² Iraka rini ndake bu shosho: u rushu ru marumbushu, Tyre ndo Sidone bi baru barumbushu ndo ndamba boro u ireke wene ²³ Ndo wene, Kaperenaum, Ndjambe yi ito yitoro inamana ku riki ? Kuapa, yi kayi karasha a shini inamana iraka ra bate ba wa; ishin'ande, yare war'ande bishana djini dja nkereme u ndenge awa djakereme ku Sodomo, djarak' wara inamana karini. ²⁴ Iraka rini ndake bushosho: U rushuwu ru marumbushu shini ndja Sodomo bi yiru yirumbushu ndo ndamba boro u ireke wene. ²⁵ U itanga rini, Yesu ku ror'ande : "Ndake itonosho wene, Tata, Kumu ndjua riki ndo ndjua shini, ipu ra shueye wene meye mana ngowo u banya ndo bayebe, ndo ipu ra ntshundju wene a manda baana ba bakeke. ²⁶ Ngosho, Tata, ipu ra wondo wene u ruwondo ruawa ande djare ngowo. ²⁷ Meyi ma makimi miyi ma peke u bora Tata yone indjuama, ndo kuapa a moto a nyebeke Muana, pa Tata; kua a moto bi a nyebeke Tata, pa Muana, ndo yono Muana a nguesheke yanda utshundju. ²⁸ Yi nana u boro buama, buini bakimi bana ba nteke ndo biya ndo mariti, ndo miyi ndi buki bukitiyi inyomo. ²⁹ Totor'anana nkamba muame ariki rini ndo woshana marongo mama, ishini ndiyi ndjua wundjuwu ndo ndjua kitiyi nteme; ndo bu pepete makitiri mi nyomo u nyonyo nyini. ³⁰ Ishin'ande nkamba muama mua kapa bunono u mu shende, ndo buriti buama buiyi shanga.