¹ U itanga rini, baweke ba kupuru ba buike, mananashe ku wara u ndenge baweke ba bina Yude ba Gereke ando bana ba boto banda u Parestine; ishini bawata ba banda ba wushu barungu ba maka ba peshere u ma kapara mi bikete rushuwu a rushuwu. ² Bapostoro ishanga ndo bapende ba ku wuru bu biri bu baweke, ndo ku ba roro: Djakapa busheke biti urekere u yishi rueye rua Ndjambe shini ku kapara bidjere u meshe. ³ Iraka rini, bana binyiti, bu shoro u ndenga yini barungu shamboro, bana biyi a shikimi ndja isheke, bayoro a Nyumu ndjua Ntsheke ndo buanya, biti u bayeke bu riti bua ngunu munu. ⁴ Keke biti tshu ya yeke u maromboro ma Ndjambe ndo u ngunu muyishi. ⁵ Rutoto rua banda ruku nyakesha yoro ra rikimi. Ba ku shoro Etshiene, moto ndjua yoro a maweshere ndo Nyumu ndjua Ntsheke, Filipe, Prokoro, Nikanoro,Timo, Parmenase, ndo Nikolose, Proselite ndjua Antioche. ⁶ Ba ku ba punushu u mishi mi baposotoro, ba ku ba rombosho Ndjambe ndo ku ba nyayi djara. ⁷ Rusanga rua Ndjambe ru ku muamana buika buiki, ndo baweke ba ku puru ba buiki u boro bua Yerusareme. Ndo a yasha bangandjambe ba buiki ba tomowoko u weshe. ⁸ Etiene djua yoro a ntshongo ndo bunono bu bundjamba a kereke meyi ma nkama ndo mi bishana dja binene u ndenga bate. ⁹ Keke bate beke ba bina sinangongo bi ya roko bapunu u bushowo ba wara bina Yude ba bina Sirene, ndo bina Alekezadre, bina Silisi ndo bina Asiyi, kutapa nanashe ando nde, ¹⁰ Kek'ake ka batoko wara ruere yereme a buanya buande ndo Nyumu yono a nyeke mboko u toto. ¹¹ Keke ba ku nishi manya ma banda u ndamba bate u roro: "Tshua woko toto sha Etshiene yi towo Mose ndo Ndjambe." ¹² Ba ku tindi bate, bawotara ba boro ndo bapundu mikanda, ba ku npununu ipushumu u nguate ndo ba wend'ande u mburu dja inene ndja bashushu. ¹³ Ba ku punushu bateme bi manimbi uroro: "Moto yono ka ntsheke rekere toto shitowo iraka rikini ndo mikuara nya Mose, ¹⁴ Ishini tshua ngoko itot'ande Yesu ndjua Nazarete, yi wowono iraka rini ndo barara kerere shi bamama shi tshuyeke Mose. ¹⁵ Bate ba bakimi bana bashikimi u mburu birumbu, ba shiki mishi ariki ra Etshiene ndo ba mono bosho buande bua barama ngo bosho bua muandjero