¹ Kek'ake nungu ndjueke rukombo ruande Ananiya ando ngar'ande Safira, ba ku kapa ngoondo, ² ndo ya ku wokoshe ande u shueye itenye ra puaranga sha buishi banda, ndo wueyeke ndamba ya shara uboro ba postoro. ³ Kek'ake Petero ku nor'ande : "Ananiya ishini yeye Satana anyoro yande nteme muawa wene rimbi Nyumu ndjua Ntsheke ndo u shueye itenye reke ra puaranga ra nkapa wene ngoondo ? ⁴ Ka wa tokoro wara ruere rondo ngoondo awa? Mbe ki a kapara wene ka wa tokoro wara ruere kere ra rikimi ra wondoro a puaranga? Ipu nanaki a ntshiki wene u nteme muawa buanya bua bube ngowo ? Kapa wa nimbi bate kek'ake wa nimbi Ndjambe. ⁵ Ananiya a woko yande toto shini ya ku buaka shini kuwa. Butete bua buiki bu ku wata bate ba bakimi bana bawoko rueyi runu. ⁶ Birenge ndji barungu dji ku wiyi u ningi mapere, ambishi ku ntotoro shini kue neye. ⁷ Ambishi matanga mashata a shamba manda, ngar'ande ku nini, ubere yebe rueyi runu rua shamba. ⁸ Petero ku noro: Shosho miyi, nganga yindi yini ya kapara buini ngoondo a yini? Bara-bara, ku barara yanda tshua nkapa ku nganga yini. ⁹ Keke Petero ku noro: "Ipu nana ra ngokosho buini u kiki Nyumu a bora Kumu? Rende, bana ba mende u reye nom'awa kaba u ikuku ra mburu, ndo bi toyi yitotoro a wene." ¹⁰ Munu itanga rini ya ku buaka u para sha Petero, ndo ya kuwa. Birenge dji ba rungu dji ku nini, ku to mono ndjua wa , ba ku ntotoro, ndo ba kuende u neye akora nom'ande. ¹¹ Butete bua buiki ku wata yoro ra rikimi ndo bata ba bakimi bana bawoko rusanga rua meye mana. ¹² Baposotoro ba kere ndjendje dja kama ndo mashana ma buiki u ndenge a bate. Bate ba bakimi bi ya puturuku u mbarata ndja mburu a Salomo. ¹³ Kuapa a moko a shotoko kiki u ya puturu a banda, kek'ake bate ba bakimi bi ba tonoshoko buiki u reke. ¹⁴ Buiki bua bate bana ba weshe Kumu bu tuwu a butuwu, barungu a bawata ba ku puru ndo ba ya puturu a banda, ¹⁵ ipu nde ba uku rata ba bere ndo bi ba shiki a mboko ariki ri mashasha ndo ngarashambandje, kek'ande itanga ri shamba Petero, irurumbu rande ri shashamba u kukuyi moko ndjua ndenga banda. ¹⁶ Bata ba buiki ba u kupunu u mara ma manene ma ngama Yerusareme, ba u ku rata ba bere ndo bate bana ba wara a nyumu sha shibe, ndo ba bakimi ba ku beruwu. ¹⁷ Ngo ke pishi a ba wata shindi, ngotara a bakubanganga, ndo ba war'ande, u roro busheke bina itenye ri ba sadisene ba ku ya kanda u nini u rueye runu. ¹⁸ Baku wata baposotoro ndo ba ku ba shiki u mburu buroko ndja bate ba bakimi. ¹⁹ Kek'ake muandjero a bora Kumu, kuiyi ndenge butuwu u ripiri makuku mi buroko ndo ku ba punushu, a ba roro: ²⁰ "Yak'anana, bu yembete u tempero ndo bu shosho bate toto shini sha shikimi sha monyo munu. ²¹ A woko banda ru toto runu ba ku nini ngeshe mu butuwu u tempero, ndo ku tapa u yishi. Ngotora kubanganga ndo bana bawar'ande, ba ku wuru ba shushu ndo ba wotara ba bakimi ba bina Isarere, ndo ba kutomo bate we wosho baposotoro u mburu buroko. ²² Ba purushu ku wende, ke ka bato ba mono u kata mburu buroko, ndo ba ku karuwa u barasha rusanga. ²³ Ba ku roro: "Tshua ntomono mbura buroko ndja riti busheke, ba baka ba wara u bosho bu makuku, kek'ake a nipiri biti makuku, she tshua mono moto a moko. ²⁴ Itanga ra woko banda toto shini, kumu ndjua tempero ndo bawotara bi bakubanganga ka ba sheke yebe ipu nana ri boko buanya ariki ri baposotoro ndo u yebe rueyi runu shiri mbueye. ²⁵ Moto moko kuiyi u ba shosho: Bate bana ba shikiri buini u buroko kaba u kata tempero ndo ba nyishiki bate. ²⁶ Mun'anana kumanda kuende ndo ba purushu boboro shini ba wara a butet'ande areke bate bi ba ndjaka u ba kuete ma manya. ²⁷ Ambishi a ba karashe bande kue barate u bosho bua yoro ri bashushu. Ngotara a ba kubanganga ku ba wuru ikongo, u roro: ²⁸ Tshua ku bukara koko buini kara yishi bate u rukombo runu, ndo rende bua yorosho boro bua Yerusareme ando mayishi mini, ndo bua nguesheke u shiki makere ma moto yono ariki riti. ²⁹ Kek'ake Petero ndo baposotoro ku barara: "Ndji nde tshu tomowu Ndjambe u iraka ri tomuwu bate. ³⁰ Ndjambe ndjua ba mama shiti a wumunu Yesu, yono a djaka buini ndjua shupuyu ariki ra nte. ³¹ Yanda Ndjambe a tonoshe yande u wara u rowo ruande ru barungu ngo Kumu ndo Ngondjoro, u yeke Isarere ma barara mi miteme, ndo marimbishi mi mandimbi. ³² Biti tshuiyi ba teme ba meyi mana, ipu rimoko ando Nyumu ndjua Ntsheke, yono Ndjambe ayeke yande bana bake ntomuwu." ³⁴ Awoko banda toto shini kabua ku banda buiki yoro ri bashushu ndo ba ku shoto djaka baposotoro. ³³ Kek'ake Mufaresayi u rukombo Gamariere, nyishi ndjua mikendje, ndjua a wondo bate ba bakimi, ku yembete u reye buanya buanda ndo u rombo u punushu kakeke baposotoro. ³⁵ Ambishi ku ba shosho: "Barungu bina Isarere, bu yebe busheke runu rua noko buini kere ariki ra bate bana. ³⁶ Wibuw'anana, u matuwu ma makeke Tewuda, mara ya yeke ngo moto ndjua nganga, ndo yono ruere kama a inene sha bate ku naba: Ba ku nyaka, ando bate ba bakimi bana ba wiki naba ba ku pandjishi, u bere kara wokomo bi. ³⁷ Ambish'ande, Yudasa ndjua muina Garere ya ku punu itanga rabaraka banda bate, u yebe buiki bua banda, ndo a nana bate shere yiyondo u mbish'ande, ndo a yanda kuwa, ndo bana bawar'ande ba ku pandjishi. ³⁸ Kek'angowo ndake bu shosho, areke bua kara ya nishi u meyi ma bate bana ndo ba rekere anana benda bande, Mbe djara maroriyi mbeki nde ngunu munu mua mi punu ku bate mu wowonyoyi. ³⁹ Kek'ake mbe djiyi ngunu mua mi punu u bora Ndjambe, buapa yereme u mu wono bi. Areke bu ya yeke ipu ri nasha Ndjambe. ⁴⁰ Ba ku weshe mana ma toto yande ndo ba ku wuru baposotoro, ba ku ba boro ndo ku bakara u bere kara toto u rukombo rua Yesu, ndo ba ku barekere. ⁴¹ Baposotoro ku punu u iraka ri bashushu a bunyaka ishini iya mono banda ba yemene u nini ntanda u rukombo rua Yesu. ⁴² Rushuwu ndo rushuwu ka batoko rekere u wende ra tempero ndo mburu a mburu u yishi ru shanga rua Yesu nde Yiyi Kristu.