¹ Awara Petero ndo Yone bi toto a bate, ba ngangandjambe kupunu ipushumu, kumu ndjua tempero ndo ba sadussayene, ² ba wara kabua shi mayishi ma banda u bate, ndo a ba shoshoko bande u rukombo rua Yesu ma wumuwu ma bate u kata bawa. ³ Ba ku bawata, ndo ku ba shiki u buroko inamana butuwu bua mpende, ishini dja wara itanga ri ikokoro. ⁴ Ndji sheke wara ngosho, bate ba buiki bana bawoko rueye ba kuweshe, ndo buiki bua bate ku puru ruere ru binunu bitana. ⁵ Rushu rua raba, ba kumu ba bate, bawotara ndo bapundu mikanda, ba ku ya puturu u Yerusareme, ⁶ Annasa, kubanganaga, Kayife, Yone, Alekezadre, ndo bana ba bakimi bawara bina irondjo ri bawotara bi bakubanganga. ⁷ Ba ku wuru Petero ndo Yone u barumbushe ku ba shiki u ndenga banda, ndo ku bawuru: U bunono bua nana mbeki ku rukombo rua nana rua nkere buini rueyi runu ? ⁸ Keke Petero, ayoro a Nyumu ndjua Ntsheke ku ba barare: Bakumu ba bate ndo bawotara bina Isarere, ⁹ buake tshu wuru arini ishini rueye rua rusheke rua nkereshe biti moto ndjua ntataka, ishin'ande tshu roro ipu nana rameruwu yande. ¹⁰ Bu yebe buini bakimi, ndo a bina Isarere bi yebe! Djiyi ku rukombo rua Yesu Kristu ndjua Nazarete, yono a djaka buini u nte mua wesheshe, ndo yono Ndjambe a wumunu yande u kata bate bawu, ku yande a monoko buini moto yono rutoko busheke u mishi mini. ¹¹ Yesu Kristu yiyi imanya raboko banda u boro bashoro kek'ake rabuaka imanya ri itumu ra mburu. ¹² Mawondjowo makapa u moto amoko, ishini kuapa a shin'amana ane rukombo a rumoko u ndenga bate runu ru ruere wondjoro bate. ¹³ Itanga ramono banda Petero ndo Yone bitoto ando imama ra rikimi ba ku keme a yebe banda biyi bate bana ba bere yebe nkanda, ndo ku ba yebe biyi bate ba wara ando Yesu. ¹⁴ Kek'ake a monoko banda moto yono aberuwa a nguara ando banda, ka batoko wara a rueyi rutoto bi. ¹⁵ Baku bayeke mboko ndjia upunu u mburu ndjia birumbu, ndo basha toto banda-banda u roro: "Tshukere mbuenye a bate bana?" ¹⁶ Ishini dji dja yebe u bate ba bakimi ba Yerusareme, rueyi ru bishana rua kereme u djara dja bande, ndo biti tshua kapa ruere rutono bi. ¹⁷ Kek'ake, ishin'ande rueyi runu areke rua muana buika-buiki u ndenga bate, tshu ba kar'anana u bere kara shosho moto a moko rueye u rukombo rushu. ¹⁸ Ndo a ba wuru bande ba ku ba kara u toto ndo u yishi koka koko u rukombo rua Yesu. ¹⁹ Petero ndo Yone ku ba barara: "Ya rumbush'anana buin'amene mbe djiyi busheke u mishi ma Ndjambe u bu tomuwu buni iraka ritomuwu Ndjambe. ²⁰ Ishini tshua karene u bere toto meyi mana ma mono biti ando mawoko biti. ²¹ Ba ku kara bapangeshe puiri ndjeke, ndo ku kara barekere, ka ba toko mono ipu ri ba shiki u ntanda ishini bate, ngo bate bakimi a wara bande bi tonosho Ndjambe u rueyi runu rua kereme. ²² Ndo shini moto yono a beruwu u ishana a wara a ma shambeshe mashewe mashamanene ariki. ²³ Ambishi a ba rekere banda, bakuende u mbete ya wara bate ba banda, ndo ba ku ba rondosho meyi ma makimi mi baroro bawotora bi bakubanganga ndo bawotara ba boro. ²⁴ Itanga ra woko banda meyi mi bashosho banda, ba ku totoro rutoto a nono ba bakimi u bora Ndjambe u roro: "Kumu, wene wa wanga riki a shina mana, a masha ma manene ndo bikete djini dja bikimi, ²⁵ Wene wa toto u Nyumu ndjua Ntsheke u numbu mua mamayiti muina ngunu awa Davidi. Ishini yeye bi tototo ukata mabiri, ndo manya ma ngona-ngono u ndenga bate? ²⁶ Bakumu ba shin'amana ba ya totoro, ndo bakumu ba bate ba buara Kumu ndo Mashiy'ande ndjua shara ndja ikini? ²⁷ Keke dji kubere weshe muina ngunu awa ndjua ikini Yesu, yono Herode ndo Ponso Pirata a ya puturu banda a bina Isarere u nashe u boro bunu bua bunene, ²⁸ shini ku kere rua rukimi runu iyata rawa ndo yirongo rawa ra roriyi wene a bosho. ²⁹ Keka ngowo, Kumu, rende manashere ma banda ndo yeke bina ngunu muawa u yishi rueyi ruawa ando bunono bua bukimi, ³⁰ Shembere iyata rawa ,mabereshe ndo ndjendje dji bishana dji kereme ndo meye u rukombo rua muina ngunu awa ndjua Ikini Yesu. ³¹ Itanga ra rombo banda Ndjambe, iraka rini ra wara banda ba ya puturu riku nyinyi ba bakimi ba ku yoro ando Nyumu ndjua Ntsheke, ndo ba ku yishi rueyi rua Ndjambe bundueye. ³² Buiki bua bate bana baweshe ba wara nteme ndo monyo moko. Kuapa a moto moko a roko bikete djiyi djande dja ya mene, kek'ake bikete dja wara shini ba bakimi u makapara ma djindi. ³³ A unono bua buiki batomo ba bora Yesu ba yishiki ru shanga ru ma wumuwu ma Kumu Yesu, ndo ntshongo mua Ndjambe mua wara ariki ra banda ba bakimi ³⁴ Ishini kuapa a moko u ndenge banda awara mono a ntanda, ba bakimi bawara a mangondo, mbe ki mamburu bi ma kapaka, ³⁵ ndo ba reyeke puaranga sha buishiki banda u djara dji ba postoro u shi kapara ndo u yeke moto a moto ikapa ra nyingi ini indjanda. ³⁶ Yosefe, yono baposotoro a yeke banda rukombo Barnabasa(Nguindjiri a bat) Lewiyi ndjua boro bua Shipiri, ³⁷ akapa ngond'ande, ndo ku rata puaranga sha shikimi u bosho bu bapostoro.