3. ¹ Petero ndo Yone ba tetuwuku ntshere moko u tempero, u itanga ra rombo Ndjambe: dja wara itanga a ndenge a ntshu. ² Moto moko ndjua itikinyi to ba moto a ma wara, yono ndjua a weke ba totoro ndo a weke ba shiki matuwu ma makimi u bosho bu ikuku ra tempero a wuruku ba ande ndjua ntsheke,.shini ya u romboko bate bana ba niniki u kata tempero bikete dja ntshongo. ³ Moto yono, a mono yande Petero ndo Yone biro nini u tempero, ku ba rombo bikete dji ntshongo. ⁴ Petero ngona Yone, ku ntshumiyi mishi shoko imoko a riki rande, ndo ku roro: "Tshurende." ⁵ Ndo yande ku ba rende mishi poro, ushiki ntem'ande yi pe pete ikete u banda. ⁶ Keke Petero ku noro: "Nda kapa, mbe a puranga, mbe woro; kek'akirini riy'ami,ndake iyek'arindi: U rukombo rua Yesu Kristu ndjua Nazarete, katuwa ndo boko para." ⁷ Ndo ku ntshuku u rowo ru barungu, ya ku nkatishe. Mun'anana para shanda ndo bipoto ku buaka bunono ndo ku windjuwu. ⁸ U irondowo rimoko ya ku yembete a nkiti, ndo ya kutapa u boko para. Ya ku nini ando banda u tempero, u boko para, u rondowo ndo utonosho Ndjambe. ⁹ Bate ba bakimi ba ku mono yi boko para ndo yi tonosho Ndjambe. ¹⁰ Ba ku yebe ba bakimi yiyi yande yono a weke shikimi u ikuku Busheke ra tempero u rombo bikete dji nguashe ndo ba ku keme ndo ba ku ya kara u runu rua kereme ishini yande. ¹¹ Ngo a bereke yande kobuwu Petero ndo Yone bate ba bakimi bi ya karaka, ba weke mbanga mbete ya wara banda u mbarata a mburu a Salomo. ¹² Petero a mono yande ngono ku roro bate: Buini bina Isarere shini yeye a maka buini ya kara u rueye runu ? Ndo shini yeye a maka buini tshu rende, ngo nde dja nkereme ku bunono buiti amene mbeki shemene ayiti, iraka tshua nker'ande moto yono iboko para ? ¹³ Ndjamb' a bora Abrapama, ndjua Isaka, ndo ndjua Yakobo, Ndjambe ndjua ba mama shiti a ntonosho muina ngunu'ande Yesu, yande yono akapa buini ndo a bere buini u mishi ma Pirata, yono a wara a buanya bu nekere. ¹⁴ Buini bua bere ndjua Ikini ndo ndjua Ntsheke ndo bua rombo bi bu woko ntshongo mu bu rekeshe moto yono awara nyak'a bate. ¹⁵ Buini ku djaka Kumu ndjua monyo, yono Ndjambe a wumunu yande u kata bate bana bawa ;biti tshuiyi bateme. ¹⁶ Djiyi ku maweshere u rukombo ruande rua nkarashe moto yono bunono ndjua a monoko buni ndo a yebe buini, djiyi maweshere u yande ma mowo moto yono u mishi ma buini bakimi. ¹⁷ Keka ngowo, bana bamaya nda nyebeke bua nde bua kere ku ndimbi, ayasha bakumu bini. ¹⁸ Kek'ake Ndjambe a mareyemeshe ipu rini ra runu rua toto yanda u bosho u minumbu nyi bangandjambe bande ba bakimi ande: Kristu ande yi momono ntanda. ¹⁹ Barar'anana miteme nyinaki ndo barm'anana, shini ba burimbishi mandimbi mini. ²⁰ Keke Kumu yi bu yeke matanga ma poro ndo yi bu tomosho yono yi bu rorosho yanda, Yesu Kristu. ²¹ Yiyi yanda riki ri nguaya u shara inamana itanga ri maroroyo ma meyi ma makimi, mana Ndjambe a toto yande u wara u minumbu nyi bangandjambe bande bikini. ²² Moise a roro: 'Kumu Ndjambe ayini ipu punushu u ndenga ba binyini ngadjambe moko ngo miyi, bu ngoko u kata rua rukimi ru bu shosho yanda, ²³ ndo yono ibere woko ngandjaembe yono bi nyanyaka u ndenga bate.' ²⁴ Ba ngandjambe ba bakimi bana bi ya rabesha u toto, tapa Samuere ndo bana ba naba ma toto a banda u bosho matuwu mana miyi biti. ²⁵ Buiyi bana bi bangandjambe ndo bi ma wokosho mana Ndjambe a ndji nkondo a ba mamashiti, itanga ra raya yanda Abrapama: 'Makundu ma makimi ma shin'amana mi nyanyaka u mboko ba kana shawa. ²⁶ Ndji ku buini bukoto Ndjambe a punushu yanda muina ngun'ande, a bu ntomosh'ande shini ku bu nyakeshe, u barara moto ndjua ndenga yini ndjua nkimi u mboko mandimbi mande.