2. ¹ Rushuwu rua Pakasa, ba wara ba bakimi iraka ri moko. ² Shok'imoko rubua ru ku punu u riki ngo runu rua pungu ndja inono, ndo ru ku yoro mburu ndja ikimi ya wara banda ba shikimi. ³ Maneme ma puanyisha a maneme ma tiyi, ma ku ba pununu, mi ya kapara mana a yi meke, ndo ma ku tshuerewe a riki ra moko-moko ndjua bande. ⁴ Ndo ba bakimi ku yoro a Nyumu ndjua Ntsheke, ndo ba ku tapa u toto, toto sheke, ngo ipu rini Nyumu yi ba yeke yand'ande bi toto. ⁵ Keke dja ma wara u itanga riniu u Yerushareme bina Yude, bata ba yemene, bi mabiri ma makimi bana biyi u shini a riki. ⁶ U rubu runu rua kereme, bate ba buiki kuende mbanga, ndo ba kupueyi-pueyi ishin'ande moto a moto a ba wokoko bi toto u rutoto rua bora bande. ⁷ Bawara ba bakimi u kata u keme ndo u rushishiwu, bi ya wururuku bana a ibeke:Rende, bate bana ba ntotoko, ba kapa ba bakimi bina Garere? ⁸ Ndo ipu nana a make biti ba woko u rutoto ruiti moto a moto, u rutoto ru ma botoro miti? ⁹ Tshuiyi bina Partes, Medese, Elamitese, bana ba meke wara u Mesopotamiyi, u Yudaye, u Kapadose, u Pont, u Asiya, ¹⁰ U Firigi, u Pamfili, u Egipte, u itenye ra shini ndja Libierini ra bamasha a Sirene, ndo bana ba u punu u Romo, ba Yude ndo a bana bi ya buishi ba yuda, ¹¹ Bina Krete ndo ba Araba, ipu nana a make biti ba woko bi toto u toto shiti meyi ma manene mankama ma Ndjambe? ¹² Ba wara ba bakimi u kata u keme, ndo, ba yebeke pa ku sha wete wengiyi, bi ya roko bana a ibeke: "Runu rueyi rua noko resh'iyeye?" ¹³ Kek'ake ibeke ba sheyeke, ndo ba roko: "Biyi ba wu maana ma piyi. ¹⁴ Keke Petero, ku ya punushu ando ishanga a moko, ku shendere rutoto, ndo ku baroro u meyi mana: Barungu ba Yude, ndo buini bakimi bane ba ntshikimi u Yerusareme, yeb'ana ngo, ndo shik'ana matu u toto shama! ¹⁵ Bate bana she ba wu maana bi, puara ya nguengeyiki buini, ishini djiyi itanga ra ribua ra ngeshe butuwu. ¹⁶ Kek'ake djiyi kane runu rua toto bande u bora ngandjambe Joel: ¹⁷ 'U kate matuwu mi ma manasha,' a roro Ndjambe, 'ndi mua muanga Nyum'ame a riki ri rutoko ru rukimi, baana bini bi barungu ndo bi bawata bi we wendjuwu, ndo birenge dja bate bi wake wara a ma monono, ndo binunu djini dja bate dji wake wara a maru. ¹⁸ Ngosho, a riki ra bina ngunu muama bi barungu ndo bi bawata, kata matuwu mana, ndi mua muanga Nyum'ame; ndo bi wewendjuwu. ¹⁹ Ndi pu punushu bishana u kata ndemba riki ndo meyi ma nkamua ani a riki ra shin'amana, a makere, a tiyi, ndo ingungu ra ningi. ²⁰ Itanga ri ba bamana muini, ndo gondo yi ba bamana makere, u bosho bu ma wiri mi rushuwu rua Kumu, u rushuwu runu rua runene ndo ru rutono. ²¹ Keke ndjua kimi yono iboko rukombo rua Kumu mbere yi wo wondjowu. ²² Bate ba Isarere, wok'anana toto shini: Yesu ndjua Nazarete, moto yono Ndjamba a reye yande buteme u bosho buini u mboko ndja meyi ma nkama, bishana ndo djendje dja kere yande u mbo'ande u ndeng'ayini, ngo ipua ra make buini ru yebeke buin'amene; ²³ . moto yono, bi bu yek'ande u raba ma roroyi ndo u raba buyebere bua meyi ma Ndjambe mana ma miki u bosho, buini ku nyaka u nte mua wesheshe, buini ku nkapa u djara dja bate ba babe. ²⁴ Kek'ake Ndjambe ku ngumunu u iwa, u ntunu mi namba nyi iwa, ishin'ande ka djashe yemene ande bi ntshuku u bora rinde. ²⁵ Irake rini Davidi a roro ishini yanda: 'Nda mmonoko shoko sha sha shikimi Kumu u bosho buama, ishin'ande yiyi ku rowo ruame ru iromo, kek'ande ko ba ndjinyi. ²⁶ Ngono a nteme muama muiyi ku kata bunyaka, ndo runeme ruama ruiyi a nyanga; ndo ayasha rutoko ruama ru ki ya kiti poro ando mashikiri ma nteme. ²⁷ Ishini wa kapa ruene she rekere monyo muama u kata iraka ra bate bawu bi, ndo wa kapa ruene weshe ande indjuawu ndjua Ikini yi shiri nganga bi. ²⁸ Wa ma shundju tshuboko tshua monyo, u ndjo ndjorosho a bunyaka u mboko ndja umono bosho buawa. ²⁹ Bana ba maya, dji bi peke mboko miyi u bu shosho u wororo, a riki ra mama yiti Davidi, djiyi ande a ma wu, ba ma nneye, ndo aki ibandja randa ri kare wiyi inamana karini u ndenga yiti. ³⁰ Ngo a wara yande ngandjambe, ndo a yebe yand'ande Ndjambe a ma nakasha ando u ya koko u shikiyi a riki ra nguash'ande ndja bukumu moko ndjua ikundu randa, ³¹ Dja wara ma wumuwu ma Kristu ma roroyi yanda ndo a toto yande, u roro ande ko bi she muabara u kata iraka ra bate bawu bi ndo aki rutoko ruanda ko ru shiri nganga bi. ³² Yesu yono Ndjambe a wumunu yande u iwa; tshuiyi bite ba kimi bateme ba rueyi runu. ³³ Ndjua totoro u riki u mboko ndja rowo ru iromo rua ndjambe, ya ku pete u bora tata nyumu ndjua ntsheke yono ndjua a raka banda, ndo ya ku muanga, ngo ipu ra monoko buini ndo ra ngoko buini. ³⁴ Ishini Davidi, ka toko banda u riki boo, kek'ake ya ku roro yand'amene: 'Kumu ya ku roro Kum'ama: "Shikimi u rowo ruama ru iromo, ³⁵ inamana yi shiki miyi bini ikembe bawa inyekere rawa ra para. ³⁶ Kek'ande mburu ndja ikimi ndja Isarere bi yeb'aki ando bu bara-bara ande Ndjambe a ma shiki Kumu ndo Kristu Yesu yono a djaka buini u nte mua wesheshe." ³⁷ Ambishi a mana ba woko minondo nyini, ba ku woko pamba u miteme, ndo ba ku roro Petero ndo batomo beke: "Baana ba maya, tshukere mbuenyi?" ³⁸ Petero ku ba barara: "Barar'anana miteme nyini, ndo moko a moko yara ndjua tishi u rukombo rua Yesu Kristu, shini ku rimbishi mandimbi mi mabe mini; ndo bu wosho ikapa ra Nyumu ndjua Ntsheke. ³⁹ Ishini iraka riyi shini buini, shini baana bini, ndo shini ba bakimi bana biyi tamba, ayasha u buiki bua banda bana Kumu Ndjamba a yiti yi ba wuru yanda. ⁴⁰ Ndo, u mboko ndja toto sheke sha buiki, yi ba shoshoko ndo yi ba windjiriki, a roko: "Ya wondjor'anana u kumbu yini ndja kerere ndja ibe. ⁴¹ Bana baweshe mayishi manda ba ku ba tishi; ndo, u rushuwu runu, buiki bu baweke ku puru u ruere rua bate binunu bishata dja nyonyo nya bate. ⁴² Ba windjuwu miteme u woko mayishi mi batomo ba bora Yesu, u kata itupu ri buwokosho bua buana bua maya, u kata idjiri ri iraka ri moko, ndo u kata marombo ma Ndjambe. ⁴³ Butete ku wara u moko-moko, ndo meyi ma nkamu ndo bishana dja keremeke u mboko ndja batomo. ⁴⁴ Bate ba bakimi bana ba wesheke ba waraka kata iraka ri moko, ndo ba kokiyi bikete dja banda ndja bikimi iraka ri moko. ⁴⁵ Ba kapaka mangondo ma banda ndo bikete dja banda, ndo ba kaparaka puaranga u ba bakimi, u raba nyingi ndja moko-moko. ⁴⁶ Ba waraka rushuwu rua rukimi iraka ri moko u kata tempero, ba djiki mampa u kata mamburu, ndo ba djiki bidjere dja banda ando bunyaka ndo miteme nya kitiyi. ⁴⁷ Ba tonoshoko Ndjambe, ndo bate ba bakimi bi ba kanyika. Ndo Kumu a nyayaka ru shuwu ndo rushuwu u Ekelezia bana ba waraka bi wondjowo.