1. ¹ Ndjua ruwondo Teyofile, nda toto, u kata nkanda muama mu bukoto, meyi ma makimi mana Yesu a kere ndo u yishi to matapara, ² Inamana rushuwu runu rua mandasha banda u riki, ambishi u mana reye toto shini, u mboko ndja Nyumu ndjua ntsheke, u batomo bana ba shoro yanda. ³ Ambishi u mana mono mitanda, ya ku ya monosho u banda ndjua monyo, ndo ku ba shundju ndjendje dja buiki, u ya punushu u banda matuwu mashanga manene, ndo u toto a riki ri bikete djini dja neke bukumu bua Ndjambe. ⁴ Ngo a wara yand'ando banda, ya ku ba shere ibenge ande a reke ba pambuwu a Yerushareme, kek'ake u baka runu Tata a raka yande, runu ru bu shosho miyi, a ba roro yande; ⁵ Ishini Yone a tishi bate ku masha, kek'ake buini, u kata matuwu ma makeke, bi bu ti butishi u Nyuma ndjua Ntsheke. ⁶ Keke batomo yi ya kokoyi bande ba ku nguru: " Kumu, djiyi ku itanga rini anashe ri royi wene bukumu bua Isarere ? ⁷ Yande ku ba barare: dja kapa u buini runu rua yebe matanga mbe ake shoko nana Tata a batara yanda u bunono buanda yand'amene. ⁸ Kek'ake bu pe pete bunono, Nyumu ndjua Tsheke a wiyi yande a riki rini; ndo buake wara ba teme bama u Yerushareme, u kata Yude ndja ikimi, u kata Samariyi, ndo inamana matupuru ma shin'amana. ⁹ A mana yande roro ngosho, ba ku mandasha u riki itanga ra nendeke banda, ndo ibende ri ku niti u mishi ma banda. ¹⁰ Ndo ngo a wara banda munu ba mpiki mishi u riki itanga ra tetewuku yande, rende, bate ba pende ba reye mapere ma yeme ba ku ba pununu, ¹¹ ndo ku ba roro : "Buini bate ba Garere, ishini yeye a nyembete buini u rende mishi u riki? Yesu yono, ndjua a totoro bande u riki kata ndeng'ayini, yi wiki wiyi u ipu munu ri moko puara yini ya ma buini mmono ya yende ra riki." ¹² Keke ba ku karuwa ra Yerushareme, to nkondjo mua nguruku banda mu mite nyi ba olive, munu muiyi a ngama a Yerusareme, tamba ndja ruere kirometere imoko. ¹³ Itanga ra toro banda, ba ku banda u kata mburu ipoko ndja riki u mbete ya weke banda ya kokoyi matuwu ma makimi. Ba wara Petero, Yone, Jake, Andere, Firipe, Toma, Bareteremi, Mataya, Jake muan'abora Alfe, Simo muina Zerote, ndo Yude, muan'abora Jake. ¹⁴ Ba bakimi u iwokosho ri moko, bi ya yekeke u maromboro ma Ndjambe, ando bawata, ndo Mariyi, inyand'abora Yesu, ndo aki babi yanda ba bora Yesu. ¹⁵ U matuwu mana, Petero ku katuwu u ndenge baana binyanda, buiki bua bate bana bi ya puturu ruera rukama ndo mashanga mapende, ndo ya ku roro: ¹⁶ "Baana ba maya, dja nomboko ande ru yemene, runu Nyumu ndjua Ntsheke a te ya toto a bosho u Nkanda, u numbu mua Davidi, u runu rua neke Yudase, yono a wara ntshende a bana ba wata Yesu. ¹⁷ Yande a wara ba mara u ndeng'ayiti, ndo a wara a ikapa u nneme munu moko ando yiti." ¹⁸ Moto yono, a shombo yande ngondo ando iputu ra rueyi rua ru be. Ya ku buaka bu purumu, ku batuwu rutoko a ndenge, ndo bikete dja kata djande dja bikimi ku pandjishi. ¹⁹ Rueyi runu bate ba bakimi ba Yerusareme ku ruyebe ande ngondo yini ba meke yi wuru a rutoto rua banda hakeredama, dja noko ror'ande, "nondo ndja makere." ²⁰ Keke, ba pundu u nkanda mua Ndjemb'ande: "djiyi ande Mbur'ande yi shara buwana, ndo ake moto a reke yi iwara! ndo ake moto ndjueke yi wosho buriti buanda . ²¹ Dja nombok'aki ande, ndenge a bate bana baweke ribiri ando yiti matanga ma makimi mana Kumu Yesu a wara yanda yi bungu a yiti, ²² to u ibatishi ra Yone ntishi inamana ku rushuwu runu rua nteye banda u ndenge a yiti, djake romb'ake ande moko ndjua ndenga banda yi buake ando yiti teme ndjua ma wumuwu manda." ²³ Ba ku punushu bate bapende: Yosefe a nguruku bande Barsabase, ndjua a yeke ba rukombo rueke Justuse, ndo Matiyasa. ²⁴ Keke ba ku rombo Ndjambe ngow: "Kumu, wene wa nyebeke miteme nya bate ba bakimi, tshu shundju u bana bapende yono a ntshoro wene, ²⁵ shin'ande yande yi buishi ikapa u nneme munu ndo u rutomo, runu Yudasa a ntsha buabara a shini ku wende u mbet'ande. ²⁶ Ba ku ba borosho mubere, ndo mashororo ku buaka a riki ra bora Matiyasa, yono a nyayi bande a riki ri u batomo ishanga a moko.