¹ Po u Agilipa akati kwa Paulo, ''ungiyughila wimwene.'' Po u Paulo akagholosha akakono kake nukwanda pakwishighilila. ² ''Ngwitesha nimwene ukuba wa kusayiwa, mwene u Agilipa, ukuti inongwa yangu yibe pandashi yako umusughu mushisho abayuda bakuyugha, ³ nganingani papo we bakushimanya ngani shoshi inyiho sha ba yuda na malalusho. Po ngukusuma ukuti umbulikishe umwakufwasilila. ⁴ Shanaloli, boshi a Bayuda bashimenye mumwo ngikalilagha ukufuma kubukeke mukaya kangu na mu Yelusalemu. ⁵ Bamenye une ukufuma po pabwandilo nandi bakulonda ukuti bashimikishe ukuti ngikalagha ukufwana naba Falisayi, babo batakwangalisha ukwiputa lole bakuketelesgha ngani. ⁶ Po ulu nimilile panu ngulongiwa chifukwa cha lusubilo lwangu mumalaghano gha Chala ukwendela mubotata. ⁷ Ukwendela mwilaghano lilili mwomumwo abaluko lula twelovu bakabika ulusubilo ukuti tibambilile po bakumwiputa u Chala umwakubukilila pamusi napa bushiku, po sona ukwendwla mulusubilo lululu, Malafyale, abayudabakususania nune. ⁸ Choni chicho mukwinong'ona ukuti fitangabombiwa ukuti u Chala ashushe abafwe? ⁹ Ulu naloli, une nimwenecho nginong'onagha ukuti imbombe ifindu ifyingi ifya kusutana ni ngamu ya Yesu uwaku Nazaleti. ¹⁰ Ngashibomba ishi mu Yelusalemu. ngabapingila munyumba yabapinyiwa abandu abingi abikemo aba Chala ukwendela mululaghilo lwabo ngambilila ukufuma kubaputi abosongo; po linga baghoghiwa, ndakapulikanagha nawo. ¹¹ ngabafundagha utubalilo utwingi mumasinagogi sona ngaghelagha ukubafimbilisha ukuti batukaghe amahelu. Ngaba ne mukali ngani nukulimbana nabo sona ngabafwimagha nababo bakaba mutwaya utwaya twa chigheni. ¹² Mwo ngali ngubomba shishishi, ngabuka ku Damasika nubulaghili nindaghilo ukufuma kubaputi abosongo; ¹³ Mwo indi pabulendo, pakati pamusi, Malafyale, ingatesha ubwelu ukufuma kumwanya bubwo bukelupa ukukinda isuba, po bukatubalila umwakutushungulila une nabalisha babo tukendagha nabo pamupene. ¹⁴ Mwo tweshi twawa pase, ngapulika ishu likuyugha kukwangu munjugha ya Chihibulu, 'Sauli, choni chicho ukufwima? Chipala kukwako ukuti ulwanaghe nune.' ¹⁵ Po ngati, 'We wini, Malafyale?' U Malafyale akamula, 'Ne Yesu yuyo kumufwima. ¹⁶ Po nyamuka nutulundi twako; papo pafundo yiyiyi chobene nasetukile kukwako, pakukusala uwe ukuba we mubombi sona kamboni ukufwana nifindu fifyo ufimenye ukufwana nune ulu nasona nifindu fifyo tise ngulangishange mundashi; ¹⁷ Po ngwisa kukupoka ukufuma kubandu sona nukufuma kuba kuse kuko nguya pakukutuma, ¹⁸ Pakughighula amaso nakubapindula ukufuma kuchisi ukwisa kubwelu nukufuma kumaka gha setano ukuya kwa Chala, ukuti bapokele uluhobokelo lwa mbibi ukufuma kwa Chala nubwingila chilingo bubwo ngubapa babo belushiwe mulwitiko mumwangu.' ¹⁹ Po lole, u Malafyale Agilipa, ndakasusania nifisetuka fya kumwanya; ²⁰ lole, kubabo bali mu Damasikasi tashi, po sona Mu Yelusalemu, na muchisu choshi icha Yudeya, nakubakuse bubu, ngabapa amashu ghakuti bapinduke basanukile kwa Chala, babombaghe imbombo shisho shikubaghilisania nulupinduko. ²¹ Pachifukwa chichi abayuda bakambinga mutemhpilinukughesha ukuti baghoghe. ²² U Chala andulite une mbaka ulu, po ngwimilila nukushimikisha kuboshi abanandi nabakulu nashimo shimo ukukinda pa shisho abakunguluka nu Mose bakayughagha ukuti shikuya kubombiwanga---- ²³ ukuti u Kilisitu abaghile ukutamiwa, sona nukuba wakwanda pakushuka ukufuma ku bafwe, akwisa katangalasha ubwelu ku bandu bitu nakuba kuse.'' ²⁴ Mwo u Paulo amalisha ukwishighilila, u Fesitasi akati namashu ghakukolela, ''Paulo, utaninongwa ubumanyili bwako bukukupelela ubuchefu.'' ²⁵ Lole u Paulo akati, ''Tanemuchefu, we mwimikiwa Fesitasi, lole kutangasha amashu gha bwanaloli nubulongi ubwa bwanaloli. ²⁶ Pakuti u Malafyale afimenye ifindu ifi; po ulu nguyugha nubukifu kukwake, nukufimbilishiwa ukuti manye ifileke fimo pakumubula; papo ifi fitakubombiwa umwakwimama. ²⁷ Ngimba ukusubila abakunguluka, Malafyale Agilipa? Ngumanya ukuti ukusubila .'' ²⁸ U Agipa akati kwa Paulo, ''kulonda ukuti unyengelele une pakabalilo akapimba ukuti imbe ne mukilisitu?'' ²⁹ U Paulo akati, ''ngwiputa kwa Chala, ukuti pakabalilo akapimba pamu akatali, uwe wimwene hagha lole naboshi babo bakumbulika une umusughu, bakwisa ukuba isa nene, lole ukushita kupinyiwa ni mbingu mu jele.'' ³⁰ Po u Malafyale akimilila, numulongoshi, nu Benisi, naboshi babo bakikala nabo pamupene; ³¹ Mwo batilapo panyumba yiyo bakabunganapo, bakanda pakuyughisania ukuti, ''umundu uyu atatulite nachimo ichakumubaghila ukuti apinyiwe pamu afwe.'' U Agilipa akayugha kwa Fesitasi, ³² ''Umundu uyu ngali tumulekeshishe pala atakayitumagha kwa Kayisala.''